Khawng Brie 1 Khaix an Siyiex ah nin ka Mose, Laig hu ah nin ka Pharaw, “Siyiex, pui Hebrie ah nin, ” “Kieh pui Aux lih hu, sonsang krub kix ka Aux. 2 “Phan maix kawn thiang ang kieh kix lih hu, 3 Jhak heue, Taix Siyiex tak hoek tau mai jhawm saux preng, ka piang khawng brie pex daux kaung, brung, la, kala-uk, mawie mai yung khankix. 4 Siyiex tak yuh ceu pa tang pa siyox sinax khawng brie pui Isarelax mai khawng brie pui Ejiptux khankix, mawh kheu nan, khawng brie pui Isarelax tak ang yum tix mu kawx. 5 Siyiex krai ti deuh bawg yam ah nin, “Pasax Siyiex tak sang yuh ceu in khankix ka daux haktiex in.” 6 Ka daux pasax Siyiex yuh ceu in khankix mai kieh khawng brie pui Ejiptux yum khawmuik, viang mawh nan, khawng brie pui Isarelax khankix ang yum tix mu kawx. 7 Pharaw ploi pui hu jhak mai tawng ka ang khawng brie pui Isarelax khankix yum tix mu kawx, viang mawh nan, rhawm rhi Pharaw ca kawn kiien mai ang cu ti ploi pui khankix lih hu heue.

8 Siyiex ah nin ka Mose mai Arun, “Teei nyaox tix dawm khaing glah ngu mai kieh Mose rhuat plak raoma ka sivoe ngai Pharaw. 9 “Phawng nyaox an tah ka daux haktiex Ejiptux khawmuik mai an lih mawh jhawm saux muad ka piang pui mai khawng brie ka daux meung Ejiptux kudah dee.” 10 Kix teei nyaox khaing glah ngu mai cung ka sivoe Pharaw mai Mose rhuat nyaox an plak raoma mai lih mawh jhawm saux muadRef 9:10 Jhi 16:2 ka piang pui mai khawng brie khankix. 11 Cao chix simeed ang lai pon cung sivoe Mose jao jhawm saux muad, mawh kheu jhawm saux muad koe ka piang cao chix simeed mai ka piang pui Ejiptux khawmuik. 12 Siyiex kieh rhawm Pharaw kiien mai nawh ang nghiet ka lox kix, awm hoik krai Siyiex ka Mose.

13 Khaix an Siyiex ah nin ka Mose, “Kaoh ponngawb caocao mai cung ka sivoe Pharaw ah nin ka nawh, “Siyiex pui Hebrie ah nin, “Kieh pui Aux lih hu, sonsang tan krub kix ka Aux. 14 “Mawh kheu yam in Aux tak ploi ceu pa kha rhawm khawmuik, ka daux rhawm rhi maix, ka piang kawncau maix mai ka piang pui maix, sonsang tawng maix ang pui pa awm Aux koe tix kaux kawx ka daux haktiex in khawmuik. 15 “Mawh kheu yam in Aux nyeu taix tix mai yuh krax kha rhawm ka maix mai pui maix khankix, ka jhawm saux preng mai tat maix grai grup khaing haktiex, 16 “Viang mawh nan, grawng pa kieh Aux maix im ju mawh sonsang jhi Aux maix yaox sibrawm tix daux maix mai sonsang ao min Aux ka daux haktiex in khawmuik.Ref 9:16 Ro 9:17 17 Tokaux maix kawn kiien rhawm mai nunai ka pui Aux mai ang ploi kix hu. 18 Pasax bawg yam in, Aux tak kieh pre ting lih ka daux meung Ejiptux, pa ang sax koe tom yam jah haktiex Ejiptux ti kaw tix, tom hoek in singaix. 19 “Ploi pui maix hu khrawm khawng brie pa koe daux kaung khankix, sonsang luad luan. Mawh kheu pre tak sang lih ka piang pui ku kaux mai khawng brie pa ot daux kaung pa ang nyang khrawm hoek ka nyiex khawmuik, kix tak yum.” 20 Can pui pa lhat ka gumlox Siyiex, ka sinax kawncau Pharaw, kieh siliex tix mai khawng brie nied to ti ing ka nyiex. 21 Viang mawh nan, pui pa ang deuh gumlox Siyiex koe ceu, prah siliex mai khawng brie tix daux kaung. 22 Siyiex ah nin ka Mose, “Nyeu taix maix ka plak raoma, sonsang lih pre ka daux haktiex Ejiptux khawmuik, ka piang pui, ka piang khawng brie mai ka piang khaox ox rib riem pa koe daux kaung, kudah dee ka daux haktiex Ejiptux.” 23 Mose nyeu khaox grix tix ka plak raoma mai Siyiex ploi lox sinum praix, pre mai ngu lih ka piang haktiex. Siyiex kieh lhiex mai pre lih ka piang haktiex Ejiptux, 24 Pre pa khao mai nguRef 9:24 Jhi 8:7; 16:21 pa kied kin ting lih, pa ang sax koe daux haktiex Ejiptux tix bawk kawx, jah tom yam mawh nawh meung haktiex tix mu. 25 Pre khankix dheem ka can pa koe ka daux haktiex Ejiptux, can pa koe daux kaung, pui, khawng brie, rib riem mai kieh khaox ox khankix goh. 26 Mawh ngie daux haktiex Goshin, dee ot pui Isarelax khankix, pa ang lhiex pre lih kah. 27 Pharaw ploi pui hu, kok ka Mose mai Arun ah nin ka kiex, “Yam in aux hoik lud, Siyiex mawh pa rahsee, pui aux khankix mai aux hoik mawh pa lud.” 28 Rawg bwan ka Siyiex, kieh naox heue, son ang sinum praix mai pre khankix baox lih, aux tak kieh pex lih hu, pex tak ang lai yaox ti ot ka meung in.” 29 Mose ah nin ka nawh, “Khaix hoik lih aux khaing daux veng, aux tak yaog taix tix ka Siyiex mai lox sinum praix tak yiien yawg. Pre khankix kawx, tak ang lai baox koe, sonsang tawng maix haktiex in mawh cie Siyiex.” 30 “Viang mawh nan, son maix mai kawncau maix khankix, aux tawng ang pex nyang lhat graung ka Siyiex tom yam in.” 31 Yam in khaox gan mai nghox ca khankix hoik laux leeing. Grawh grawng nawh, nghox ca hoik kaux mai khaox gan khankix kawx, hoik pruh tai. 32 Nghox ca mai pang nghox khankix, ang nyang bax laux leeing, kheu mawh plix nghox pa lha khaing paox tix. 33 Mawh kheu nan Mose lih hu khaing Pharaw daux veng mai yaog taix tix lih ka Siyiex. Khaix an lox sinum praix pre khankix yiien. Mai lhiex ang lai lih ka piang tiex. 34 Yam hoik yaox Pharaw ka hoik yiien lhiex pre mai lox sinum praix khankix, nawh deeh baox lud mai rhawm rhi nawh deeh kiien tau mai kawncau nawh khankix. 35 Mawh kheu nan, rhawm rhi Pharaw baox kiien mai nawh ang kieh kawn praix Isarelax khankix lih hu, awm gumlox pa hoik krai Siyiex ka Mose heue.