1 Ceu pui Isarelax mawh nhu plix siiet pa kied mhawm yeem mhawm plix heue. Awm pa nie blon plix nawh khankix, nie baox yuh khu dee tan nawh khankix tom nie, awm pa mhawm koe haktiex nawh, kix hoik baox nie yuh ti deuh rong pa krub kix nie mhawm heue. 2 Kix koe rhawm ra mu yam in kix tak sang kham krax ciyang son phimap tix heue. Siyiex tak yieh ti tik khu dee tan kix mai khawm rong pa krub kix heue. 3 Kix tak ah nin, “ Yix ang koe simiang, mawh kheu ang yix koe krax lhat graung ka Siyiex heue. Simiang kawx, nawh tak sang pon yuh ceu patix ka son yix lie?” 4 Kix ah lox giex going mai tiextu ti yuh sijax mukheu pie lhen. Awm an krax ciyang tak sang yaog ti koe awm rib pa koe jai, pa kuah ka daux rawm tong kaung khankix heue. 5 Can pui pa ot ka daux veng Samarix koe krax lhat graung, kheu riang kawn mawie Bietavin an heue.Ref 10:5 1Sim 12:28-29. Pui pa krub riang kawn mawie khankix tak koe krax khi rhawm son nawh mai cao giex kaing li nawh khankix tak lhat graung, kheu hoik lih hu min plakngai khaing nawh heue. 6 Riang kawn mawie an tak sang viex hu ka haktiex Asurix, kieh mawh totaix pa tan ka son simiang Yariet heue. Epharem tak sang pon krax pa kaig tua ka grawng keud cao kix heue. 7 Phan mawh ka son Samarix, simiang nawh tak mawh pa kheem ti grai awm bai piang rawm heue. 8 Dee pa lhaong veng Avin khankix, pa mawh dee koe phimap Isarelax, tak sang mawh pa laux heue. Pang kat mai pang kat heeik, tak kuah piang khu dee tan kix, kix tak ah nin ka gawng ting, “Kheem piang yix liak, mai ah nin ka gawng iak khankix, grhup piang yix liak.”Ref 10:8 Luk 23:30; Jhi 6:16. 9 “Isarelax eue, pex hoik koe phimap tom daux baux singaix ot pex daux veng Giba mai kix hoik cung ti ot tan heue. Ref 10:9 Cao 19:1-30.Yam in pui pa ot ka daux veng Giba, lai keud naing ceu pa puing ka kawn praix pa koe phimap sivoe in dix ang lai mawh pa hoek piang kix heue. 10 Aux tak sang sidiex gau ka kix awm pa koe rhawm Aux heue. Pui khankix tak sang kraix khrawm ti hoek puing ka kix, yam phyawk Aux ti deuh kix, ka son pa lud kix ra ceu heue. 11 Epharem, mawh kawn mawie shiang pa hoik pheuk tix, pa moh ti sang dig nghox heue. Aux hoik tok ieak piang ngawg pa mhawm nawh, Aux tak sang kieh pui brug Epharem, Yudax tak sang thai, Yakop tak sang pheu lon tiex an khankix max heue. 12 Ruat simie pa rahsee ka son tokaux pex, vawg ka daux krax pa caux rhawm, thai ma dee pa ang pex sax yuh,Ref 10:12 Ye 4:3. mawh kheu bawg yam in mawh bawg yam sawg ka Siyiex, krox tom bawg yam hoek Nawh Cao mai yam kieh Nawh rawm lhiex pa rahsee khankix lih piang pex heue. 13 Pex hoik thai ti sau pa caox, pex hoik vawg phimap heue. Pex hoik ih plix pie lhen khankix, grawh grawng nawh, pex hoik een rhawm tix ka daux krax pa yuh tix mai ka daux pa nie haoh hun pui pa kied ting riang rao tix khankix heue. 14 Mawh kheu nan, grawng krax pa lawh pa mawh, tak sang yaog ti koe ka daux sinax pui pex khankix mai nyiex tab lhaong pex khawmuik, tak sang jieh laux awm hoik yieh simiang Shalaman ka veng Bietarabelax, ka daux singaix puing naing, miex khawm kawn praix hoik blat kix yum tau piang tiex heue. 15 Awm an Betelax eue, an tak sang mawh pa hoik yuh tix ka pex, kheu krax pa caox kied ting lhaong yuh pex heue. Ka daux plak ponngawb, simiang Isarelax, tak sang mawh pa hoik but ti grai pak lawg heue.”