34
Mose Deeh Yuh Khlawp Simaox
(Pi 10:1-5)
1 Siyiex ah nin ka Mose, “Deeh saik khlawp simaox ra mu, awm khlawp simaox pa yuh sivoe nhaox mai Aux tak tiiem gumlox Aux khankix ka piang khlawp simaox an, awm pa koe ka piang khlawp simaox pa hoik tik maix nhaox.
2 “Mawh kheu nan, kieh khlawp simaox an hoik ka plak ponngawb pasax mai haok ka piang gawng Sina jhi tokaux maix ka Aux, ka piang choek gawng tan.”
3 Pui mawx ang ah tak ang pon ti haok tau mai maix, tak ang pon ti ot vung viang gawng khawmuik, pie cub kawn yung mai cub to brie khankix kawx, tak ang pon ti sawm rib riem hawt caong gawng an.”
4 Mose saik khlawp simaox ra mu awm khlawp simaox pa yuh sivoe nhaox, Mose kaoh caocao plak ponngawb mai haok ka piang gawng Sina, awm gumlox pa hoik tawm Siyiex ka nawh, nawh viex khlawp simaox an ra mu ka daux tawm taix tix.
5 Siyiex lih hoek ka daux paiawm, cung tau mai Mose tan mai krai pao ceu kaux Siyiex.
6 Siyiex hu plak sivoe nawh mai krai pao ah nin, “Simiang! Siyiex pa koe krax caux rhawm mai pa koe bwanson, pa koe krax lang rhawm mai pa grum naog ka daux krax moh mai pa mawh pa meh,
7 “Pa priex krax caux rhawm ka pui kaing rheng kaing mheen, pa pluat ploi ka pa lud mai phimap pui khankix, yuh ka mawh kawx Nawh Cao ang doh pluat ploi phimap ankix daux krax pa mawh pa giex going, son phimap keeing nawh khankix, tak ciyang piang kawn praix nawh mai kawn saux kawn sex nawh tom hoek doeh ru nawh loe pon ju.”Ref 34:6, 7 Lih 20:5-6; Si 14:18; Pi 5:9-10; 7:9-10
8 Mose nied ti gup kaing tix piang tiex mai krub ka Nawh cao,
9 ah nin, “Phan aux hoik mawh pa pon bwanson ka sivoe Maix Cao, Siyiex eue, aux rawg mhaing ka Maix Cao mai kieh Maix hu tau sinax yix, viang yix mawh ceu pui pa kiien ngawg kawx mai pluat ploi phimap pa caox pa hoik yuh yix, khawm phimap tokaux yix mai teei yix mawh sinngao Maix Cao.”
Sijax Mukheu Pa Deeh Cox
10 Nawh Cao ah nin “Jhak heue, Aux yuh gumlox sijax mukheu tix mu sivoe ngai pui inkix khawmuik, Aux tak yuh krax pa daox am pa ang sax yuh ka daux haktiex in mai ka ceu pui tix cub kawx. Pui tang ceu pa ot sivie siveng maix, tak yaox ka kaing pa yuh Siyiex. Mawh kheu krax pa yuh Aux ka pex mawh krax pa lhat graung kah heue.”
Ang Pon Ti Krub Riang Grang
(Pi 7:1-5)
11 “Deuh tix tawng can gumlox pa hoik tawx Aux ka maix daux in singaix, jhak heue, Aux tak grheu ceu pui Amawrix ceu pui Khanan, ceu pui Hitix, ceu pui Pharazix, ceu pui Hiwix mai ceu pui Yebusix lih hu sivoe maix.”
12 “Rien rhawm tix paw lai yuh sijax mukheu tau mai ceu pui pa ot haktiex an, dee sang hu maix ka, phan ang mawh nan, Aux lhat kix mawh kie taong ka daux sinax pex.”
13 “Viang mawh nan maix tak yieh khu dee tan kix laux leeing khawmuik mai raig ti tik rong simaox riang grang pa krub kix mai kid ti tik riang grang pa mawh khaox krub kix khawmuik.”Ref 34:13 Pi 16:21
14 “Maix tak ang pon ti krub ka siyiex tang kaux, mawh kheu Siyiex mawh pa bak pa viang koeng ka pa caox, mai ceu kaux Nawh Cao kawx mawh pa bak pa viang koeng ka pa caox.”
15 “Aux lhat maix yuh sijax mukheu tau mai can pui pa ot haktiex an mai pui khankix hawt yuh kaing krub ka siyiex kix mai lud kah mai yam appong kix krax tan tix ka siyiex kix mai pui tix kaux kaux khaing daux kix, tak kok ka maix mai maix tak ih ka pa appong pa tan kix.”
16 “Lhat maix kieh kawn simex tix khankix teei kawn bun kix mai hawt yuh krax lud tau mai siyiex kix mai kieh kawn simex maix khankix lud tau mai siyiex kix.”
