1 Hoek mai kieh ex deeh ing ka Siyiex, mawh kheu Nawh Cao hoik puk paig ex kawx mai Nawh Cao tak sang pai ex moi, Nawh Cao hoik kieh ex mat kawx mai Nawh Cao tak sang gie dee mat ex heue. 2 Khaix hoik luan ra singaix, Nawh Cao tak sang deeh kieh ex im ju ka daux loe singaix,Ref 6:2 Luk 24:46; 1Kaw 15:4. Nawh tak sang kieh ex kaoh son tak sang pon ex ti im ju ka plak sivoe ngai Nawh Cao heue. 3 Kieh ex tawng kieh ex hawt sawg ti tawng ka Siyiex heue. Yam lih bleeh Nawh, mawh pa hoik blang awm plak ponngawb, Nawh Cao tak sang bleeh ti hoek ka ex awm rawm lhiex cao mai awm rawm lhiex lha mai caux piang tiex heue.

4 Epharem eue, Aux tak sang yuh ceu patix ka maix lie? Yudax eue, Aux tak sang yuh ceu patix ka maix lie? Grawh grawng nawh, krax pa mhawm rhawm pex mawh pa awm paiawm plak ponngawb mai awm rawm ciex pa grai ti hu cao cao heue. 5 Mawh kheu nan, Aux teei cao jhai khankix kid kix, Aux pah kix yum ka gumlox pa kaoh khaing daux jeeh Aux mai grawng krax ciyang Aux khankix awm jhan riang pa lih hu plak sivoe heue. 6 Aux khaw rhawm ka krax pa caux rhawm mai ang khaw rhawm ka krax tan pa appong Ref 6:6 Mat 9:13; 12:7.mai khaw rhawm ka daux krax tawng yung ka Siyiex, lheu khaing krax tan pa gleeing khankix heue. 7 Kix hoik lheu ka gumlox sijax mukheu awm Adam mai kix yuh krax pa ang kaux sijax ka Aux heue. 8 Veng Gilat mawh veng ot pui pa yuh pa caox mai mawh pa hoik seeing ka nham heue. 9 Awm jawm cub pui pa tud rhim khankix ti pau ka pui awm an, cub cao giex kaing li tak pah pui yum piang krax hu plak veng Shekhim mai kix hoik lud ka daux ceu pa kied kin heue. 10 Aux hoik yaox ceu pa lhat graung ka daux nyiex ma ceu pui Isarelax, krax lud vao koe ka daux ceu pui Epharem, Isarelax mawh pa hoik koe krax seeing brai heue. 11 Ceu pui Yudax eue, bawg yam vawg nghox mawh pa hoik tat ti deuh ka son maix, yam tawx Aux pui Aux pa giex laung khankix deeh ing heue.