28
Kraung Ceep Son Cao Giex Kaing Li
(Lih 39:1-31)
1 “Maix tak teei puxke tix Arun, khawm kawn simex nawh khankix, khaing daux pui Isarelax, sonsang mawh kix pui pa yuh kaing cao giex kaing li son Aux. Arun mai kawn simex nawh Nadat, Abihux, Eliza, Itama tak mawh cao giex kaing li greem maix.
2 Maix tak yuh kraung ceep pa singax son puxke maix Arun, sonsang mawh pa koe min plakngai mai krax pa mhawm grang.
3 Maix tak krai lox ka pui pa koe pingnya khankix pa hoik kieh Aux naog ka rhawm rhi pingnya, pa chix tawng mai kix tak yuh kraung ceep Arun sonsang kieh nawh mawh pa singax son nawh. Nawh tak mawh pui pa yuh kaing jhaw cao giex kaing li son Aux.
4 Inkix tak mawh kraung ceep pa sang yuh kix, pa mawh man tie naok tix plah, sibex dhah plak daux tix pheen sibex lang plak praix tix pheen sibex dawd taix pa mhawm taing tix pheen, man lawk kaing tix pheen mai man rawd nyoi tix mu. Mawh kheu nan, kix tak yuh kraung ceep pa singax son puxke maix Arun mai kawn simex nawh khankix, sonsang yuh kix kaing jhaw cao giex kaing li son Aux.
5 Kix tak teei khri mai keei pa klai raoh mai pa lung pliex mai pa raoh rawt mai man ceu pa mhawm,
6 kix yuh sibex dhah dawd taix ka keei awm khri, khawm man pa klai raoma, man pa lung pliex, man pa raoh rawt mai man pa mhawm taing pa nie blon mhawm khaing paox tix.
7 Sibex dhah dawd taix an tak koe maox rawd piang klip ra nyaing mai kieh toh an khawm ra plak kleuk paox tix sonsang toe tau.
8 Man tie naok pa koe piang sibex dhah dawd taix an, tak mawh pa taing ka keei khri mai keei pa klai raoma mai pa lung pliex mai pa raoh rawt mai man ceu pa mhawm.
9 Maix tak teei simaox siang bawd raoh ra mu mai saik ti deuh ceu kaux kawn simex Isarelax khankix ka piang an.
10 Kieh ceu kaux kix liah kaux koe ka piang simaox tix khlawp mai ceu kaux pa kawn deuk an liah kaux koe ka piang simaox an tix khlawp awm jhong keh kix.
11 Kieh cang mhaw saik ti deuh ceu kaux kawn simex Isarelax ka piang khlawp simaox khawm ra khlawp maix tak priex an daux jawk aw khri.
12 Maix tak kawb simaox an ra khlawp ka piang klip sibex dhah dawd taix khawm ra plak mai priex awm simaox pa sang doh keud kix ka kawn simex Isarelax. Arun tak viex ceu kaux kix ka sivoe Siyiex ka piang klip nawh khawm ra khawn, sonsang mawh krax pa doh keud ka.”
13 Maix tak yuh jawk aw simaox an ka khri,
14 Maix tak yuh maox khri pa mhawm ra nyaing awm maox duing mai phyawk ti deuh maox pa hoik duing an ka jawk aw simaox.
15 “Maix tak yuh man tie naok, sonsang shiao bawg yam prawng see, yuh awm sibex dhah dawd taix pa taing ka keei khri pa klai raoma, pa lung pliex mai pa raoh rawt man ceu pa blon mhawm taing khaing paox tix.
16 Man an tak yuh koe ra gawp mai kieh krax lang koe tix diex, krax vieh tix diex mai kieh daog sidu khawm pon plak.
17 Maix tak sau siang simaox ka piang man tie naok an pon rhoi, rhoi tix tak mawh siang simaox raoh, siang simaox Utapharax siang simaox pa raoh.
18 Rhoi ra tak mawh siang simaox pa klai, siang simaox pa klai riex mai siang simaox kiien.
19 Rhoi loe tak mawh siang simaox klai singi, siang simaox bawd paing mai siang simaox raoh klai.
20 Rhoi pon tak mawh siang simaox raoh toh, siang simaox paing pau mai siang simaox pa toh riang, siang simaox ankix khawmuik tak priex daux jawk aw simaox khri.
21 Ka piang siang simaox ankix, tak kieh ceu kaux kawn praix Isarelax khankix koe kah awm koe ceu kaux kix kao ra kaux. Ka piang siang simaox an tix mu, tak kieh kix saik ti deuh ceu kaux cum kao ra mu. Siang simaox ankix tak kieh koe awm doeh ru kix kao ra cub.
22 Maix tak yuh maox koe ka toh man tie naok, ka maox khri mhawm pa duing tix tau.
23 Maix tak yuh daux jhup khri ra mu pa koe daux son man tie naok an mai tok daux jhup khri ra daux ka toh man tie naok khawm ra plak.
24 Khaix an maix tak sau maox khri pa hoik duing tix ra mu ka daux jhup khri pa koe ka toh man tie naok an.
25 Toh maox khri pa duing kliien ra nyaing tak phyawk ti deuh ka aw simaox ra mu ka piang maox rawd piang klip, pa koe ka sibex dhah dawd taix an plak sivoe ngai.
