1 Ka daux singaix an bun aliah kaux tak giex ti deuh simex tix kaux mai ah nin “Ex tak sang ih priex cao tix mai ceep kraung cao tix, kieh yix mawh pa kok tix ka ceu kaux maix nong nong ngie, sonsang teei ti tik krax pa kaig tua yix heue. 2 Ka daux singaix an, nyoig kak khaox Siyiex, tak mawh pa mhawm grang ti yaox mai pa koe min sibrawm mai plix piang tiex khankix tak mawh pa kied lheu mhawm mai pa fah rhawm son ceu pui Isarelax pa hoik pon glawd khankix heue. 3 Khaix hoik luan ceu an pui pa kawn prah tix ka daux veng Zion mai pui pa kawn deuk ka daux veng Yerusaliem khankix, tak kok kix ku kaux mawh pa singax ka daux sinax pui pa kawn im ju pa hoik mhai ti deuh carang ka daux veng Yerusaliem heue. 4 Yam hoik sigrhah Siyiex pa seeing brai kawn bun veng Zion khankix mai hoik singax yuh nham veng Yerusaliem khaing daux sigreung nawh, ka khwan krax prawng krax ci yang mai ka khwan gleeing ngu. 5 Khaix an Siyiex tak phan ti deuh paiawm mai taox ngu ka plak ponngaix mai rao ngu pa jhan riang ka plak ponsawm, ka piang dee ot dee koe kudauh kudee piang gawng Zion mai ka piang dee khrawm pui tix kum heue. Ka piang an khawmuik min sibrawm Nawh tak kheem kah heue.Ref 4:5 Lih 13:21, 24:16 6 An tak mawh son veei plak pon ngaix kheu hax koek mai mawh son dee pan dee mox tix kheu bhaung ting mai lhiex ting heue.