1 Ceu pui Isarelax khankix eue, paw koe krax gaux rhawm mai krax pa nyawm rhawm, awm pui tang ceu, grawh grawng nawh, pex hoik yuh krax pa lud vao mai hoik tik vud ka Siyiex pex heue. Pex hoik koe krax moh son totaix pa koe piang glah dee pah nghox heue. 2 Glah dee pah nghox mai dee biiet rawm plix siiet khankix, tak ang kub eei kix mai rawm plix siiet pa khraox kawx tak cud heue. 3 Kix tak ang pon ti ot ka daux haktiex cie Siyiex mai Epharem tak sang deeh yaox ti ing ka meung Ejiptux mai tak sang yaox ti ih ceu pa ang singax khankix, ka daux haktiex Asurix heue. 4 Kix tak ang pon ti tan, krax tan rawm plix siiet ka Siyiex mai krax tan pa appong kix kawx, tak ang lai mawh pa khaw rhawm ka Nawh Cao heue. Ceu pa tan kix an tak mawh pa awm pa ih pui pa khu rhawm nyiex yum mai can pui pa ih ka an khawm uik, tak mawh pa seeing kah heue. Mawh kheu pa ih cie kix, mawh ngie son tokaux kix khaing, tak ang lai pon laig ka daux nyiex bwan Siyiex heue. 5 Ka daux singaix pawie Siyiex, pex yuh ceu patix lie? 6 Jhak heue, kix hoik lih hu khaing pa laux leeing, pui meung Ejiptux tak sang deeh kha rhawm ti deuh kix, pui veng Miemphi tak sang sipaung kix heue. Pang kat heeik khankix tak kheem piang mau pa koe ngawh jum kix, pang kat khankix tak sang koe ka daux nyiex gox kix heue. 7 Ceu pui Isarelax tak tawng singaix pa ciyang hoik hoek,Ref 9:7 Luk 21:22. singaix pa sang deeh pawk bix hoik hoek heue. Cao jhai mawh pui pa pheem tix kaux, pui pa koe khuan mawh pa yhot, kheu krax pa kied ting phimap maix mai rhawm cao pa kied ting maix heue. 8 Epharem mawh cao pau ka plak Siyiex aux, viang mawh nan, cao jhai mawh kie pui pa taong sim ka daux krax nawh khankix khawmuik mai pui pa yuh pa caox koe ka daux nyiex Siyiex nawh heue. 9 Kix mawh pa kied koe krax laux jhawm, awm ka daux baux singaix ot ka veng Giba heue.Ref 9:9 Cao 19:1-30. Nawh Cao tak deeh doh keud ka phimap kix mai tawx krax kham geu ka son phimap kix heue. 10 Aux hoik yaox ka ceu pui Isarelax, awm plix siiet pa koe ka daux tiagtu mai Aux yaox keeing pex khankix, awm plix ruh pa liang ti teem piang khaox ruh bawg yam rung praix heue. Kix hu ka Balapeawrax Ref 9:10 Si 25:1-5. mai gwieh ti deuh tokaux tix ka siyiex Balax pa mawh pa kaig tua, kix hoik lih ti mawh pa seeing brai awm ceu pa hoik moh kix heue. 11 Phan mawh ka son Epharem min plakngai kix tak sang po ti luan awm sim, tak ang koe kawn, ang nghe mai pa ang koe kaux heue. 12 Viang kix eei kawn praix tix haok hwan ting lhaong kawx mai Aux tak sang kieh kawn praix kix som nai khawmuik, ang lai kieh deuk tix kaux kawx heue. Yam tik vud Aux ka kix mai kix tak koe krax kha rhawm heue. 13 Aux yaox ka Epharem awm veng Turux, pa hoik sum tix ka dee pa mhawm tiex mai Epharem tak sang viex kawn praix tix khankix tawx ka cao pah pui yum heue. 14 Siyiex eue, tawx ka kix liak, tak sang tawx Maix Cao ceu patix lie? Tawx daux vaig pa ang chix koe kaux mai gun teeh pa kroh rawm ka kix liak. 15 “Krax pa caox yuh kix khawmuik koe ka daux veng Gilagalax, Aux hoik koeng ka kix tan heue. Mawh kheu krax pa caox kaing yuh kix, Aux grheu kix luan khaing daux nyiex aux, aux tak ang lai mox ka kix khaix in heue. Cub simiang kix mawh pui pa deeh tieh feen khawmuik heue. 16 Epharem mawh pa pon pa kham geu, riah kix hoik kroh kroing, kix tak ang lai chix koe plix, viang kix keh kawn kawx, Aux tak sang pah kawn pa kied moh kix yum heue.” 17 Siyiex aux tak sang tik kix luan, kheu ang kix koe krax cu nghiet ka Nawh Cao mai kix tak sang mawh pui pa vung viang ti hu ka daux sinax ceu pui tang meung khankix heue.