1 Yam tak sang pai Aux dee saux Isarelax, phimap Epharem, hoik lih jhi sidawng mai khawm krax pa caox Samarix. Mawh kheu kix yuh pie kheem, ka plak daux koe pui briex, ka plak praix koe tud rhim khankix pa sivix. 2 Kix ang tie keud ti yaox ka daux rhawm kix, ka doh keud Aux ka pa caox caig kix khawmuik, yam in pa caox yuh kix hoik lai lawm kix mai kix hoik koe plak sivoe ngai Aux. 3 Kix yuh krax pa caox caig sonsang kieh simiang koe krax gaux rhawm mai yuh krax pie kheem kieh Simiang khankix koe krax gaux rhawm heue. 4 Kix mawh pui pa lud vao khawmuik, awm glah ngu pa hoik hax khaing ka cao nghaung blah. Nawh ang tie seeh ngu, glang klu klao tix blah im, tom ang nyang bax hoek bawg yam ploh nawh heue. 5 Ka daux singaix simiang yix, simiang khankix hoik koe krax saux mai hoik yoek ka rawm plix siiet, nawh hoik nyeu taix tix lih mai khawm pui pa nieb yuh krax pa ang cee ang cak khankix heue. 6 Ah tete yam jhak kix ti gaid, kix hoik kieh rhawm tix awm glah ngu, blah kix viang it leeing sawm kawx hax awm ngu pa cap ponngawb heue. 7 Kix mawh pa hax awm daux glah ngu khawmuik mai hoik gleeing ka simiang kix, simiang kix hoik goh khawmuik heue. Pui daux sinax kix, pa kok ka Aux ang lai koe pie tix kaux kawx heue. 8 Epharem hoik saxso tix ka daux sinax pui tang ceu khankix, Epharem mawh khlawp blah pa ang lai plu plie tix, tix plah heue. 9 Pui tang ceu hoik ih riang rao nawh mai nawh ang tawng, hauk kaing hoik saxso tix paing piang kaing nawh mai nawh ang bax tawng ka heue. 10 Krax lhaong rhawm ceu pui Isarelax hoik kham mhai rug ka pakngai nawh, viang mawh nan, kix ang cu tix deeh ing ka Siyiex, pa mawh Siyiex kix mai ang lai sawg ti yaox Nawh Cao ka son grawng in khawmuik heue.

11 Epharem mawh pa awm sikaux pa aw, pa ang tawng ti keud, kix kok yo ka meung Ejiptux kix hu laig ka haktiex Asurix heue. 12 Yam tak hu kix, Aux tak sang nih rub Aux piang kix. Aux tak sang kieh kix rau lih piang tiex, awm sim sai daux raoma khankix, Aux tak ciyang kix awm ceu pa hoik mhong cub pui hun kix heue. 13 Kix koe krax kha rhawm heue. Kheu hoik to kix ti luan khaing Aux heue. Kix tak hoek krax laux leeing, kheu hoik lud kix ka aux heue. Viang Aux sang deeh taoh kix kawx mai kix hoik ah lox pie lhen ka Aux heue. 14 Kix ang tie kok yo ka Aux khawm rhawm tix, yam ngia kix ka piang ku it kix. Kix kraix khrawm paox tix tau son nghox koi mai rawm plix siiet pa khraox mai kix deeh yaog ti deeh tieh feen ka Aux heue. 15 Viang Aux hoik gau mai hoik tawx riang rao plawng taix tix kawx mai kix deeh keud ti sang yuh pa caox ka Aux heue. 16 Kix deeh ing viang mawh nan, ang tie deeh ing ka Siyiex Cao pa kied ting lhaong, kix mawh pa awm ak pa deeh tieh bung tix heue. Simiang kix tak sang goh ti yum ka lawm vaig, kheu krax pa chax nie vao dak kix heue. In tak sang mawh, krax pa nyia son kix ka daux meung Ejiptux heue.