5
Mose Mai Arun Hu Ka Pharaw
1 Mose mai Arun hu ah nin ka Pharaw, “Siyiex pui Isarelax ah nin, kieh pui Aux Isarelax hu sonsang yuh kix pawie ka Aux, daux tiag”
2 Pharaw ah nin, “Mawh Siyiex pa yuh ka mawx! pa sang nghiet aux lox mai sonsang ploi pui Isarelax lie? Aux ang tawng ka Siyiex mai aux tak ang pon ploi kix hu.”
3 Kix ah nin, “Siyiex ceu pui Hebrie hoik sipub ka yix, kieh yix hu krax daux tiag loe ngaix mai rawg bwan tan ka Siyiex tix, phan ang mawh nan, Nawh Cao tak kieh jhawm saux preng mai lawm vaid hoek ka piang yix.”
4 Simiang Ejiptux ah nin ka kix, “Mose mai Arun eue, yuh ka mawx pex lai sang teei pui inkix khaing kaing pa yuh kix? Deeh hu yuh kaing jhaw pa yuh pex.
5 Pharaw ah nin, “Jhak heue, yam in pui haktiex khankix tom nie mai pex lai sang kieh kix laux ti khaing kaing jhaw pa yuh ti.
6 Daux tix ngaix an Pharaw tawx lox tix hu ka cao thung cao bung kaing jhaw khankix ah nin,
7 “Pex tak ang lai yaox ti tawx brex nghox sonsang yuh kix lon tiex sin awm sivoe, kieh kix tang hu sawg brex nghox son cao tix.
8 “Kieh kix yuh lon tiex sin awm diag yuh kix sivoe, paw doh kieh yawm ceeix kawx, mawh kheu nieh kix, kix tom riag yo ah nin, kieh yix hu krub ka Siyiex tix,
9 Baox tawx kaing tom nie ka piang kix sonsang nie taug mao kix mai paw kieh kix nghiet ka lox pa ang mawh.”
10 Cao thong cao bung kaing jhaw khankix hu ah nin ka pui khawmuik, Pharaw ah nin, aux ang lai tawx brex nghox ka pex.
11 “Hu sawg brex nghox ka dee yaox pex son cao tix, viang mawh nan kaing jhaw pex tak ang pon tix yawm ceeix kawx”
12 Pui khankix hu ku sidah ka daux haktiex Ejiptux, sonsang khrawm nyhee tang brex nghox.
13 Cao thung cao bung kaing jhaw khankix ah nin, “Nied yuh kaing jhaw yuh pex grum naog ku singaix yam koe brex nghox.”
14 Cao thung cao bung kaing jhaw pui Isarelax khankix pa hoik yaog Pharaw kix mawh cao kaing, kix khin mai tawk ka kix mai chawk kix ah nin, “Kheu pex ang lai pon yuh lon tiex sin grum naog awm diag pa yuh glang ka in kawx mai singaix.”
15 Yam an cao thung cao bung kaing jhaw pui Isarelax khankix hoek mai riag yo ka Pharaw ah nin, “Maix lai tawx kaing jhaw pa yuh nin ka kawncau maix yuh ka mawx?”
16 Kix ang lai tawx brex nghox ka kawncau maix, kix ah nin ka yix, yuh lon tiex sin, jhak heue, kix tawk ka kawncau maix khankix, yam in phimap koe ka piang pui maix.
17 Nawh ah nin, “Pex kied sidaing nieh, mawh kheu nan, pex tom ah nin, kieh yix hu krub ka Siyiex
18 “Hu yuh kaing yam in, Brex nghox tak ang tawx ka pex, viang mawh nan, pex tak yaox ti tawx lon tiex sin awm diag prim.”
19 Cao kaing pui Isarelax khankix yaox ka hoek krax pa kha rhawm ka piang tix kheu pa ah nin, “Pex tak ang yaox ti kieh lon tiex sin yuh tix yawm khaing diag prim.”
20 Yam hoik lih kix khaing Pharaw, kix sipub Mose mai Arun pa cung ti rieb kix,
21 Kix ah nin ka kiex, “Kieh Siyiex jhak mai prawng ca ka piang pax, mawh kheu hoik kieh yix seeing brai ka sivoe ngai Pharaw mai sivoe ngai kawncau nawh khankix, sonsang pah ka yix heue.”
Isarelax Pon Krax Luat Luan
22 Mose deeh hoek ka Siyiex ah nin, “Siyiex eue, Maix Cao lai yuh krax pa kha rhawm ka piang ceu pui in yuh ka mawx? Maix Cao lai ploi aux hu yuh ka mawx?
23 Tom singaix jah aux ti hoek krai lox ka Pharaw ka daux ceu kaux Maix Cao, Pharaw tawx krax kha rhawm ka pui inkix, Maix Cao ang taoh ka pui cie Maix heue.”