4
Hu Daux Krax Grum Rhawm
1 Mawh kheu nan aux pa mawh pui pa laung son Simiang, khyox khaw ka pex, sonsang hu awm pa keung mai ceu pa hoik kok ka pex,
2 Ka rhawm pa awn pa tiem pa lang gun lang yeung mai yeung ka paox tix ka daux krax moh krax rhawm.Ref 4:2 Kaw 3:12-13.
3 Nied ti coca sonsang priex pa mawh tix mu khaing pa dex mai Khuan Cao, ka daux pa hoik vien tix tau ka ceu pa nhim heue.
4 Koe ngie tokaux tix mu khaing mai Khuan Cao tix mu khaing, awm ceu pa kok pa hoik kok ka pex mawh ka daux krax keud pot jun pot tix mu khaing.
5 Koe ngie Simiang tix kaux, krax yum rhawm tix ceu mai krax cubcom tix ceu khaing,
6 koe Siyiex pa mawh Keeing khawmuik tix kaux khaing, Nawh mawh pa ting piang khawmuik mai pa tah preeng khawmuik mai pa koe ka daux khawmuik heue.
7 Hoik tawx bwanson ka ex ku kaux daux pui, awm pa khaw mai diag totaix Cao Khrit heue.
8 Mawh kheu nan Nawh Cao hoik ah nin, “Yam haok Nawh dee lhaong, Nawh thong ka pui pa hoik pon giex laung khankix mai nawh tawx totaix khankix ka pui khankix heue.”Ref 4:8 Yaog 68:18.
9 Pa hoik ah “Nawh haok,” sang bleeh ka pa yuh ka mawx, phan Nawh ang nyang bax hoik lih khawm ka greem daux tiex?
10 Kaw pa hoik lih, mawh khawm kaw pa hoik haok ka dee nie lhaong khaing piang raoma khawmuik, sonsang kieh Nawh ku ceu khawmuik grum naog heue.
11 Nawh Cao kieh tix blah mawh kawncau pa ting, kieh tix blah mawh cao jhai, kieh tix blah mawh cao sidiex lox bwan, kieh tix blah mawh sara pa kia ceu cao mai sara cao gau,
12 sonsang kieh pui pa singax singeh khankix grum mhawm, son kaing sidiex gau, sonsang sum, yuh tokaux Cao Khrit ting,
13 tom hoik mawh ex khawmuik tix mu khaing ka daux krax yum rhawm mai krax tawng ka kawn Siyiex, tom mawh ex pui pa uik grum die huan mai awm pa grum pakpeung Cao Khrit.
14 Son ang ex lai baox mawh kawn nyawm awm pa phlu bhaung ku bhaung, ceu pa gau bhaung phlu vied ve, kheu pa nieb lak keud ti yuh cuyi pie lhen, sonsang lud loe heue.
15 Kheu giex pa mawh meh ka daux pa moh rhawm, ex tak ting huan ka ku ceu khawmuik ka daux Nawh Cao, kaw pa mawh kaing, mawh Cao Khrit heue.
16 Tokaux khawmuik mawh khaing Nawh Cao pa sitoe tokaux ti klia tix tau ka pa deeh lih pon tawx riang kraung daux tokaux ku ceu, awm pa yuh kraung daux tokaux mawx, kraung tokaux an, sonsang ting huan tokaux tix ka daux krax moh krax rhawm heue.Ref 4:16 Kaw 2:19.
Ju Pa Khraox Daux Cao Khrit
17 Mawh kheu nan aux tom ah nin mai kham mhai ruk ka daux Simiang, son ang pex lai baox hu awm pa hu pui tang ceu ka pa nieb keud kix ceu pa giex going daux rhawm tix.
18 Kheu krax tawng kix hoik faik, kix hoik tang tiah hu khaing Siyiex pa im ju, mawh kheu pa pheem pa ang tawng tidtix pa koe ka daux kix, mawh kheu kiien rhawm rhi kix heue.
19 Kheu hoik grai krax chix kaig tua, kix tom hoik tawx tokaux tix sonsang yuh hawt alo nex nham kuceu mai rhawm ghoing tix, nieb yuh pa seeing brai ku ceu heue.
20 Viang mawh nan pa gau pex grawng Khrit ang doh mawh nan,
21 Phan pex hoik mhong Nawh Cao mai hoik gau ka daux Nawh, ceu pa mawh meh pa koe ka daux Yesux.
22 Kieh pex peeik ti tik ceu pa hoik sax yuh pex glang ka,Ref 4:22 Kaw 3:9. pa mawh pui prim, pa kieh tokaux tix cux sium, kheu hawt alo nex nham pie lhen heue.
23 Kieh pex mawh pa khraox ka daux khuan rhawm rhi pex,
24 mai ceep ka pui pa khraox Ref 4:24 Kaw 3:10.pa hoik phan hoik yuh ka daux pa rahseeRef 4:24 Jah 1:26. mai pa singax singeh pa dex mai pa mawh meh, awm Siyiex heue.
25 Mawh kheu nan tik ceu pa pie lhen, tix kaux lai tix kaux ah lox pa mawh meh ka paox plawg paox nyhawm tix,Ref 4:25 Zak 8:16. grawh grawng nawh ex tix kaux lai tix kaux hoik ra lai mawh kraung pak peung ka paox tix heue.
26 Viang pex song rhawm kawx,Ref 4:26 Yaog 4:4. paw ot kieh mawh phimap. Paw kieh singaix klip ka piang ceu pa song rhawm pex.
27 Paw kieh tawx dee ot phicaox koe.
28 Kaw pasax briex paw kieh nawh baox deeh briex, viang mawh nan kieh nawh yuh kaing pa mhawm pa yuh ka taix tix, sonsang koe nawh ceu pa tawx ka pui pa lo pa ang yaox ti ih khankix heue.
29 Paw kieh lox pa seeing brai lih khaing daux jheeh pex tix gum kawx, ah ceu pa mhawm, awm pa lo sonsang kieh ting lhaong yam mawx yam an, sonsang koe bwanson son kix pa mhong khankix heue.
30 Paw yuh ti kieh Khuan Singax Singeh Siyiex khi rhawm, pa mawh pa hoik tawk pex cum ka daux Nawh, tom hoek singaix pa taoh heue.
31 Kieh tik ka ceu pa song rhawm, pa hax rhawm, pa chu rhawm, pa lawh maw, pa map, pa koeng riang ciang khoi khaing pex heue.
32 Pex tix kaux lai tix kaux caux rhawm ti yuh pa mhawm ka paox tix, viex pa awn rhawm awn rhi, pluat ka phimap paox tix, awm hoik pluat Siyiex phimap pex ka daux Cao Khrit heue.Ref 4:32 Kaw 3:13.