6
1 Siyiex ah nin ka Mose, “Yam in maix tak yaox ka pa yuh Aux ka Pharaw, mawh kheu taix pa ting sibrawm Aux nawh tak ploi kix hu tau mai taix pa koe sibrawm Aux, nawh tak grheu kix lih khaing haktiex.”
2 Siyiex ah nin ka Mose, “Aux mawh Siyiex.”
3 Aux lih bleeh ka Abraham, ka Icak mai ka Yakop, awm mawh Aux Siyiex pa ting riang rao, Ref 6:2-3 Lih 3:13-15. viang Aux jhi kix ka ceu kaux Siyiex kawx, kix ang tawng ka aux.
4 “Aux hoik yuh sijax mukheu tau mai kix, sonsang tawx Aux haktiex Khanan ka kix, pa mawh haktiex dee lailing kix ti mawh nyo sinie.
5 Aux mhong ka lox ngia pui Isarelax khankix, pa kieh pui Ejiptux kix yuh kaing pa kin mai deeh doh keud ka gumlox sijax mukheu tix.
6 “Mawh kheu nan, ah nin ka pui Isarelax, Aux mawh Siyiex, Aux tak viex pex lih khaing greem beeh glawm pa kin khaing pui Ejiptux mai Aux tak taoh pex khaing kaing siliex pa yuh pex mai nyeu plawng taix tix taoh pex khaing krax pa ting ciyang”.
7 “Aux tak teei pex mawh pui tix mai Aux tak mawh Siyiex pex, pex tak tawng Aux mawh Siyiex pa viex pex lih khaing greem beeh glawm pa kin yuh pui Ejiptux”.
8 “Aux tak viex pex hu ka daux haktiex, pa hoik tiextu Aux ti tawx ka Abraham, Icak mai Yokop, Aux tak tawx haktiex an mawh sinngao pex. Aux mawh Siyiex”
9 Viang Mose ah nin ka pui Isarelax kawx, kix ang nghiet ka lox Mose, mawh kheu hoik kied taug mao rhawm rhi kix ka yaox tix krax kha rhawm.
10 Siyiex ah nin ka Mose,
11 “Hu laig mai krai ka Pharaw, simiang Ejiptux, sonsang ploi pui Isarelax khankix lih hu khaing haktiex nawh.
12 Mose ah nin, pui Isarelax ang nghiet ka lox aux, Pharaw nie sang nghiet ka lox pa lih khaing jheeh aux, pa ang nyang pat hak tix yuh ka mawx?
13 Siyiex tawm lox ka Mose mai Arun, son pui Isarelax mai ka Pharaw meung Ejiptux, sonsang teei kix pui Isarelax khankix lih khaing daux haktiex Ejiptux heue.
Nyiex Ma Mose Mai Arun
14 Inkix mawh cao kaing daux nyiex ma keeing kix, kawn Ai Isarelax mawh Rubin, kawn simex Rubin khankix mawh Hanok, Phalux, Hezaron mai Khamix. Inkix mawh pui nyiex ma Rubin.
15 Kawn simex Simion khankix mawh Yemoelax, Yamen, Awhat, Yakhin, Zawha mai Shawlax, kawn simex pa pon khaing bun Khanan, inkix mawh pui nyiex ma Simion.
16 Inkix mawh ceu kaux kawn simex Lewix, awm pa koe doeh ru kix, pa mawh Geshon, Kawhat mai Merarix. Ju Lewix koe tix yieh tixngoe aliah num.
17 Kawn simex Geshon khankix mawh Libanix mai Shimix, awm pa koe doeh ru nyiex ma kix.
18 Kawn simex Kawhat khankix mawh Amaran, Izaha, Hebaron mai Awzalax mai ju Kawhat koe tix yieh tixngoe loe num.
19 Kawn simex Merarix khankix mawh Mahalix mai Mushi, inkix mawh pui daux nyiex ma Lewix, awm pa koe doeh ru kix.Ref 6:16-19 1Been 6:16-19.
20 Amaram teei moeng ti Yawkhebiet, pa mawh nan keeing tix mai nawh keh Arun mai Mose, ju Amaram koe tix yieh tixngoe aliah num.
21 Kawn simex Izaha khankix mawh Korax, Nephiet mai Zikharix.
22 Kawn simex Awzalax mawh Mishelax, Elazapha mai Titirix.
23 Arun teei ti moeng Elishebax, kawn bun Aminadat nan Nashon, nawh keh Nadat, Abihux, Elaza mai Itama.
24 Kawn simex Korax khankix mawh Asirax, Elakanax mai Abiasap, inkix mawh doeh nyiex ma Korax.
25 Kawn simex Arun, Elaza teei ti moeng kawn bun Putelax mai keh Phinahat, inkiex mawh cao kaing keeing ceu pui Lewix khankix, awm pa koe doeh nyiex ma kix.
26 Inkiex mawh Arun mai Mose, pa hoik krai Siyiex, pa viex ceu pui Isarelax lih khaing haktiex Ejiptux awm cao kaing naing lien.
27 Inkiex mawh pui pa laig hu sikah ka Pharaw simiang Ejiptux, sonsang viex pui Isarelax khankix lih hu khaing meung Ejiptux pa mawh Mose mai Arun heue.
Arun Sikah Tang Mose
28 Ka daux singaix yam sikah Siyiex ka Mose ka daux haktiex Ejiptux,
29 Siyiex ah nin ka Mose, “Aux mawh Siyiex, krai ka Pharaw simiang Ejiptux, can pa krai Aux ka maix.”
30 Mose ah nin ka Siyiex, “Aux mawh pui pa cien jheeh mai pa kle, Pharaw tak sang nghiet lox aux yuh ka mawx?”