1 Phlu teettawng ka jheeh maix heue, pui koeng tak sang hoek awm klang krih mai puing ka nyiex Siyiex, grawh grawng nawh, kix hoik lud ka gumlox sijax mukheu aux mai hoik deeh tieh feen ka lox beenli Aux heue. 2 Kix tak sang kok yo ka Aux ah nin, “Siyiex ex eue, ex ceu pui Isarelax tawng ka Maix Cao heue. 3 Ceu pui Isarelax hoik tik ceu pa mhawm, pui koeng tak sang hawt pheet khaix nawh heue. 4 Kix yaog ti deuh simiang mai ang tie mawh pa kaoh khaing Aux, kix yaog ti deuh cub simiang khankix mai Aux ang tie cu ka grawng an heue. Kix teei mau, khri kix mai yuh riang grang krub tix ka son tokaux kix, tom sidah pon kix ti mawh pa hoik tat tix heue. 5 Samarix eue, Siyiex hoik tik vud kawn mawie maix, krax song rhawm Aux hoik deeh kaoh ka piang kix heue. Son bawg yam pon kix tix singax singeh tak sang seeing miex grheung lie? 6 Rieng kawn mawie an hoik mawh pa lih khaing ceu pui Isarelax, mawh pui yuh kaing taix tix kaux pa yuh ka an mai ang tie mawh siyiex, mawh kheu nan, riang kawn mawie Samarix tak sang mawh pa phawng heue. 7 Kix rhuat simie bhaung mai vawg bhaung keukanglux heue. Can pa rhuat kix ang lih ti koe gawng, viang lih ti koe gawng kawx ang chix plix, viang mawh pa lih plix kawx, pui tang ceu tak sang bleet ti ih heue. 8 Ceu pui Isarelax mawh pa hoik bleet ti grai, yam in kix ot ka daux sinax pui tang ceu tang meung, awm aw tawng, pa ang pui khaw rhawm kah heue. 9 Mawh kheu kix hoik lih hu tu tix ka haktiex Asurix, awm la tiag pa hu nong, Epharem hoik liag ti tawx totaix ka paox moh tix khankix heue. 10 Viang kix hoik mawh pa liag ti tawx totaix ka pui yam ot tix sinax ceu pui khankix kawx, yam in Aux tak kraix khrawm kix mai kix tak koe krax pa laux rhawm tivud ticu, kheu beeh glawm pa cien simiang mai simiang khankix heue. 11 Mawh kheu jao hoik baox yuh Epharem, khu dee tan khankix tom nie son phimap an, kix hoik lih ti mawh khu dee tan phimap ka son nawh, 12 Aux hoik tiem ti deuh gumlox beenli tom nie ka son nawh, viang mawh nan, nawh kawn keud mawh pa ang dex ang dawd mai tix heue. 13 Son krax appong pa tan ka Aux, kix appong ti tan nex mai ih heue. Siyiex ang doh rieb ti teei kix heue. Yam in Nawh Cao tak doh keud ka krax pa lud kix mai tak sang tawx krax kham geu ka son phimap kix mai kix tak sang deeh ing ka meung Ejiptux heue. 14 Ceu pui Isarelax hoik piawm ka cao pa phan pa deuh tix mai hoik sum nyiex haw khankix, Yudax hoik baox sum veng pa kaux cong tom nie heue. Viang mawh nan, Aux tak sang ploi ngu hoek piang veng nawh khankix mai tak sang gleeing ti tik nyiex haw nawh khankix heue.”