1 Yam kawn mawh Isarelax kawn nyawm, Aux hoik moh ka nawh mai khaing ka daux meung Ejiptux, Aux hoik kok kawn simex tix hoek heue..Ref 11:1 Mat 2:15. 2 Awm hoik kok cao jhai ka kix mai kix nied ti hu singai, kix hoik appong krax tan ka siyiex Balax mai hoik gleeing nyawng bhawng ka riang grang pa hoik saik khankix heue. 3 Aux hoik gau Epharem chix lai ling ti hu, kliien kix ka plawng taix Aux, viang mawh nan, kix ang tawng ka hoik pai aux dee saux kix moi heue. 4 Aux hoik tuk kix ka maox pa awn mai maox krax moh krax rhawm khankix mai aux hoik awm pui an kix, pa teei ieak lih khaing piang ngawg kix mai Aux hoik tawx kix sawm heue. 5 Kix tak ang lai deeh ing ka meung Ejiptux mai pui Asurix tak sang mawh simiang kix, kheu hoik thiang kix ti ang lai deeh hoek ka Aux heue. 6 Lawm vaig lawm pliah tak sang hoek ka daux veng kix mai laux leeing yuh jhong siviex mai laux yuh kix, kheu krax pa keud kix heue. 7 Pui Aux khankix hoik veeh ti hu khaing Aux, viang cao jhai khankix kok yo kix deeh hoek ka Siyiex Cao pa kied ting lhaong kawx, pui khawmuik ang tie yaog min Nawh lhaong heue. 8 Epharem eue, Aux tak sang pon tik maix yuh ka mawx lie? Isarelax eue, aux tak sang pon ap ti tawx maix yuh ka mawx lie? Aux tak sang kieh maix awm veng Adama yuh ka mawx lie? Aux tak sang pon deuh maix awm veng ZeboimRef 11:8 Pi 29:23. yuh ka mawx lie? Rhawm rhi Aux hoik tieh loh tix, krax caux rhawm Aux hoik so tix kaoh heue. 9 Aux tak ang lai song rhawm, Aux tak ang lai yuh Epharem laux leeing heue. Grawh grawng nawh, Aux mawh Siyiex mai ang tie mawh kawn pui, Aux mawh cao pa singax singeh ka daux sigreung pex mai Aux tak ang lai hoek ka pex daux krax pa song rhawm heue. 10 Kix tak hawt ti hu khaix Siyiex heue. Nawh Cao tak graox awm sivai sangsi heue. Yam graox Nawh Cao, kawn praix Nawh khankix tak nied ti lih khaing ka plak glip singaix heue. 11 Kix tak nied ti hoek, awm sim sai khaing meung Ejiptux, awm sikaux pa hoek khaig haktiex Asurix heue. Aux tak kieh kix ot ka daux nyiex kix heue. Siyiex ah nin heue.

12 Epharem ah lox pie lhen hawt rob Aux mai nyiex ma ceu pui Isarelax khankix hoik pie lhen ka Aux heue. Yudax ca kawn een rhawm tix ka Siyiex Cao pa singax singeh mai koe krax pa kaux sijax heue.