1 Siyiex ah nin, “Mawh koe lai grieh miex pex, pa hoik ploi aux nawh luan di mawx? Phan ang mawh nan, mawh hoik coh Aux pex ka ceuk rom Aux ka kaux pui mawx lie? Mawh kheu jao phimap pex, pex hoik kham krax pa coh tix mai mawh kheu jao pa lud pex khankix, miex pex tom mawh pa hoik ploi tix luan heue. 2 Yam hoek aux, pui tix kaux kawx ang lai koe kheu jao pa yuh ka mawx lie? Yam kok Aux pui pa sang deeh pawk ang lai koe pie tix kaux kawx, kheu jao pa yuh ka mawx lie? Mawh hoik ngaing taix Aux, ka ang pon ti deeh taoh lie? Phan ang mawh nan, mawh ang Aux koe sibrawm ti sang deeh taoh lie? Jhak heue, Aux ah mai rawm sigrit sigra kroh hu heue. Aux kieh rawm klawng khankix mawh daux tiagtu, ka pa koe ka daux kix sium kheu ang rawm lai koe mai yum ka sang nyaux nie tix rawm heue. 3 Aux ceep raoma ka kraung lung mai Aux yuh chee rhix mawh pa kheem kix heue.” 4 Siyiex pa mawh Siyiex hoik tawx dak pa chix gau chix sawn ka Aux, sonsang tawng Aux ti chix sikah gumlox pa teem ka pui pa koe krax taug mao heue. Nawh so Aux ku ngawb, Nawh so yhaok Aux, sonsang chix mhong, awm pui pa gau lai heue. 5 Siyiex pa mawh Siyiex hoik paoh daux yhaok Aux mai Aux ang lai koe krax pa kieh thiang mai Aux ang lai deeh veeh tix plak khaix heue. 6 Aux tawx blawg tix ka pui an kix, pa sivied ka Aux mai tawx sibax Aux ka pui an kix pa reeig ka hauk sibax Aux heue. Aux ang lai mox pakngai khaing krax kaig tua mai khaing krax baig heue.Ref 50:6 Mat 26:67; Mak 14:65. 7 Siyiex pa mawh Siyiex tak teem ka Aux. Mawh kheu nan, Aux tak ang lai koe krax pa laux pakngai. Mawh kheu nan, Aux kieh pakngai tix kiien awm simaox pai mai Aux tawng ka ang Aux mawh pa kaig pa tua heue. 8 Ref 50:8-9 Ro 8:33; Heb 1:11Mawx pa kok Aux koe krax pa rahsee, ot dex Aux heue. Mawh pui mawx pa sang simah ka aux lie? Kieh ex cung ti ot tau heue. Pui koeng ka aux mawh pui mawx lie? Kieh nawh hoek dex Aux heue. 9 Jhak heue, Siyiex pa mawh Siyiex tak teem ka Aux. Mawh pui mawx pa tak sang prawng ka piang Aux lie? Kix tak sang prim hu khawmuik, awm kraung ceep, pung piang shiah tak ih an kix uik heue. 10 Mawh pui mawx ka daux sinax pex pa koe krax lhat graung ka Siyiex lie? Mawh pui mawx pa nghiet lox krai siliex nawh lie? Mawh pui mawx pa lailing ti hu ka daux pa faik mai pa ang koe pa riang, kieh nawh een rhawm tix ka daux ceu kaux Siyiex mai deuh rhawm tix ka Siyiex nawh heue. 11 Pex khawmuik, pa keeig ti deuh ngu lai lawm tokaux cao pex mai lailing ti hu ka daux rao ngu pex mai ka daux ngu pa hoik keeig pex khankix, pex tak pon ti koe in khaing daux tawm taix Aux, pex tak ot ka daux krax khi rhawm heue.