37
Khwi Bwan Sijax Mukheu
(Lih 25:10-40; 27:1-8; 30:1-10)
1 Bezalelax yuh khui bwan sijax mukheu ka khaox Akashax, krax lang koe ra sawk mai tix diex, krax vieh koe tix sawk mai tix diex, krax lhaong koe tix sawk mai tix diex.
2 Nawh om khri naw plak daux mai plak praix mai kawb rhang khri ka hawt vung viang gawng nawh khawmuik.
3 Nawh raug daux jhup khri pon mu, sonsang sau nawh ka daog khui pon daog, daux jhup khri an sau tix plak ra mu.
4 Nawh yuh khaox glawm ka khaox Akashax mai om khri ka piang an.
5 Nawh sau khaox glawm an ka daux jhup khri pa koe ka praok khui bwan, sonsang pon klawm kix ka khui bwan an.
6 Nawh baox deeh yuh dangngeung krax pa caux rhawm ka khri nawnaw, krax lang koe ra sawk mai tix diex krax vieh koe tix sawk mai tix diex.
7 Nawh yuh riang Cherubin ra mu ka khri pa hoik raug tix mai deuh ka piang dangngeung krax pa caux rhawm an tix plak tix mu.
8 Riang Cherubin di pruik tix kheem ka piang dangngeung pa caux rhawm an mai kieh pakngai Cherubin khankiex ra lai veeh ka paox tix ka piang dangngeung krax pa caux rhawm an.
9 Riang Cherubin di pruik tix ka piang mai kheem dangngeung krax pa caux rhawm an ka pruik tix mai kieh pakngai Cherubin khankiex jhak simi ka paox tix, ka piang dangngeung krax caux rhawm an heue.
Grawng Yuh Pheen Khan Blah
(Lih 25:23-30)
10 Nawh yuh pheen ka khaox Akashax, plak lang koe ra sawk, plak vieh koe tix sawk mai plak lhaong koe tix sawk.
11 Nawh om an ka khri nawnaw mai kawb rhang khri khankix hawt gawng vung viang praok khawmuik.
12 Nawh baox yuh khaox lat praok pheen pa vieh been tix tiag taix, ka praok vung viang pheen mai kawb khri hawt vung viang praok an khawmuik.
13 Nawh raug daux jhup khri pon mu ka son pheen an mai sau daux jhup khri an khankix ka daog pon daog ka piang caong pheen pon mu.
14 Daux jhup khri koe dex hawt khaox lat praok pheen ka dee chup khaox yam klawm kix pheen an hu.
15 Nawh yuh khaox glawm ka khaox Akashax, sonsang klawm kix pheen hu mai om khri ka an.
16 Nawh yuh kraung shiao piang pheen khankix ka khri nawnaw, pa mawh pan, klong, lawk tuh mai kawk nyaux sonsang lhauk ankix kah heue.
Grawng Yuh Pang Jawk Ten Khri
(Lih 25:31-40)
17 Nawh baox yuh pang jawk ten khri ka khri nawnaw, jaong num, pang nawh, klong nawh, plix nawh mai riang tai pa pruh hoik mawh pa tawk kleuk tau khawm kreng.
18 Kak liah mu pa lih khaing jawk ten khri an ra plak mai lih khaing jawk ten khri plak in loe mu, plak an loe mu.
19 Piang kak pa koe plak in koe klong loe mu pa awm pakpeung pruh tai khaox Batan mai koe plix koe tai, ka piang kak pa koe plak an kawx koe klong loe mu pa awm pakpeung pruh tai khaox Batan mai koe plix koe tai, ka kak pa lih ka khaing jawk ten khri an khawm liah kak, tak awm an khawmuik.
20 Ka piang jawk ten khri an, koe klong pon mu, pa yuh awm pakpeung pruh tai khaox Batan, khawm plix nawh mai pruh tai nawh.
21 Ka greem kak pa lih khaing pang jawk ten khri ra mu, koe plix pa hoik kleuk tix tau mai kak an ra mu, kak khankix liah mu pa lih khaing pang jawk ten khri hoik yuh nan khawmuik.
22 Plix nawh mai kak nawh khankix mawh pa kleuk tix tau mai pa hoik tawk ti yuh ka khri nawnaw tau.
23 Nawh yuh kawk ngu aliah mu mai sigiiep ngu mai tawg nyaox khankix ka khri naw.
24 Nawh yuh pang jawk ten khri mai kraung pa shiao khankix ka khri nawnaw tix talantan heue.
Yuh Khu Dee Tan Nyawng Bhawng
(Lih 30:1-5)
25 Nawh yuh khu dee tan pa gleeing nyawng bhawng ka khaox Akashax, krax lang tix sawk, krax vieh tix sawk, khawm pon daog sidu paox tix, krax lhaong koe ra sawk, rung khankix mawh pa kleuk tix tau mai an khankix.
26 Nawh om khri ka piang an khankix mai praok vung viang mai rung nawh khankix, nawh baox deeh kawb hawt vung viang praok nawh ka rhang khri khawmuik.
27 Nawh yuh daux jhup khri ra mu koe ka greem rhang khri khankix ka plak daog khawm ra plak, sonsang giex khaox glawm yam klawm kix hu.
28 Nawh yuh khaox glawm ka khaox Akashax mai om ka khri heue.
Yuh Bee Groi Nyawng Bhawng
(Lih 30:22-38)
29 Nawh baox yuh bee groi pa singax singeh mai nyawng bhawng pa singax, ka ceu pa jiet nyawm sioe bhawng, awm pa yuh cao sidah ka ceu pa sioe bhawng khankix heue.Ref 37:29 Lih 30:22-38