1 Yam in kieh aux ah lai rhax son paox moh dud aux,Ref 5:1-2 Mat 21:33; Mak 12:1; Luk 20:9 lai rhax paox moh dud aux pa dex dawd mai sipeem plix siiet nawh heue. Paox moh dud aux koe sipeem plix siiet tix gwang, ka piang ton gawng pa kied mhawm phon heue. 2 Nawh kaong ka daux tiex mai teei lon simaox singax mai sum nhu plix siiet pa kied mhawm ka daux an heue. Nawh sum nyiex pau ka daux sigreung sipeem mai baox yuh dee biiet rawm plix siiet ka daux an; mawh kheu nan nawh hoik keud ce an sang pon plix siiet ceu pa mhawm, viang mawh nan, an hoik lih ti mawh plix siiet tiag heue. 3 “Yam in pui pa ot ka daux veng Yerusaliem mai pui meung Yudax khankix eue, aux rawg pex prawng see sinax aux mai sipeem plix siiet aux liak!” 4 Mawh ceu patix pa ang Aux bax pon yuh ka sipeem plix siiet Aux, lheu khaing pa hoik yuh Aux ka daux nawh lie? Khaix an yam hoik keud ce aux nawh sang koe plix siiet ceu pa mhawm, an hoik lih ti koe plix siiet tiag kheu jao pa yuh ka mawx lie? 5 Yam in yuh bwanson kieh Aux krai pex mhong grawng sang pon yuh Aux ceu patix ka sipeem plix siiet Aux, Aux tak sang teei ti viex nawh mai gleeing ka ngu mai yieh ti tik guh veng nawh mai kieh pui ting dig ka heue. 6 Aux tak deuh nawh mawh daux tiagtu; tak ang lai paog lai kaong, viang mawh nan, pang yeem mai pang kat khankix tak deeh kuah daux an heue. Aux tak baox deeh tawx gumlox ka paiawm khankix, sonsang ang kix lai ploi rawm lih ka piang an heue. 7 Grawh grawng nawh sipeem plix siiet Siyiex Cao kru naing raoma mawh nyiex ma ceu pui Isarelax khankix, mai pui Yudax khankix, mawh pang khaox pa khaw rhawm Nawh Cao ka heue. Nawh Cao hoik keud ce mawh son krax pa rahsee, viang mawh nan hoik mawh krax pa yeen tix kha rhawm son pa rahsee, viang mawh nan jhak heue, hoik mawh krax pa yiiem heue.

8 Kieh krax pa kha rhawm koe ka piang pui an kix pa sitoe nyiex tix lhaong mai tix lhang mai pa deeh kleuk gwang kaung tix gwang mai tix gwang, tom hoik ang deeh lai koe, ka dee sang pon kix tix ot ka nong nong ka daux sigreung haktiex an heue. 9 Ka daux pa mhong aux Siyiex Cao kru naing raoma hoik ah nin nyiex khankix tom nie, tak mawh pa grham tix yiien tete khawm pa ting mai pa mhawm grang an khankix ku lhang tak mawh pa ang pui lai ot kah heue. 10 Grawh grawng nawh, sipeem plix siiet pa uik kao glawm simie tak pon rawm plix siiet ti pug ngie mai simie pa rhuat kao pung tak pon tix pung ngie heue. 11 Kieh krax kha rhawm koe ka pui an kix pa kaoh caocao plak ponngawb, ka sang hawt tix khaix rawm plai pa khiien nyaux an ang jud tom hoek ponsawm, tom hoik hax bhawm plai ka daux kix heue. 12 Ting feuk mai ting si khankix, ting plah khaox mai shiao mai rawm plix siiet khankix koe ka daux pawie heue. Viang mawh nan kix ang yuh ti dex dawd mai kaing Siyiex mai ang koe krax keud ka pa yuh Nawh cao ka taix tix heue. 13 Mawh kheu nan pui aux khankix yaox ti ot ka daux pa giex laung, kheu jao ang kix koe krax tawng yung, pui koe min sibrawm kix mawh pa hoik yum ca, mai pui kix khankix hoik kroh kroing ka sang nyaux nie tix rawm heue. 14 Mawh kheu nan, meung yum hoik yuh tokaux cao tix kied vieh mai hoik paoh daux moing jheeh tix ka daux pa ang lai pon tiag min sibrawm kix mai pui hun kix mai min pakngai kix mai pui pa koe krax gaux rhawm khankix tak lih ti glip ka daux an heue. 15 Pui khankix tak mawh pa khlut rau, pui ku kaux tak yeen tiem mai pui pa lhaong ngai jhak