36
1 Bezalelax mai Ahawliba mai can pui pa chix yuh kaing taix awm pa koe piangnya cuyi kix, pa hoik sau Siyiex pingnya daux rhawm kix mai pa chix keud yuh, sonsang tawng kix ti yuh kaing khawmuik mai son kaing jhaw dee pa singax singeh, kix tak yuh an awm lox tawm Siyiex.”
Pui Khankix Viex Kraung Tan Tom Nie
2 Mose kok ka Bezalelax, Ahawliba mai can pui pa chix yuh kaing taix ku kaux, pa hoik tawx Siyiex pingnya daux rhawm kix mai pui ku kaux pa ceh rhawm rhi ti yuh kaing khankix hoek ti yuh kaing.
3 Kix rieb ti teei kraung pa tan ceu pui Isarelax khankix khaing Mose, pa mawh kraung pa viex kix hoek, son kaing jhaw pa sang yuh kix dee pa singax mai kix baox viex kraung pa tan hoek awm pa koe rhawm kix ku ngawb.
4 Khaix an can pui pa yuh kaing taix khankix mai pa yuh kaing kuceu, son dee pa singax singeh hoik naox kaing jhaw pa yuh tix mai tang ing kaux mawx kaux an,
5 mai kix hoek krai ka Mose ah nin, “Pui khankix hoik viex pa nie lheu khaing pa kub shiao ex son kaing jhaw pa hoik tawm Siyiex ka ex.”
6 Mose tawx lox kieh kix krai pao pui pa ot daux nyiex bang mhong ah nin. “Simex ang ah, bun ang ah, paw lai baox viex kraung pa tan dee pa singax singeh hoek.” Pui khankix deeh yoi khaing krax tan tix.
7 Grawh grawng nawh, kraung pa pon kix, hoik kub hoik naog son kaing pa sang yuh kix khawmuik hoik nie tete heue.
Sum Nyiex Gox Bwan Man
(Lih 26:1-37)
8 Can pui pa chix yuh kaing kuceu daux sinax kix pa mawh pui pa koe pingnya daux rhawm khankix, yuh man tie kao plah ka man pa hoik taing ti ka keei ceu pa mhawm, pa mawh man pa klai raoma, man lung pliex mai man pa raoh rawt mai kix yuh riang grang Cherubin ka piang man an, awm pa chix yuh kix.
9 Krax lang man tie ku plah koe tixnga daix sawk, krax vieh koe pon sawk mai man tie an sidu tau khawmuik.
10 Kix kleuk ti caing man tie an phwan pheen lih mawh tix pheen mai baox kleuk ti caing pa deuk an phwan pheen mawh tix pheen.
11 Nawh yuh daux jhup maox koe ka praok man tie ka man pa klai raoma see dee sitoe kix ti caing ku pheen, awm pa hoik yuh ka piang praok ka praix man tie an tix pheen, pa mawh man tie ra pheen tix pheen.
12 Nawh yuh daux jhup maox koe tixphwan daux, ka piang man tie tix pheen mai baox yuh daux jhup maox koe tixphwan daux ka praok plak laong ka man tie an ra pheen tix pheen mai kieh daux jhup maox an lai giex man tie an tix pheen hoik tix pheen.
13 Nawh yuh grok vhak khri tixphwan mu mai brawm man tie an tau ka kraung pa vhak an, sonsang lih ti mawh nyiex gox bwan man tix lhang.
14 Nawh yuh man tawb braux nyiex gox bwan man ka hak pex mai yuh koe kao tix pheen.
15 Krax lang man tawb braux an ku mu, koe tixngoe sawk mai krax vieh koe pon sawk, man tawb braux an kao tix pheen, mawh pa sidu tau.
16 Nawh kleuk ti caing man tie an phwan pheen lih mawh tix pheen mai man tieb an liah pheen baox kleuk mawh tix pheen tau.
17 Nawh yuh daux jhup maox koe tixphwan daux ka piang praok man tie an see plak praix tix pheen mai nawh baox yuh daux jhup maox koe tixphwan daux ka piang praok man tie an pa mawh ra pheen tix pheen.
