35
Grawng Been Singaix Twah
1 Mose kraix khrawm cub pui hun ceu pui Isarelax khankix ah nin, “Inkix mawh gumlox pa hoik tawm Siyiex ka pex sonsang hawt yuh pex ka.”
2 “Yuh kaing ka daux liah singaix, singaix aliah mawh singaix pa singax singeh mai mawh singaix twah singaix laux lee son Siyiex, can pui pa yuh kaing ka daux singaix an, tak kieh nawh yum.”Ref 35:2 Lih 20:8-11; 23:12; 31:15; 34:21; Krub 23:3; Pi 5:12-14
3 “Maix tak ang pon ti phlu ngu, ka dee ot tix daux singaix twah.”
Krax Tan son Nyiex Gox Bwan Man
(Lih 25:1-9)
4 Mose krai ka cub pui hun ceu pui Isarelax khankix ah nin, “In mawh ceu pa hoik tawm Siyiex.
5 Ka daux pex pa sang tan son Siyiex, can pui pa koe rhawm rhi kieh nawh viex an khankix hoek tan ka Siyiex, can pa mawh khri mau mai tawng,
6 man pa klai raoma, man lung pliex, man raoh rawt, man keei ceu pa mhawm mai hauk pex khankix.
7 Hak yung mhaing pa siang tix raoh, hak phix mai khaox Akashax,
8 “Bee tok mai bee groi mai ceu pa sioe bhawng son nyawng bhawng pa sang gleeing,
9 “Siang simaox bawd raoh mai siang simaox tang ceu khankix pa sang sau daux kraung ceep sibex dhah dawd taix mai ka daux man tie naok heue.”
Kraung Shiao Son Nyiex Gox Bwan
(Lih 39:32-43)
10 “Can pui pa koe pingnya ka kaing khawmuik daux sinax pex, tak hoek mai yuh kaing ceu pa hoik tawm Siyiex khawmuik,
11 “Nyiex gox bwan man mai pa tawb ka piang nyiex gox, can ceu gok, khaox phia mai lat mai rong mai daux jhup jaong khankix,
12 “khui bwan sijax mukheu mai khaox glawm mai diep khui bwan dang ngeung krax pa caux rhawm mai man tieb pa sang tie khankix.
13 Pheen mai khaox glawm nawh mai kraung pa shiao khankix mai blah pa khan ka plak sivoe ngai Siyiex,
14 Pang jawk ten khri mai kraung pa shiao tau mai an mai kawk ngu mai bee tok.”
15 “Khu dee tan dee gleeing kix nyawng bhawng mai khaox glawm khankix mai bee groi mai ceu pa sioe bhawng son nyawng bhawng pa sang gleeing mai man tieb diang siviex dee laig kix ka daux nyiex gox bwan man,
16 khu tan dee tan krax tan pa gleeing tau mai grheeng tawng mai khaox glawm nawh mai pa shiao tix khawmuik mai pan khoek khawm caong nawh,
17 man pa sang vhak tix daux biang nyiex gox bwan man mai rong khaox nawh khankix mai jhup jaong daux nawh khankix mai man tie ka diang siviex dee laig kix ka daux biang nyiex gox bwan man,
18 mai lhak nyiex gox bwan man khankix, lhak pa shiao son daux biang nyiex gox bwan mai maox nawh khankix khawm ra plak.
19 Kraung ceep yam yuh cao giex kaing li khankix kaing, ka daux dee pa singax mai kraung ceep pa singax son cao giex kaing li Arun mai kraung ceep son kawn simex nawh khankix yam yuh kix kaing heue.”
Totaix Son Nyiex Gox Bwan
20 Cub pui hun Isarelax khawmuik li hu khaing sivoe Mose.
21 Can pui ku kaux pa ceh daux rhawm rhi mai can pui ku kaux pa koe rhawm khankix, viex krax tan tix ka Siyiex, son pa yuh kix nyiex gox bwan man, bang kum pui hun, grawng kaing jhaw Nawh khawmuik mai son kraung ceep pa singax khankix.
22 Kix khawm simex mai bun, awm pa koe rhawm tix mai kix viex ble, krim meeh, jheep giien mai kong nhang khankix mai kraung khri kraung mau khawmuik, pui ku kaux tawx ceu pa tan pa mawh khri ka Siyiex.
23 Pui ku kaux viex man klai raoma man lung pliex man raoh rawt man pa taing tix ka keei ceu pa mhawm, hauk pex khankix, hak pex pa siang tix raoh mai hak phix khankix hoek.
24 Can pui ku kaux pa tan ka mau mai tawng khankix kawx mai viex hoek sonsang tan ka Siyiex mai pui ku kaux pa koe khaox Akashax khankix viex hoek tawx sonsang shiao ka kaing jhaw Siyiex.
25 Bun pa chix taing khankix, taing man ka taix cao tix, pa mawh man pa klai raoma, man lung pliex mai man raoh rawt tau mai man pa taing tix ka keei ceu pa mhawm khankix hoek.
26 Can bun pa ceh daux rhawm rhi mai pa koe pingnya khawmuik taing hauk pex.
27 Kuad song cao pa kwang piang kix viex siang simaox bawd raoh siang simaox tang ceu khankix pa sang tok kix ka piang kraung ceep sibex dhah dawd taix mai ka piang man tie naok,
28 mai teei ceu pa sioe bhawng yuh nyawng bhawng, bee tok mai bee groi khankix.
29 Ceu pui Isarelax khankix, viex ceu pa tan hoek ka Siyiex, awm pa koe rhawm kix ti tawx, can simex bun pa koe rhawm ti viex kraung kuceu, pa hoik chix yuh kix, son kaing kuceu khawmuik, ka Siyiex kix yuh awm gumlox pa hoik tawm Siyiex ka Mose.
Kaing Taix Son Nyiex Gox Bwan Man
(Lih 31:1-11)
30 Mose ah nin ka ceu pui Isarelax khankix, “Nghiet heue, Siyiex hoik kok ka ceu kaux Bezalelax pa mawh kawn simex Urix, Urix pa mawh kawn simex Hurax, pa mawh doeh ru pui Yudax, ”
31 Nawh hoik naog ka khwan Siyiex, pa kieh koe pingnya mai daux krax pa chix keud yuh mai krax tawng pa chix yuh grawng kaing kuceu,
32 “Kaing pa chix yuh riang grang kuceu ka khri, ka mau mai tawng khankix,
33 pa chix pat chix kleuk ka siang simaox khankix, pa chix saik riang grang ka khaox mai pa min ka grawng kaing kuceu khawmuik.
34 Nawh Cao hoik tawx krax keud krax chix kuceu daux rhawm rhi nawh mai ka Ahawliba kawn simex Ahisamat doeh ru Dan, sonsang deeh chix gau sawn kiex ka pui khankix.
35 Nawh Cao hoik kieh kix grum naog ka pingnya pa chix pa min ka kaing kuceu, son kaing pa saik mai kaing pa chix yuh pakpeung kuceu mai kaing pa chix taing man kuceu, sonsang taing kix man pa klai raoma, man lung pliex, man raoh rawt mai man keei ceu pa mhawm mai kaing krax chix taing pakpeung kuceu khankix heue.”