17 “Ang pon raug ti yuh riang grang siyiex son tix.”Ref 34:17 Lih 20:4; Krub 19:4; Pi 5:8; 27:15
Pawie Loe Ceu
(Lih 23:14-19; Pi 16:1-17)
18 “Maix tak priex rien ka pawie blah pa ang koe susaixRef 34:18 Lih 12:14-20; Krub 23:6-8; Si 28:16-25 maix tak ih blah pa ang koe susaix ka daux aliah singaix, awm gumlox pingnyap pa hoik tawx Aux ka maix bawg yam khix Abibax pa hoik tat Aux ti deuh, mawh kheu lih maix khaing daux meung Ejiptux ka daux khix Abibax an.”
19 “Can kawn Ai plix num mawh cie Aux, Ref 34:19 Lih 13:2 to brie pa eei pex, mawie ang ah, yung ang ah, kawn pa pon pex phao ka pa mawh mhaing khawmuik tak mawh cie Aux.”
20 “Viang mawh nan, kawn la pa keh phao ka maix tak deeh taoh nawh ka kawn yung, phan maix ang deeh taoh tak raig ti tik ngawg nawh maix tak deeh taoh ka kawn Ai tix khankix.Ref 34:20 Lih 13:13 Paw kieh pui tix kaux kawx hoek mai taix yi tix ka sivoe Aux.”
21 “Maix tak yuh kaing krub liah singaix, daux singaix aliah maix tak laux lee tix, Ref 34:21 Lih 20:9-10; 23:12; 31:15; 35:2; Krub 23:3; Pi 5:13-14 viang mawh bawg yam yuh ma yuh kaung ang ah mai bawg yam vawg nghox koi khankix maix tak laux lee tix.”
22 “Maix tak yuh pawie gaing nghox daux aliah vang twah, son plix nghox ca pa vawg maix phao kaRef 34:22 Krub 23:15-21; Si 28:26-31 mai pawie priex khrawm nghox ca yam hoik sidah num.”Ref 34:22 Krub 23:39-43
23 “Pui maix pa mawh simex khankix tak hoek bleeh plak sivoe ngai Siyiex, pa mawh Siyiex ceu pui Isarelax tix num loe bawg.”
24 “Aux tak grheu pui tang ceu sivoe maix mai kieh mee haktiex maix khankix nie baox vieh va mai tak ang koe pui pa ghoing ka haktiex maix yam hoek maix plak sivoe Siyiex tix num loe bawg.”
25 “Maix tak ang pon ti tan nham tau mai blah pa koe susaix maix tak ang pon ti deuh pa tan tix daux pawie Pasakha tom hoek plak ponngawb.”Ref 34:25 Lih 12:10
26 “Plix khaox plix ox pa liang maix ti pon khaing haktiex maix khankix, tak viex laig ka daux nyiex bwan Siyiex maix, Ref 34:26 Pi 26:2 maix tak ang pon ti ngaik nex kawn pex daux rawm teeih miex nawh.”Ref 34:26 Pi 14:21
Mose Mai Gumlox Pingnyap
27 Siyiex ah nin ka Mose, “Tiiem ti deuh gumlox in khankix, grawh grawng nawh awm gumlox ceu pa kied ting ceu in, Aux tak yuh sijax mukheu mai maix khawm ceu pui Isarelax khankix.”
28 Mose ot tau mai Siyiex tan, tixpon singaix tixpon sawm, nawh ang ih priex mai ang nyaux rawm, Nawh Cao tiiem gumlox sijax mukheu ka piang khlawp simaox an, pa mawh gumlox pingnyap kao gum heue.
29 Yam lih Mose khaing piang gawng Sina mai khlawp simaox gumlox pingnyap ra mu koe daux taix Mose, yam lih nawh khaing ka piang gawng. Mose ang tawng ka riang hak nex pakngai tix, yam sikah nawh tau mai Nawh Cao.
30 Yam jhak Arun mai ceu pui Isarelax khankix ka Mose, yaox hak nex pakngai nawh hoik riang mai kix koe krax lhat graung sonsang hoek kix dex nawh.
31 Mose kok ka kix mai Arun khawm cao kaing hoek ka tix mai sikah tau mai kix.
32 Khaix an ceu pui Isarelax khankix hoek dex nawh mai nawh tawx gumlox pingnyap khankix ka kix, awm gumlox pa hoik sikah Siyiex tau mai nawh khawmuik ka piang gawng Sina.
33 Yam hoik sikah Mose tau mai kix, nawh tie man ka pakngai tix.
34 Viang mawh nan, yam laig Mose tix sikah tau mai Nawh Cao yam mawx ang ah, nawh plak man tie pakngai an, sivoe ang nawh nyang lih hu ka plak praix mai nawh tak lih plak praix mai krai gumlox ceu pa hoik tawm Siyiex ka ceu pui Isarelax khankix.
35 Yam yaox ceu pui Isarelax khankix ka pakngai Mose yam mawx ang ah, hak nex pakngai Mose riang, Mose tak baox deeh tie pakngai tix ka man tie, tom hoek bawg yam laig sikah nawh tau mai Nawh Cao heue.Ref 34:29-35 2Kaw 3:7-16