26 Maix tak dee yuh daux jhup khri ra mu mai sau nawh ka piang toh man tie naok an ra plak ka daog plak daux sibex dhah dawd taix.
27 Maix tak baox yuh daux jhup khri ra mu mai sau ka piang maox rawd piang klip ra mu ka plak greem sibex dhah dawd taix ka plak sivoe ngai. Kieh gawng caing sitoe paox tix, ka plak dee kleuk gawng caing pa taing kix, sibex dhah dawd taix an.
28 Kix tak sitoe daux jhup khri, pa koe piang man tie naok an, ka daux jhup maox khri pa koe ka sibex dhah dawd taix. Kieh kix sitoe nawh ka maox keei pa klai raoma mai kieh an koe ka plak piang gawng caing pa hoik taing kix ka sibex dhah dawd taix, sonsang ang man tie naok an, chix gah ti hu khaing sibex dhah dawd taix.
29 Arun tak viex ceu kaux kawn simex pui Isarelax khankix, ka piang man tie naok pa prawng see an ot ka piang dieb rhawm tix, yam laig nawh ka dee singax, sonsang mawh krax pa doh keud ka sivoe ngai Siyiex ku bawg yam.
30 Nawh tak sau Urim mai Tumin ka daux man tie naok prawng see an, ankix tak koe ka piang dieb rhawm Arun, yam hu nawh ka plak sivoe ngai Siyiex. Mawh kheu nan, Arun tak viex krax prawng see, piang dieb rhawm tix, son kawn praix Isarelax khankix, ka plak sivoe ngai Siyiex jheung jheung heue.
Sibex Pa Ceep Cao Giex Kaing Li
31 “Maix tak yuh sibex dhah jiet khaw peung mai sibex dhah dawd taix ka man klai raoma.
32 Kieh plak kaing koe daux ceep sigreung mai kieh man pa hoik taing an kawb hawt vung viang moeng daux ngawg sibex dhah an tix grawng son ang lai chix griah.
33 Ka piang hawt vung viang caong sibex dhah maix tak sau plix sibex pa lawmle khankix, pa yuh tix ka man pa klai raoma, man lung pliex, man raoh rawt hawt vung viang caong sibex dhah an. Kieh plix hing khri koe ka sinax plix lawmle an.
34 Kieh plix hing khri tix mu mai plix sibex pa awm plix kla jiang tix mu, khan sinax paox tix ka piang hawt vung viang caong sibex dhah ceep kix ku plak.
35 Arun tak ceep ka sibex dhah in yam yuh nawh kaing jhaw Siyiex mai lox luah ankix, tak kieh pui mhong yam laig nawh ka dee pa singax singeh ka sivoe ngai Siyiex, khawm yam deeh lih nawh ka praix, sonsang ang nawh lai yaox ti yum kah.
36 Maix tak deeh baox yuh khlawp plah khri tix khlawp mai saik ngai lai ka piang pa awm cum tix mu, pa ah nin, “Kieh mawh pa singax singeh son Simiang Siyiex.
Krax Pa Singax Singeh Son Siyiex
37 Maix tak phyawk ka maox pa klai raoma mai kieh koe ka piang man lawk kaing an, ka plak sivoe ngai.
38 Khlawp plah khri an tak koe ka piang dong re Arun, sonsang mawh Arun cao pa klawm phimap pa dex mai pa tan pa singax Pui Isarelax mai viex hoek sigrah sonsang mawh krax tan pa singax mai khlawp khri an kieh ot piang dong re Arun jheung jheung sonsang pon mawh kix pa rieb ti teei ka sivoe ngai Siyiex.
39 “Maix tak taing sibex dhah ceep nawh plak daux ka keei ceu pa mhawm. Maix tak yuh lawk kaing ka man ceu pa mhawm mai maox rawd nyoi ka man pa hoik taing tix ka rawm siang kuceu pa blon mhawm khaing paox tix.
40 “Maix tak yuh sibex dhah son kawn simex Arun khankix mai maix tak yuh maox rawd nyoi son kix. Maix tak baox yuh mhok pa koe min pakngai mai pa mhawm grang.
41 Maix tak ceep ankix ka piang puxke tix Arun mai ka piang kawn simex nawh khankix. Maix tak groi bee ka kix, appong kix mai kieh kix singax, sonsang mawh kix pa yuh kaing jhaw cao giex kaing li son Aux.
42 Maix tak caing kix ceep khlax ka man, sonsang kheem kix krax kaig tua tix, jah ka nyoi tom hoek ka ba.
43 Kraung ceep ankix, tak koe ka piang Arun mai kawn simex nawh khankix, yam hoek kix ka daux nyiex gox bwan man bang kum pui hun. Phan ang mawh nan kix tak ceep kraung ankix yam hoek kix hawt dex khu dee tan son kaing jhaw Siyiex ka dee pa singax, son ang kix koe phimap mai yum. In mawh grawng beenli pa caw ti yuh leeing ju, nawh khawm doeh ru nawh khankix heue.