18 Nawh baox yuh grok ka tawng tixphwan mu, sonsang kleuk man tawb nyiex gox bwan man tau mai kieh mawh tix lhang khaing.
19 Nawh yuh pa tawb braux nyiex gox bwan man ka hak yung pa hoik siang raoh mai deeh yuh pa tawb piang an ka hak phix.
20 Son nyiex gox bwan man, nawh yuh phia jung ka khaox Akashax khawmuik.
21 Krax lang phia ku plah koe kao sawk mai krax viex ku plah koe tix sawk mai tix diex.
22 Phia ku plah kieh kawp tix ka lat ra mu, sonsang kleuk paox tix, mawh kheu nan nawh yuh phia an khankix son nyiex gox bwan man awm paox tix.
23 Nawh baox deeh yuh khaox phia khankix son nyiex gox bwan man tixnga plah, son pa sang sau ka plak seh.
24 Nawh yuh daux jhup jaong tixpon mu ka mau mai kieh koe greem khaox phia an tixnga plah. Ka greem phia tix plah kieh daux jhup jaong koe ra mu, son lat ra mu mai daux jhup jaong ra mu ka greem phia an tix plah mai son lat ra mu.
25 Son plak laong nyiex gox bwan man pa koe plak an tix plak, nawh yuh phia koe tixnga plah,
26 daux jhup jaong an khankix tixpon mu, pa yuh tix ka mau. Kieh daux jhup jaong koe ra mu greem phia tix plah mai baox kieh daux jhup jaong koe ra mu ka phia an tix plah.
27 Son plak klip singaix nyiex gox bwan man, nawh yuh phia koe liah plah.
28 Nawh baox deeh yuh phia ra plah son daog plak khaix nyiex gox bwan man khankix khawm ra daog.
29 Deeh kleuk an khankix ka plak greem mai ka plak toh tau ka daux jhup tix mu, mawh kheu nan nawh yuh ceu an khawm ra, son ra daog.
30 Phia koe daix plah, khawm daux jhup jaong hankix kao liah daux pa yuh ka mau mai kieh daux jhup jaong koe ra mu ka greem phia an khankix ku plah.
31 Nawh yuh khaox jhong pa sang chup ka khaox Akashax tix plak phwan gawng pa sang chup ka phia an khankix,
32 mai nawh baox yuh khaox jhong phwan gawng pa sang chup tix ka khaox phia an khankix son praok nyiex gox bwan man ka plak an tix plak mai khaox jhong pa sang chup tix ka phia an phwan gawng son praok pa koe ka plak klip singaix.
33 Nawh yuh khaox jhong pa sang chup tix ka daux sigreung phia an khankix, sonsang chix laig tom hoek ka toh an tix plak mai plak an tix plak.
34 Nawh om phia an ka rawm khri mai yuh daux jhup khankix ka khri, sonsang ra lai giex khaox jhong pa hoik chup tix tau, nawh deeh om khaox jhong pa hoik chup an ka khri.
35 Nawh yuh man tie pa taing tix pheen ka man pa klai raoma mai man lung pliex mai man raoh rawt pa hoik taing ka keei ceu pa mhawm. Man an khankix hoik taing tix ka grawng pa chix keud ti mai kix yuh riang grang Cherubin ka piang.
36 Nawh yuh rong khaox pon mu, ka khaox Akashax mai om ka khri, khawm grok khri pa koe ka rong mai deeh raug daux jhup jaong pon mu ka mau son rong an khankix.
37 Nawh baox deeh yuh man tie diang siviex nyiex gox bwan man tix pheen, ka man pa hoik taing tix pa mawh man klai raoma mai man lung pliex mai man raoh rawt mai man pa taing ti ka keei ceu pa mhawm khaing cao pa taing man tix kaux,
38 kieh rong khaox an phwan mu grum tau mai grok nawh khankix mai nawh om kaing rong an khankix mai toh lat ka khri, viang mawh nan, daux jhup jaong phwan mu yuh ka tawng heue.