48
1 Nyiex ma pui Yakop eue, nghiet heue, pa hoik kok ti mawh ceu kaux Isarelax mai pui pa hoek khaing rawm keut haktiex Yudax, pa hoik tiextu ka ceu kaux Siyiex mai pa krai grawng Siyiex pui Isarelax, ka daux pa ang kaux sijax mai pa ang koe krax rahsee.
2 Kix kok cao tix mawh pui veng pa singax mai deuh rhawm tix ka Siyiex pui Isarelax, ceu kaux Nawh Cao mawh Siyiex cao kru naing raoma.
3 Aux hoik krai pa koe phao ka tom yam jah, ceu an mawh pa lih khaing jheeh Aux mai Aux hoik kieh kix mhong, Aux hoik yuh ceu an sijaox mai an hoik lih ti mawh.
4 Mawh kheu Aux hoik tawng maix kiien rhawm mai ngawg maix mawh rhiem mai dongre maix mawh tawng lheung;
5 Aux hoik krai grawng kaing in ka maix, tom yam jah, sivoe ang an nyang bax hoek, Aux hoik krai maix mhong, phan ang mawh nan maix tak ah nin, aux yuh cao ka riang rao krub an mai aux hoik tawx lox ka riang rao pa saik tix.
6 “Maix hoik mhong mai pau maix yaox ka in, mawh ang maix sax krai pui mhong lie? Jah yam in Aux sang krai maix mhong ceu pa khraox, mawh ceu pa mox pa ang maix tawng kah.
7 Mawh ceu pa khraox pa phan tix ang nyang rheung maix ang nyang sax mhong sivoe ngaix in, phan ang mawh nan, lhat maix ah nin, ‘Jhak heue, aux hoik tawng.’
8 Maix ang sax mhong maix ang sax tawng, jah tom yam an dix maix ang nyang bhang yhaok tix, Aux hoik tawng yuh maix kaing pie lhen mai hoik tawng jah tom yam keh khaing daux vaig miex, nawh kok mawx mawh pui tieh feen.
9 “Mawh kheu jhak Aux ka plakngai cao tix mai mawh kheu yaox Aux pa yaogyaw cao tix, Aux tom gun yeung ka maix, sonsang ang Aux teei ti tik ka maix.
10 Jhak heue, Aux hoik thi ka maix mai ang awm thi ka mau, Aux hoik cheuk ti yaox maix ka daux glah ngu pa kha rhawm.
11 Aux yuh awm an kheu jhak Aux plakngai cao tix, Aux ang pon kham ka pa salao ka ceu kaux Aux mai ang tawx min pakngai tix ka pui tang kaux.”
12 Yakop mai Isarelax pa kok Aux eue, nghiet ka Aux, Aux mawh Nawh Cao, Aux pa mawh cao pa jah mai cao pa sidah.Ref 48:12 Isa 44:6; Jhi 1:17; 22:13.
13 Taix Aux hoik yuh ti deuh num riah haktiex mai taix dawm aux hoik neh raoma, yam kok aux kix, kix yaog ti hoek tau.
14 “Pex khawmuik khrawm paox tix mai nghiet kah, mawh pui mawx pa krai ceu in ka sinax kix? Siyiex moh ka nawh, nawh tak yuh pa khaw mai alo Nawh Cao ka veng Babulon mai taix nawh, tak puing ka pui Khaladie.
15 Hoik mawh Aux cao pa krai mai cao kok ka nawh, Aux hoik viex nawh hoek mai nawh tak haok hwan krax hu.
16 Greed hoek dex Aux, nghiet ka in, tom yam jah Aux ang sax mox tix krai ka dee glip, jah khaing yam an, Aux hoik ot tan, yam in Siyiex mai khwan cao hoik ploi Aux hoek.
17 Siyiex Cao taoh maix mai Siyiex pa singax singeh pui Isarelax ah nin “Aux mawh Siyiex pa mawh Siyiex maix, pa gau maix koe bwanson, cao thong maix hu krax pa khaw maix ti hu.
18 Phan maix cu nghiet ka lox pingnyap Aux, pa nhim pa grum naog maix tak awm rawm klawng mai pa rahsee maix tak awm puk pak rawm sigrit sigra.
19 Doeh ru maix, tak nie awm mhaik mai kawn praix cao maix, tak awm mu mhaik, ceu kaux nawh tak ang tat ti tik mai ang yuh laux leeing ka plak sivoe Aux.”
20 Lih hu khaing veng Babulon Ref 48:20 Jhi 18:4.mai to khaing pui Khaladie mai ah lox lai rhax gaux rhawm, krai pao kix mhong ceu in mai krai tom sidah sidu haktiex, “Siyiex taoh lawd siliex tix Yakop.”
21 Yam thung Nawh Cao kix hu ka daux tiag mhaik, kix ang simie ka rawm, Nawh Cao kieh rawm lih khaing rang son kix. Nawh Cao lug rang mai rawm preeng ti lih.
22 Siyiex ah nin, “Pa nhim ang lai koe son pui caox caig heue.”Ref 48:20 Jhi 18:4.