3
Kaing Yuh Pawlux Son Pui Tang Ceu
1 Mawh kheu jao in aux Pawlux pa mawh pui pa laung kheu grawng Yesux Khrit, son pex pui tang ceu.
2 Pex tee hoik mhong grawng bawg yam bwanson pa hoik tawx Siyiex ka aux son pex,
3 grawh grawng hoik plak kieh aux yaox, kieh aux tawng ceu pa raux pa mox, awm lox pa hoik tiiem aux phao ka ceeix,
4 mawh kheu yam phat pex, pex tak sang tawng grawng krax tawng aux ka ceu pa raux pa mox pa dex mai Cao Khrit,
5 ceu pa ang sax kieh tawng ka Kawn kawn pui daux ju pa hoik luan khankix, awm Khuan Cao hoik plak kieh yaox yam in ka kawncau pa ting mai cao jhai pa singax singeh cie Nawh khankix,
6 pa mawh grawng pui tang ceu kawx sang mawh pui pa rom ti pon sin tau mai pui Yudax mai rom ti mawh kraung pakpeung tau ka daux tokaux tix mu khaing mai pa rom ti pon tau ka lox sijax mukheu pa koe ka daux Yesux Khrit kheu lox bwan gaux rhawm.Ref 3:4-6 Kaw 1:26-27,
7 pa mawh aux cao sidiex gau kah, awm pa khaw mai totaix bwanson Siyiex, pa hoik tawx ka aux, awm pa khaw mai pa yuh siawp sibrawm Nawh heue.
8 Ka aux pa mawh pa nie iak khaing pui pa singax singeh khawmuik, hoik tawx bwanson in, pa kieh aux sidiex lox bwan gaux rhawm ka pui tang ceu, grawh grawng pa mi pa koe pa ang lai dak uik sawg sikaw ti yaox cie Cao Khrit,
9 sonsang kieh pui khawmuik yaox grawng pa raux pa mox, pa hoik ciak ti deuh, ceu pa hoik mox tom ju di dix ka daux Siyiex pa phan pa yuh kuceu khawmuik mawh pa yuh ka mawx.
10 Sonsang kieh pingnya cuyi Siyiex sidawng yam in ka simiang giex kaing mai siawp sibrawm khankix ka daux raoma kheu ceu cao,
11 awm ceu pa hoik bak hoik yiak Siyiex ti deuh ka daux Simiang ex Yesux Khrit leeing ju heue.
12 Mawh kheu krax yum rhawm ka daux Nawh ex tom koe rhawm kwa ti hoik een rhawm ka Nawh Cao heue.
13 Mawh kheu nan aux tom khyox khaw ka pex, son ang pex sang laux rhawm ka krax kha rhawm aux son pex, pa mawh sonsang pon pex min pakngai heue.
Krax Moh Cao Khrit
14 Mawh kheu jao in aux tom grux ngawng rawg bwan ka Keeing Simiang ex Yesux Khrit,
15 pa mawh Kaw pa tawx ceu kaux ka ku jieh nyiex ka daux meung raoma mai ka piang haktiex heue.
16 Sonsang tawx Nawh ka pex, awm pa khaw mai pa mi pa koe min pakngai Nawh, sonsang baox riang rao pex ka siawp sibrawm kheu Khuan Nawh Cao ka daux pui plak daux heue.
17 Sonsang ot Cao Khrit ka daux rhawm rhi pex kheu krax yum rhawm, kheu sang kaux cong riah pex ka daux krax moh krax rhawm,
18 sonsang pon pex ti tawng tau mai pui singax singeh khawmuik, grawng plak vieh plak lhaong, mai plak raux mawh miex ding,
19 sonsang tawng ka krax moh Cao Khrit, pa nie lheu khaing pa chix tawng, sonsang naog pex ka pa grum naog Siyiex khawmuik heue.
20 Yam in ka kaw pa kied nie lheu chix yuh khaing pa rawg pa keud ex khawmuik, awm pa khaw mai siawp sibrawm pa yuh kaing ka daux ex,
21 kieh Nawh koe min plakngai ka daux ceu cao mai ka daux Yesux Khrit ku ju khawmuik leeing ju liak. Amen.