khankix tak yeen tiem heue. 16 Viang mawh nan Siyiex Cao kru naing raoma tak yaog ti ting lhaong ka daux krax prawng krax ciyang mai Siyiex pa singax singeh, tak mawh pa koe min sibrawm ka daux krax pa rahsee heue. 17 Khaix an kawn yung khankix tak liang tix ka daux dee mhawm rib cao kix mai ka dah dee pa yiien cie cao mi khankix ku kaux, nyo sinie tak yaox ti koe krax ih ka heue. 18 Kieh krax kha rhawm koe ka pui pa bluh ti teei pa lud, ka maox nyaing pa giex going, mai phimap phighram awm pa tuk maox nyaing tuk ling lawx tix lhang, 19 pa ah nin, kieh Nawh Cao sigleeig ti yuh ka kaing jhaw cie Nawh Cao phai, son tak sang pon ex ti yaox an mai kieh krax pa keud pa sawn Siyiex Cao pa singax ceu pui Isarelax tix kaux an, greed hoek dex, sonsang pon ex ti tawng ka ceu an heue.” 20 Kieh krax kha rhawm koe ka pui an kix pa kok ceu pa caox mawh pa mhawm mai ceu pa mhawm mawh pa caox, pui deuh pa faik mawh pa riang mai pa riang mawh pa vhaik, pui deuh pa song mawh pa tie mai pa tie mawh pa song heue. 21 Kieh krax kha rhawm koe ka pui khankix, pa keud tix koe cuyi pingnya ka daux ngai cao tix mai pa keut tix koe satix ka daux pa yaox cao tix heue. 22 Kieh krax kha rhawm koe ka pui khankix pa keud tix koe riang rao ka nyaux tix plai, kieh krax kha rhawm koe ka pui khankix pa keud tix koe rhawm kwa ka nyaux ti rawm plix siiet khiien pa hoik ku klao ti khankix, 23 pa yuh krax pa rahsee ka pui pa caox caig sonsang teei tix kraung pa cun praok mai teei grawng krax rahsee hu khaing pui pa rahsee heue. 24 Mawh kheu nan, awm voeg ngu ka brex nghox khankix laux leeing mai awm gleeing rao ngu ka kam khankix, awm an riah kix tak sang awm khaox rham mai pruh tai kix tak sang haok plak piang awm phawng tiex; grawh grawng nawh, kix hoik thiang ti tik ka gumlox Siyiex cao kru naing raoma mai hoik nu nai ka gumlox Siyiex cao pa singax singeh ceu pui Isarelax heue. 25 Mawh kheu nan krax song rhawm song rhi Siyiex hoik lih ka piang pui Nawh cao khankix, Nawh cao hoik nyeu khawn taix tix lih ka piang kix mai tawx krax pa kham pa geu ka kix mai gawng khankix hoik yung yang ka heue. Kaux yum kix hoik mawh pa awm aing pa tik tix ka daux sigreung krax khankix heue. Son in khawmuik krax pa song rhawm Nawh cao ang gah ti hu khaing kix, viang mawh nan, khawn taix Nawh cao ca kawn nyeu tix lih heue. 26 Nawh cao tak jung man chix son ceu pui an khankix pa ot khaing dee singai mai tak phlu siglu ka son kix khaing dee sidah sidu haktiex, kix tak niied ti hoek phai heue. 27 Daux sinax kix pui tix kaux kawx ang lai koe krax taug mao mai krax pa sideeing caong, pui tix kaux kawx tak ang lai gaing ang lai it mai maox khlax rawd nyoi kix tak ang lai bhaw mai maox kiep kix tak ang lai bheeik, 28 te kix mawh pa lawm mai ak kix hoik mawh pa vaik tix, kloh caong brung kix tak awm simaox ngu mai jaong ling lawx cie kix tak awm bhaung keu kang lux heue. 29 Krax pa sinum lox kix tak awm lox graox sivai sangsi, kix tak graox lox tix awm lox sivai sangsi pa kawn awn ju. Kix tak graox lox tix lih, sonsang giex totiag; kix tak teei ti viex an hu ka daux krax pa yiien mai pui tix kaux kawx tak ang lai pon ti deeh taoh ka heue, 30 Ka daux singaix an, kix tak graox lox tix lih, awm sinum siaox rawm sigrit sigra heue. Phan pui tix kaux kawx jhak ti yaox ka haktiex, jhak heue, koe pa faik mai pa laux rhawm mai pa riang hoik mawh pa faik ka paiawm khankix heue.