1 “Inkix tak mawh grawng pa sang yuh maix mai kawn simex nawh singax, son kaing jhaw cao giex kaing li son Aux. Teei kawn mawie mhaing tix mu mai kawn yung mhaing ra mu pa ang koe dee ne pa mhawm loig. 2 Blah pa ang sau susaix mai blah pa kluklao mai bee pa ang sau susaix mai blah rhi khlawp pa sau bee mai pa ang sau susaix. Maix tak yuh blah an ka mien gaox nghox ca. 3 Maix tak sau blah an ka daux khrawng tix mu mai viex hoek tau mai kawn mawie mhaing mai kawn yung iak ra mu. 4 Arun mai kawn simex nawh khankix tak kieh kix hoek daux diang siviex nyiex gox bwan man bang kum pui hun. Maix tak kieh kix heem rawm. 5 Maix tak tawx Arun ceep kraung, pa mawh sibex dhah plak daux tau mai sibex dhah dawd taix mai man tie naok mai kieh nawh rawd maox rawd nyoi pa nie blon mhawm taing pa koe ka sibex dhah dawd taix an. 6 Maix tak ceep man lawk kaing ka piang kaing nawh mai sau mhok khri pa singax ka piang man lawk kaing an. 7 Maix tak teei bee mai groi ka piang kaing nawh, 8 Maix tak viex kawn simex nawh khankix hoek mai ceep kix cie sibex dhah plak daux. 9 Maix tak rawd maox rawd nyoi, ka nyoi Arun mai kawn simex nawh khankix mai ceep kix cie mhok, kraung ceep cao giex kaing li khankix tak mawh cie kix, awm mhai rug gumlox beenli leeing ju. Mawh kheu nan maix tak appong kaing jhaw cao giex kaing li ka Arun mai kawn simex nawh khankix. 10 “Maix tak viex mawie mhaing an, hoek ka daux bang kum pui hun sivoe nyiex gox bwan man mai Arun khawm kawn simex nawh khankix, tak deuh taix tix ka piang kaing mawie mhaing an. 11 Khaix an maix tak suat mawie mhaing an sivoe ngai Siyiex hawt diang siviex laig bang kum pui hun daux nyiex gox bwan man. 12 Maix tak teei nham mawie mhaing an tiblah ka giien taix tix mai kraix ka piang rung khu dee tan maix tak hieh nham pa kawn deuk ka praok caong khu dee tan khawmuik tan. 13 Maix tak teei bee pa kheem kraung vaig, bee pa kheem ka piang tawm mai bee pa koe piang soklax mai khawm soklax an ra mu maix tak deuh an khankix ka piang khu krub dee tan mai gleeing ka ngu. 14 Phan mawh nex mawie an, hak khawm roing khankix maix tak gleeing nawh ka ngu ka plak praix nyiex bang, in mawh son krax tan pa pluat ploi phimap. 15 “Maix tak teei yung mhaing tix mu, kieh Arun mai kawn simex nawh khankix deuh taix tix ka piang kaing yung mhaing an. 16 Maix tak suat yung an, teei nham nawh mai phruah ka praok vung viang khu dee tan. 17 Khaix an maix tak pat nex yung khik mawx khik an mai sigrhah kraung vaig mai caong khankix ka rawm mai sau ti deuh khik nex mai kaing tau. 18 Maix tak gleeing nex yung an kix khawmuik ka piang khu dee tan. An mawh krax tan pa gleeing son Siyiex pa sioe bauxRef 29:18 Efe 5:2; Phi 4:18 mai an mawh krax tan, pa gleeing tix ka ngu son Siyiex leeing ju. 19 “Maix tak baox teei yung mhaing an tang mu, kieh Arun mai kawn simex nawh khankix deuh taix tix ka piang kaing yung an. 20 Khaix an maix tak pah yung an, teei nham nawh tiblah mai kraix ka piang dawng yhaok plak dawm Arun mai ka piang dawng yhaok kawn simex nawh khankix mai ka piang giien ting taix khawn dawm kix mai ka piang giien ting caong khawn dawm kix mai phruah nham ankix khawmuik hawt vung viang praok khu dee tan. 21 Maix tak teei nham pa koe ka piang khu dee tan tiblah mai bee tiblah phruah ka piang Arun mai kawn simex nawh khankix mai ka piang kraung ceep kix, tokaux cao nawh mai kraung ceep nawh tak kieh singax mai tokaux kawn simex nawh khankix mai kraung ceep kix tak kieh singax. 22 “Maix tak teei bee yung mai sidax mai bee pa kheem ka piang kraung vaig, bee pa kheem ka piang tawm mai soklax ra mu mai bee pa koe ka piang soklax mai ba taix khawn dawm, in mawh yung pa hoik appong ti tan son Ara kix. 23 Maix teei blah tix lon, blah pa hoik kluklao tix mai bee tix lon, blah pa rhi khlawp tix khlawp, pa mawh blah pa ang sau susaix khaing daux kraung pa koe sivoe ngai Siyiex, 24 Maix tak sau inkix khawmuik ka daux tawm taix Arun mai ka daux tawm taix kawn simex nawh khankix, kieh mawh krax tan pa yang yeuh mai yang yeuh sivoe Siyiex. 