8
Kha Rhawm Jao Khet
1 Siyiex ah nin ka Mose, “Laig hu ka Pharaw ah nin ka nawh, Siyiex ah nin, kieh pui Aux lih hu, sonsang krub kix ka Aux.
2 Phan maix thiang ti ang kieh kix lih hu, jhak heue, Aux tak tawx krax kha rhawm ka haktiex maix ka khet,
3 rawm klawng Nilax hoik naog ka khet khankix pa tak hoek ka piang maix ka daux lawg mai ka piang ku it pex, ka daux nyiex kawncau maix khankix mai pui maix khankix, daux nyiex priex mai ka daux klong yuh pex blah khankix,
4 “Khet khankix tak haok ka piang maix mai ka piang pui maix mai ka piang kawncau maix khankix.”
5 Siyiex krai ka Mose, “Ah nin ka Arun, nyeu taix tix tau mai khaox grix tix ka piang rawm khankix, piang rawm klawng iak, piang rawm klawng ting mai piang rawm dung khankix mai kieh khet hoek naog ka piang haktiex Ejiptux”
6 Arun nyeu taix tix ka piang rawm khankix daux meung Ejiptux, mai khet khankix lih kheem ka haktiex Ejiptux.
7 Cao chix simeed khankix kawx yuh awm pa chix tix mai viex khet khankix hoek ka piang haktiex Ejiptux.
8 Pharaw kok ka Mose mai Arun ah nin, “Khyox khaw ka Siyiex, sonsang deeh teei Nawh khet khankix hu singai khaing aux mai khaing pui aux, mai aux tak kieh pui in khankix hu krub ka Siyiex.”
9 Mose ah nin ka Pharaw, “Tat bawg yam pa sang khyox khaw aux son maix, son kawncau maix mai son pui maix, sonsang deeh yuh aux khet khankix laux leeing khaing maix mai khaing nyiex ma pex khawmuik mai deeh kieh kix ot ka daux rawm klawng Nilax khaing.”
10 Pharaw ah nin, “Kyox khaw pasax.” Mose ah nin, “Kieh awm pa ah maix, maix tak tawng Siyiex yix ang doh awm siyiex tang dah awx.
11 Khet khankix tak lih hu khaing maix khaing daux nyiex ma maix, khaing kawncau maix khankix mai khaing pui maix, kix tak ot daux rawm klawng Nilax khaing.”
12 Mose mai Arun lih hu khaing Pharaw, mai Mose kok yo ka Siyiex, son grawng khet khankix, pa hoik kieh Nawh tuktiak ka Pharaw.
13 Siyiex yuh awm pa khyox khaw Mose, khet khankix yum, daux nyiex daux yaong khankix mai daux kaung khankix.
14 Kix khrawm mai pum ti deuh mai haktiex hoik sioe cux.
15 Yam yaox Pharaw ka hoik yiien ceu an khankix, nawh deeh kiien rhawm mai ang nghiet lox kix, awm pa hoik krai Siyiex heue.
Kha Rhawm Jao Maing
16 Siyiex krai ka Mose, “Ah nin ka Arun, nyeu khaox grix maix mai lah ka phawng tiex piang tiex mai an tak lih ti mawh maing, ka daux haktiex Ejiptux khawmuik”
17 Kiex yuh awm an, Arun nyeu taix tix tau mai khaox grix tix mai lah ka phawng tiex mai an lih ti mawh maing ka piang pui mai piang khawng brie khawmuik mai phawng tiex lih mawh maing ka daux haktiex Ejiptux khawmuik.
18 Cao simeed khankix coca ti yuh an awm pa chix tix, viang mawh nan, kix ang pon yuh, mawh kheu nan, Maing hoik lih koe piang pui mai totiag.
19 Cao simeed khankix ah nin ka Pharaw “In mawh gien taix sibrawm Siyiex. “Viang mawh nan Pharaw ca kawn kiien rhawm, nawh ang nghiet ka lox kix awm pa krai Siyiex.
Kha Rhawm Jao Prawp
20 Siyiex ah nin ka Mose, “Kaoh caocao ponngawb mai hu pau Pharaw yam hoek hu nawh ka rawm klawng ah nin ka nawh, Siyiex ah nin, “Kieh pui Aux lih hu, sonsang krub kix ka Aux.
21 Phan maix ang kieh pui Aux khankix lih hu, Aux tak ploi phung prawp khankix hoek ka piang maix, ka piang kawncau maix, ka piang pui maix, ka nyiex ma maix khawmuik, nyiex ma pui Ejiptux tak naog ka phung prawp mai ka piang tiex dee cung kix.”
22 “Ka daux singaix an, Aux tak gwieh ti deuh haktiex Goshen ka dee ot pui Aux mai phung prawp tak ang koe tan, sonsang tawng maix ka mawh Aux Siyiex daux sigreung haktiex.
23 “Aux tak yuh mhai pa daox am sinax pui Aux mai pui maix, mhai pa daox am in tak lih mawh pasax. “”
24 Siyiex yuh ceu in, mai phung prawp khankix hoek ka daux nyiex Pharaw mai ka daux nyiex kawncau nawh khankix mai ka daux haktiex Ejiptux khawmuik hoik laux leeing ka jao phung prawp.
25 Pharaw kok ka Mose mai Arun ah nin, “Hu heue, krub ka Siyiex pex ka daux haktiex in.
26 Mose ah nin, ang khaw ti yuh nan, mawh kheu ceu pa tan ka Siyiex mawh ceu pa seeing brai pui Ejiptux khankix kah, phan yix tan ceu pa seeing brai pui Ejiptux khankix ka sivoe ngai kix, kix tak dheem yix ka simaox ang mawh lie?”
27 “Yix caw ti hu loe singaix krax ka daux tiag mai tan ka Siyiex yix, awm pa hoik tawm Nawh Cao ka yix.”
28 Pharaw ah nin, “Aux tak kieh pex hu krub Siyiex pa mawh Siyiex pex, ka daux tiag, mawh ngie ang pex yaox ti hu dee singai khaing. Khyox khaw son aux liak.”
29 Khaix an Mose ah nin, “Aux lih hu khaing maix mai aux tak rawg bwan ka Siyiex, sonsang lih hu phung prawp an khankix khaing maix pasax, khaing kawncau maix mai khaing pui maix khankix, viang mawh nan, maix paw lai baox pie lhen, son ang maix ploi pui khankix hu krub ka Siyiex.”
30 Mose lih hu khaing Pharaw mai rawg bwan ka Siyiex.
31 Siyiex yuh awm lox pa rawg Mose mai grheu phung prawp khankix khaing Pharaw, khaing kawncau nawh mai khaing pui nawh khankix, tom ang lai deuk tix mu kawx.
32 Pharaw baox nie kiien rhawm yam in mai nie ang ploi pui khankix hu heue.