2
Krax Taoh Kheu Bwanson
1 Nawh Cao hoik yuh ti kieh pex im ka, yam hoik yum pex kheu pa lud mai phimap.
2 Pa hoik sax hu pex ka, awm pa khaw mai been haktiex, pa khaw mai simiang siawp sibrawm bhawm, pa mawh khuan pa yuh kaing ka daux kawn pa lieh lox khankix.
3 Ex khawmuik kawx hoik rom tau mai kix tix bawg, ka daux pa hawt alo nex nham tokaux tix mai hawt yuh pa simie nex nham mai pa lak keud ti yuh mai ex hoik mawh nang kawn praix pa song rhawm, awm hoik mawh pa deuk khankix heue.
4 Siyiex, pa mi pa koe ka daux krax caux rhawm, kheu krax moh pa kied lang teung moh Nawh Cao ka ex,
5 Pie yam hoik yum ex kheu phimap tix kawx, Nawh hoik kieh ex im tau mai Cao Khrit, Ref 2:1-5 Kaw 2:13.Pex hoik hoek krax taoh kheu bwanson heue.
6 Hoik kieh ex deeh kaoh tau mai Nawh, hoik kieh ex ngawm tau mai Nawh ka daux raoma, ka daux Yesux Khrit.
7 Ka daux ju pa tak sang hoek khankix, Nawh tak sang pon ti jhi ceu pa kied ting mi koe bwanson tix, ka daux pa yuh bwanson ka ex ka daux Yesux Khrit heue.
8 Pex hoik hoek krax taoh kheu bwanson ka daux krax yum rhawm mai ang mawh kheu tokaux tix, mawh totaix pa tawx Siyiex.
9 Ang mawh kheu krax twah pa yuh tix, mawh kheu nan ang pui pon yaw tix, tix kaux kawx ka grawng an heue.
10 Ex mawh khaix taix Nawh, pa hoik phan hoik yuh ka daux Yesux Khrit, sonsang twah, yuh ceu pa mhawm, pa hoik grux cox Siyiex sonsang hu ex ka daux ceu an khankix heue.
Mawh tix Mu Daux Cao Khrit
11 Mawh kheu nan doh keud grawh grawng pex pa mawh pui tang ceu ka daux nex nham, kix pa mawh pa pat hak ka daux nex nham, pa hoik yuh ka taix, kok mawh pa ang pat hak,
12 hoik mawh pa tang ot khaing Cao Khrit tix bawg, pa hoik tang tiah tix, ang mawh paox khaing pui Isarelax mai pa hoik mawh pa ang dex mai sijax mukheu, pa dex dawd mai lox sijax mukheu, ang koe krax dee sang keud pot jun pot, ang koe Siyiex ka daux haktiex in heue.
13 Yam in ka daux Yesux Khrit, pex pa hoik singai tix bawg, hoik kieh dex kheu nham Cao Khrit heue.
14 Nawh Cao mawh pa nhim ex, pa hoik kieh khawm ra mawh tix mu khaing mai yuh ding tie ka sigreung laux,
15 kheu hoik kieh Nawh ceu pa koeng pak lawg ka daux tokaux tix, pa mawh lox tawm mai been khankix pa koe ka daux lai beenli, Ref 2:15 Kaw 2:14.sonsang pon Nawh ti phan, yuh kiex khawm ra mawh pui khraox tix kaux khaing, ka daux tokaux tix mai kieh nhim heue.
16 Sonsang kieh khawm ra deeh ih rhawm paox tix, ka daux tokaux tix mu khaing, ka Siyiex, kheu khaox lhak Ref 2:16 Kaw 1:20.mai pah ceu pa koeng yum ka khaox lhak an heue.
17 Nawh Cao viex ti sidiex lox bwan gaux rhawm pa nhim, ka pex pa ot dee singai, mai ka ex pa ot dee dex heue.Ref 2:17 Isa 57:19.
18 Mawh kheu Nawh Cao, ex khawm ra tom pon ti laig ka daux khuan tix mu khaing ka Keeing Cao heue.
19 Mawh kheu nan pex ang lai baox mawh pui tang praix tang klawng mai nyo sinie, pex hoik mawh ngie pui tix meung khaing tau mai pui singax singeh khankix mai pui geh nyiex Siyiex,
20 pa hoik sum piang jaong rong, pa mawh kawncau pa ting mai cao jhai khankix, tokaux Yesux Khrit mawh Simaox kaing ka daog heue.
21 Ka daux Nawh Cao khaox joh rong jhan khawmuik jawg ti tok mai lih mawh nyiex bwan pa singax singeh son Simiang heue.
22 Pex kawx hoik sum tau ka daux Nawh Cao, sonsang mawh dee ot Siyiex ka daux Khuan Cao heue.