27
Grawng Khu Pa Gleeing Krax Tan
(Lih 38:1-7)
1 Ref 27.1-8 Lih 38.1-7.“Maix tak yuh khu dee tan ka khaox Akashax, kieh krax lang koe phwan sawk mai krax vieh koe phwan sawk. Kieh khu dee tan an sidu khawm pon daog mai kieh krax lhaong koe loe sawk.
2 Maix tak yuh rung koe pon mu ka piang daog pon daog, mai rung ankix tak kieh mawh khaox Akashax tix ceu ngie. Maix tak om nawh ka tawng khawmuik.
3 Maix tak yuh aw tawng son pa sang sau kix nyaox mai sipeed vieh plah mai klong mai khaox sigawng nex, mai kraung pa shiao mai aw ngu khawmuik maix tak yuh kraung pa shiao maix inkix ka tawng.
4 Maix tak yuh grheeng tix mu ka tawng mai yuh daux jhup maox pon daux, ka daog grheeng an pon plak.
5 Maix tak deuh grheeng an ka greem toh khu dee tan, kieh grheeng pa yuh maix khankix jah khaing plak greem tom hoek sigreung khu dee tan.
6 Maix tak yuh khaox glawm ka khaox Akashax mai om ka tawng.
7 Sau khaox glawm ka daux maox jhup mai kieh khaox glawm koe praok khu dee tan khawm ra plak, sonsang pon klawm kah.
8 Maix tak yuh khu dee tan ka phia, koe daux doh plak piang mai plak greem, mawh kheu nan, kix tak yuh awm pa hoik jhi Aux ka maix piang gawng heue.
Man Vung viang Biang Nyiex Gox Bwan
(Lih 38:9-20)
9 Ref 27.9-19 Lih 38.9-20.“Maix tak baox yuh vung viang biang nyiex gox bwan man, son daog plak seh ka vung viang biang nyiex gox bwan man an, tak vhak ka man pa taing ka keei ceu pa mhawm, krax lang man an koe tix yieh sawk.
10 Rong khaox pa sang jung ka man an, tak kieh koe tixnga gawng mai daux jhup jaong nawh tixnga mu mai ankix tak mawh tawng khawmuik. Can grok pa koe ka rong ankix mai gawng lat nawh khawmuik, tak kieh mawh pa yuh ka mau.
11 Awm an son krax lang plak laong maix tak vhak man tie tix yieh sawk mai rong khaox tixnga gawng mai daux jhup jaong tawng tixnga mu mai ka grok ka rong khaox khankix, khawm gawng lat mau heue.
12 Plak vieh vung viang biang plak klip singaix, tak kieh vhak ka man tie pa koe tixphwan sawk mai rong jung nawh kao rong mai daux jhup jaong ankix kao mu.
13 Plak vieh vung viang biang plak lih singaix kawx, tak kieh nawh koe tixphwan sawk.
14 Man tie khankix, ka siviex lawng tix plak, tak kieh nawh koe kao phwan sawk ka plak in mai rong nawh loe rong, mai daux jhup jaong loe mu.
15 Ka plak an tix plak kieh man tie koe kah kao phwan sawk mai rong nawh loe rong mai daux jhup jaong loe mu.
16 Son diang siviex lawng vung viang biang nyiex bwan, tak kieh man tie koe kah, plak lang tixnga sawk mai kieh mawh man pa klai raoma, man pa lung pliex mai man pa raoh rawt, pa hoik taing tix ka keei ceu pa mhawm khaing cao pa taing man. Ankix tak koe rong pon rong mai daux jhup jaong pon mu.”
17 Can rong khaox pa koe vung viang biang, tak kieh nawh koe gawng lat pa yuh ka mau khawmuik. Grok khankix kawx, tak mawh pa yuh ka mau mai daux jhup jaong ankix, tak kieh nawh mawh pa yuh ka tawng.
18 Krax lang man tie vung viang biang, tak kieh nawh koe tix yieh sawk, krax vieh tak kieh nawh koe tixphwan sawk khawmuik mai krax lhaong nawh tak kieh koe phwan sawk pa hoik taing tix ka keei ceu pa mhawm, yuh daux jhup jaong nawh khankix ka tawng heue.
19 Can kraung pa shiao son nyiex gox bwan man khawmuik mai lhak khawmuik mai lhak pa shiao son vung viang biang, tak kieh nawh mawh pa yuh ka tawng.
Grawng Priex Ka Jawk Ten Khri
(Krub 24:1-4)
20 “Maix tak tawx gumlox tix ka pui Isarelax khankix, sonsang viex kix bee pa singax pa krid khaing plix khaox Sanlun, son pa riang mai sonsang kieh jawk ten khri riang ang jud ang jai.
21 Kieh bang kum ka daux nyiex gox bwan man an, koe ka praix man tie ka sivoe ngai khui pa kham sakse, Arun mai kawn simex nawh khankix, tak cox rien kawk ngu tan, jah plak bo tom hoek plak ponngawb, sivoe Siyiex. An tak mawh beenli ka doeh ru pui Isarelax khankix leeing ju heue.