25 Maix tak deeh rieb ti teei ankix khaing daux tawm taix kix mai gleeing ka ngu ka piang khu dee tan krax tan pa gleeing, pa sioe bhawng ka sivoe Siyiex mawh krax tan pa gleeing ka ngu son Siyiex. 26 “Maix tak teei yung mhaing pa hoik appong Arun ara kieh mawh krax tan mai yang yeuh sivoe Siyiex, naok an tak mawh son cie maix. 27 Khaing yung mhaing pa hoik appong an maix tak kieh nex naok pa yang yeuh khaing pa hoik yang yeuh mai krax tan pa yaog khawm ba, pa hoik yaog mawh pa singax. Ankix tak mawh son Arun mai kawn simex nawh khankix, 28 an tak mawh krax tan pa kaoh khaing kawn praix Isarelax son Arun mai kawn simex nawh khankix leeing ju heue. Mawh kheu krax tan pa yaog pa kaoh khaing kawn praix Isarelax, khaing pa hoik appong kix ka krax tan pa nhim, ankix tak mawh krax tan pa yaog son Siyiex. 29 “Kraung ceep pa singax Arun, tak mawh cie kawn simex nawh khankix khaix nawh sax, kix tak ceep yam groi bee ka kix mai yam appong kix tokaux tix, ka kaing jhaw cao giex kaing li. 30 Kawn simex pa plud ti mawh cao giex kaing li tang nawh, tak ceep kraung ankix, aliah singaix, yam laig nawh ka daux nyiex gox bwan man, bang dee kum pui hun, sonsang yuh nawh kaing jhaw Siyiex ka dee pa singax. 31 “Maix tak teei nex yung mhaing pa hoik appong son Ara mai ngaik ka dee pa singax. 32 Khaix an Arun mai kawn simex nawh khankix, tak ih nex yung mhaing mai blah pa koe daux khrawng hawt diang siviex nyiex gox bwan man bang kum pui hun. 33 Kix tak ih ceu ankix pa pluat ploi phimap sonsang appong kix tokaux tix mai kieh kix mawh pa singax. Viang mawh nan, pui tang kaux tak ang pon ti ih ankix, mawh kheu ceu ankix mawh pa singax. 34 Phan nex pa hoik appong son ara mai blah pa kawn deuk tom hoek plak ponngawb maix tak gleeing ti tik ka ngu. Kheu mawh pa singax mai pui mawx kawx, tak ang pon ti ih. 35 “Mawh kheu nan maix tak yuh ankix ka Arun mai kawn simex nawh khankix, awm gumlox beenli pa hoik tawm Aux ka maix. Maix tak appong Ara kix tom hoek aliah singaix. 36 Maix tak tan mawie mhaing tix mu ku singaix, son krax tan pa taoh phimap maix tak cox khre khu dee tan an singax yam yuh maix krax pluat ploi phimap tix maix tak awt nawh ka bee, sonsang deeh singax. 37 Daux aliah singaix maix tak yuh krax pluat ploi phimap tix son khu mai kieh singax. khu dee tan an tak mawh pa kied singax. Can ceu pa hu teeh ka khu dee tan an, tak mawh pa singax heue.

38 “Pa sang tan maix ka piang khu dee tan ku ngaix, mawh kawn yung pa naog tix num ra mu, 39 Maix tak tan kawn yung tix mu, plak ponngawb mai kawn yung an tix mu plakbo. 40 Pa tan tau mai kawn yung tix mu, tak mawh mien nghox ca im kao son tix son tix Epha pa klao tix tau mai bee khaox Sanlun pon son tix son pa mawh tix Hing mai rawm plix siiet pon son tix son pa mawh tix Hing, son krax tan pa nyaux. 41 Kawn yung an tix mu tak mawh pa tan plakbo maix tak tan tau mai krax tan mien nghox ca im mai krax tan pa nyaux, awm plak ponngawb, son pa sioe bhawng pa mawh krax tan pa gleeing tix ka ngu son Siyiex. 42 In tak mawh krax tan pa gleeing sijheeng son doeh ru pex ku ju, ka diang siviex nyiex gox bwan man bang dee kum pui hun, sivoe Siyiex, Aux sang yaox pex tan sikah tau mai pex. 43 Aux tak yaox kawn praix Isarelax khankix tan mai nyiex gox bwan man an tak singax kheu min pakngai Aux. 44 Aux tak kieh nyiex gox bwan man bang kum pui hun mai khu dee tan singax, Aux tak kieh Arun mai kawn simex nawh khankix singax mai kieh kix yuh kaing jhaw cao giex kaing li son Aux. 45 Aux tak ot sinax kawn praix Isarelax khankix mai mawh Siyiex kix. 46 Kix tak tawng mawh Aux Siyiex kix, pa viex kix lih khaing haktiex Ejiptux. Aux tak ot sinax kix mai Aux tak mawh Siyiex kix heue.”