7
1 Siyiex ah nin ka Mose, “Jhak heue, Aux tak kieh maix awm Siyiex ka Pharaw, mai puxke maix Arun tak mawh cao jhai maix.
2 Maix tak krai gumlox pa hoik tawm Aux ka maix khawmuik, mai puxke maix Arun tak krai ka Pharaw sonsang ploi nawh pui Isarelax khankix lih khaing haktiex nawh.
3 Aux tak kieh Pharaw kiien rhawm mai kieh mhai rug pa daox am Aux khankix, nie baox haoh hun ka daux haktiex Ejiptux.Ref 7:3 Cau 7:36
4 Pharaw tak ang nghiet ka lox maix, Aux tak deuh taix tix ka piang Ejiptux mai viex kru naing tix mai pui ceu Aux pa mawh kawn praix Isarelax khankix, lih khaing Ejiptux tau mai pa ciyang pa ting lhaong.
5 “Pui Ejiptux khankix tak tawng mawh Aux Siyiex, yam nyeu Aux taix tix ka piang Ejiptux mai viex pui Isarelax lih khaing sinax kix.
6 Mose mai Arun hoik yuh awm pa tawm Siyiex ka kiex.
7 Mose koe ju tixdaix num mai Arun koe ju tixdaix loe num, yam sikah kiex ka Pharaw.
Khaox Gix Mose
8 Siyiex ah nin ka Mose mai Arun,
9 “Yam ah Pharaw yuh nin ka pax, “Jhi aux yaox mhai pa daox am yuh pax, “khaix an maix tak ah nin ka Arun, “Teei khaox grix maix mai ploi sivoe ngai Pharaw mai an tak lih mawh siuing”
10 Mose mai Arun laig hu ka Pharaw mai yuh awm pa hoik tawm Siyiex mai Arun ploi khaox grix tix sivoe Pharaw mai kawncau nawh khankix mai an lih mawh siuing.
11 Khaix an Pharaw kok ka pui koe pingnya mai cao chix simeed mai kix pa chix sat ka daux meung Ejiptux kawx hawt yuh awm pa hoik yuh kiex.
12 Mawh kheu kix ku kaux ploi khaox grix tix mai an khankix lih mawh siuing. Viang mawh nan, khaox grix Arun bleet ka khaox grix cie kix.
13 Pharaw ca kawn koe rhawm kien mai nawh ang nghiet ka lox kix, awm pa hoik krai Siyiex heue.
Rawm Lih Mawh Nham
14 Siyiex ah nin ka Mose, “Pharaw kied kiien rhawm mai nawh thiang ang kieh pui khankix hu.
15 “Hu ka Pharaw plak ponngawb, yam lih hu nawh ka daux rawm mai maix krox nawh ka praok rawm klawng mai giex khaox grix pa hoik lih ti mawh siuing ka daux taix maix.
16 Maix tak ah nin ka nawh, Siyiex ceu pui Hebrie, ploi aux hoek ka maix mai kieh aux ah nin, “Kieh pui Aux hu, sonsang krub kix ka Aux daux tiag, tom yam in maix ang nyang cu tix nghiet.”
17 Siyiex ah nin, “Mawh kheu maix tak tawng Aux mawh Siyiex, jhak heue, aux lah rawm klawng Nilax ka khaox grix pa koe daux taix tix mai rawm an tak lih mawh nham.Ref 7:17 Jhi 16:4
18 Kax pa koe daux rawm klawng Nilax khankix tak yum mai rawm klawng Nilax tak lih sioe cux mai pui Ejiptux khankix, tak seeing nyaux ka rawm klawng an. “”
19 Siyiex ah nin ka Mose, “Krai ka Arun, teei khaox grix maix mai nyeu taix tix ka piang rawm Ejiptux mai ka piang klawng iak, ka piang klawng ting, ka piang rawm nhawng mai ka piang rawm dung rawm daux, kudah dee daux haktiex Ejiptux mai ka daux tawg khaox, aw simaox”
20 Mose mai Arun yuh awm lox tawm Siyiex, nawh yaog khaox grix tix mai lah ka rawm Nilax ka plak sivoe ngai Pharaw mai sivoe ngai kawncau nawh khankix, rawm khawmuik pa koe daux rawm klawng Nilax tieh ti mawh nham khawmuik heue.
21 Kax pa koe daux rawm klawng Nilax yum mai rawm klawng Nilax lih sioe cux, mawh kheu nan, pui Ejiptux khankix ang lai pon nyaux rawm khaing daux rawm klawng Nilax, mawh kheu hoik lih naog nham ka daux haktiex Ejiptux kudah dee.
22 Cao chix simeed daux haktiex Ejiptux khankix kawx, yuh awm cuyi pa chix kix, mai rhawm rhi Pharaw nied ti kiien mai ang nghiet ka lox kix, awm pa hoik krai Siyiex.
23 Pharaw veeh ti ing ka nyiex tix mai nawh ang deuh koe ceu koe mu ka daux rhawm tix.
24 Mawh kheu nan, pui Ejiptux khankix, kaong rawm daux hawt rawm klawng Nilax. Sonsang nyaux kix kah, mawh kheu ang kix lai pon nyaux ka rawm khaing rawm klawng Nilax.
25 Yam hoik luan aliah singaix khaix lah Siyiex ka piang rawm klawng Nilax heue.