1 Jhak heue, Siyiex, pa mawh Siyiex Cao kru naing raoma teei kraung pa pum tix mai kraung pa priex tix khankix, blah pa tawx tix khawmuik mai khawm rawm pa tawx tix khawmuik hu khaing veng Yerusaliem mai khaing meung Yudax, 2 Khawm pui pa ting riang rao mai pui naing, cao prawng see mai cao jhai cao pa chix sibawk mai kuad song, 3 Khawm cao kaing naing piang pui tixphwan kaux mai pui pa koe min sibrawm, cao pa chix tawx krax keud mai pui pa min ka kaing taix mai pui pa min ka plak lox pih khankix khawmuik heue. 4 “Aux tak kieh kawn nyawm mawh lauxsimiang kix, mai kieh kawn ngie mawh cao kwang piang kix heue. 5 Pui meung khankix tak sang gut yeen paox tix, pui tix kaux mai tix kaux mai paox plawg paox nyawm tak ra lai gut yeen paox tix, kawn nyawm tak ang lai koe krax nab yam ka pui kuad mai pui beuh tak ang lai koe krax nab yam ka pui pa koe min sibrawm khankix heue. 6 Yam giex pui tix kaux ka puxaik tix, ka daux nyiex keeing nawh mai ah nin! “Maix kawn koe kraung ceep maix yuh cao pa kwang ex mai kieh krax pa laux leeing inkix tak ot ka greem pa kwang maix heue.” 7 Ka daux singaix an, nawh tak thiang ah nin; “Aux ang pon pai pa saux pex, mawh kheu priex preem kraung ceep ang koe ka daux nyiex aux, paw kieh aux yuh cao pa kwang ka piang pui khankix liak!” 8 Grawh grawng nawh veng Yerusaliem hoik goh grhup mai meung Yudax hoik som nai kheu dak kix mai pa yuh kix khankix, mawh pa tieh feen ka Siyiex, sonsang so kaoh ka ngai min sibrawm Nawh Cao heue. 9 Pakngai kix kham sakse ka son grawng tieh feen kix mai kix hu krai doh ka phimap phighram tix, awm veng Sawdom kix ang lai mox ka heue. An mawh pa kha rhawm son ju kix heue, Mawh kheu kix hoik viex pa caox hoek ka piang tokaux cao kix heue. 10 Ah nin ka pui pa rahsee, grawng tak sang mawh an pa mhawm son kix heue. Mawh kheu kix tak sang yaox ti ih plix pa kaoh khaing krax pa yuh kix heue. 11 Pui pa caox caig tak kha rhawm, pa caox an tak mawh pa khaw tau mai nawh heue. Mawh kheu nawh tak deeh pon totaix awm pa yuh tix heue. 12 Phan mawh ka son pui Aux khankix, kawn nyawm khankix kin kha ti ih ka piang kix mai bun khankix mawh cao pa kwang ka piang kix heue. Pui Aux khankix eue, Can pui pa thung ka pex khankix, mawh pa yuh pex lud loe krax mai yuh daux krax hu pex laux leeing heue.”

13 Siyiex yaog ti kaoh cung sonsang pawk lox mai prawng ca ka pui khankix heue. 14 Siyiex tak sang laig ka dee prawng see, tau mai kuad song pui Nawh Cao khankix mai cub Simiang khankix mawh kheu pex hoik uik ih plix sipeem plix siiet aux; kraung pa tud rhim khaing pui hot shia hoik koe ka daux nyiex pex heue. 15 Siyiex Cao kru naing raoma ah nin, “Deeh bleeh gut yeen pex ka pui Aux khankix mai krid pex ngai baoh pui hot pui shia mawh ceu patix lie? 16 Lheu khaing an Siyiex baox ah nin “Kheu jao grawng mawh kawn bun Zion khankix pa kied ting rhawm mai lai ling ti jhi ngawg tix mai jhak pui ka daog ngai tix, hu lai ling mai sideet diang tix yuh lox proing caong tix luah heue. 17 Mawh kheu Siyiex tak yuh kix kham geu krax saux pak hauk kaing, ka piang kaing cub kawn bun Zion khankix mai Siyiex tak plak ti tik kraung dee koe krax pa kaig pa tua kix heue. 18 Ka daux singaix an Siyiex tak teei ti tik ceu pa mhawm khankix, pa mawh ble luah hawt ngai liak, man lawk kaing mai sigiiep hauk pa awm pakpeung haok khix khraox, 19 Krim ble mai man tie pakngai khankix, 20 Mhok khri maox soi caong mai man rawd nyoi, iiep sidah bhawng hau mau kraung laoh lie khankix, 21 mai jeep gien krim meeh khankix, 22 sibex rhi ceep daux pawie mai man fua kaux, kraung ceep plak praix hau mau khankix, 23 mai siliak jhak, sibex plak daux, lawk kaing mai sibex dhah heue. 24 Ceu an kix tak lih ti mawh son tang pa sioe bhawng, tak mawh pa cux si um, son tang man rawd nyoi tak mawh maox tix nyaing, son tang hauk kaing pa hoik sat tix mhawm, mawh pa pak kaing, son tang sibex dhah mawh maox rawd man pa kawm mai khaix pied gawng rhiem mawh son tang pa mhawm grang heue. 25 Pui maix khankix tak goh ti yum ka vaig lawm mai khawm pa ting riang maix tak yum ka daux naing heue. 26 Diang siviex nawh khankix tak yiiem yo mai koe krax laux rhawm, nawh hoik yiien mai ngawm ka piang tiex heue.