44
1 Khaix an Nawh Cao deeh viex aux hoek ka plak praix siviex dee pa singax singeh, veeh ngai tix ka plak lih singaix, mai siviex an hoik nyeep tix.
2 Nawh ah nin ka aux, “Siviex in tak nyeep tix, mai tak ang lai paoh tix mai pui tak ang yaox tix laig ka tix kaux kawx, mawh kheu Siyiex mawh Siyiex ceu pui Isarelax, hoik laig ka daux siviex an, mai siviex an tak nyeep tix.
3 Mawh ngie cao kaing, pa tak ngawm ti ih priex preem sivoe Siyiex, mai nawh tak yaox ti laig daux krax siviex sidub mai laig lih ka daux krax an heue.
4 Khaix an Nawh Cao viex aux hoek ka daux krax diang siviex plak laong sivoe nyiex bwan mai aux simi ti yaox, jhak heue, min sibrawm Siyiex naog ka daux nyiex bwan Siyiex mai aux hoik gup ngai tix ka piang tiex.
5 Siyiex ah nin ka aux, “Kawn pui eue, jhak ti yaox mai priex mhawm mhawm mai nghiet ka pa krai Aux pa dex dawd mai been lox tat jhawm prawng grawng nyiex bwan Siyiex khawmuik mai een ti tawng pui pa pon laig pon lih ka daux nyiex bwan khaing daux dee pa singax singeh mhawm mhawm.”
6 Krai ah nin ka nyiex ma ceu pui Isarelax pa tieh feen khankix. Siyiex ah nin, “Nyiex ma ceu pui Isarelax eue, paw lai yuh pa seeing brai yuh pex khankix.”
7 Yam viex pex krax tan pa ih Aux pa mawh klon bee mai nham. Pex kieh nyiex bwan Aux seeing brai, kheu viex pex pui tang meung pa ang nyang pat hak rhawm rhi tix mai pa ang nyang pat hak tokaux tix, sonsang ot kix ka dee pa singax singeh Aux, sonsang seeing yuh kix ka pa mawh nyiex bwan Aux mai pex hoik yieh gumlox sijax mukheu Aux laux leeing kheu jao pa seeing brai pex heue.
8 Pex ang priex kraung khrai ceu pa singax singeh Aux khankix mai yaog pui tang ceu mawh cao pa priex kraung khrai dee pa singax singeh Aux heue.
9 “Siyiex ah nin, pui tang praix klawng pa ang nyang pat hak rhawm tix ang ah, pa ang nyang pat hak tokaux tix mai pa ot sinax ceu pui Isarelax khankix tak ang pon ti laig ka daux dee pa singax singeh Aux.
10 Ceu pui Lewix pa hoik singai hu khaing Aux mai ceu pui Isarelax kawx lih hu khaing Aux mai hawt khaix riang grang krub tix, kix tak yaox ti kham phimap cao tix heue.
11 Kix tak mawh pa yuh kaing jhaw ka dee pa singax singeh Aux mai pau diang siviex nyiex bwan mai yuh kaing jhaw daux nyiex bwan, kix tak mawh cao pa pah krax tan pa gleeing mai krax tan pa appong tix son pui mai kix tak yaox ti cung ka plak sivoe pui, sonsang yuh kaing son kix heue.
12 Mawh kheu hoik yuh kix kaing jhaw ka sivoe riang grang ka son pui mai hoik kieh nyiex ma ceu pui Isarelax sideeing rau ka daux pa lud, mawh kheu nan, Aux hoik yaog khawn taix tix mai jhax lawg ka kix, sonsang yaox kix tix kham phimap cao kix, Siyiex ah nan heue.
13 Kix tak ang lai yaox ti yuh kaing cao giex kaing li mai greed ti dex Aux mai ang pon ti hoek dee pa kied singax singeh Aux mai kix tak yaox ti kham geu krax pa kaig pa tua kix mai krax pa seeing brai, ceu pa lud kix heue.
14 Aux tak kieh kix teei beeh glawm priex rien nyiex bwan, son kaing nawh khawmuik mai son can ceu pa sang yuh ka daux nyiex bwan heue.
15 Yam hoik lud hu ceu pui Isarelax mai lih khaing Aux, cao giex kaing li ceu pui Lewix kawn simex Zadok khankix pa kawn priex rien mai yuh kaing dee pa singax singeh Aux, kix tak pon ti yuh kaing Aux mai greed tix hoek dex Aux, sonsang tan krax tan krax lu pa gleeing klon bee mai nham ka Aux, Siyiex ah nan heue.
16 Kix tak yaox ti laig ka dee pa singax singeh Aux mai yaox ti hoek dex pheen Aux, sonsang yuh kaing ka son Aux mai tak priex rien ka beeh glawm Aux heue.
17 Yam laig kix ka daux siviex, plak daux ding yam mawx ang ah, kix yaox ti ceep kraung man mai ang pon ti ceep kraung hauk yung glang yam kawn yuh kix kaing jhaw Aux ka plak daux ding nyiex bwan heue.Ref 44:17-18 Lih 28:39-43; Krub 16:4
18 Kix tak ceep mhok pa yuh ka man mai khlax pa caing ka man, kix tak ang pon ti ceep kraung pa sang kieh rawm lauh lih tix ceu kawx.
19 Yam lih kix ka plak praix ding, dee ot pui hun, kix tak peeik kraung ceep tix pa ceep yam yuh kaing jhaw mai prah ka daux lawg pa singax singeh, mai yaox ti ceep kraung tang ceu mai kraung pa singax singeh ceep kix an tak ang pon ti mawh pa khi rhawm ka pui khankix heue.Ref 44:19 Krub 16:23
20 Kix tak ang pon ti khlao hauk kaing tix mai ang pon ti kieh lang, kix tak priex mai rhip mhawm mhawm.Ref 44:20 Krub 21:5
21 Cao giex kaing li ang pon tix nyaux rawm plix siiet, yam laig nawh ka plak daux ding.Ref 44:21 Krub 10:9
22 Kix ang pon ti teei ti moeng miexmai, bun pa hoik tik mex tix, viang mawh nan, kix pon ti teei bunkrih nyiex ma ceu pui Isarelax ang ah, miexmai pa hoik mawh moeng cao giex kaing li heue.Ref 44:22 Krub 21:7, 13-14
23 Kix tak yaox ti gau pui Aux sonsang chix gwieh tix tawng pa singax mai pa ang singax, pa mhawm mai pa ang mhawm.Ref 44:23 Krub 10:10
24 Yam prawng kix see tak yaox tix prawng hawt awm been pa koe lox tat jhawm prawng Aux khankix, kix tak priex ti hawt gumlox been Aux mai lox lai beenli pa deuh Aux, ka daux bang pawie pa hoik tat Aux ti deuh mai kix tak yungyi nab yam ka singaix twah Aux heue.
25 Kix ang pon ti kieh tokaux tix seeing ka greed ti dex pui yum, mawh ngie son miex keeing tix, son kawn simex kawn bun tix, son puxaik tix, son nan pa ang nyang koe mex khankix khaing pa pon kieh tokaux tix seeing brai kah.Ref 44:25 Krub 21:1-4
26 Khaix hoik mawh nawh pa singax, nawh yaox ti jun aliah singaix, khaix an nawh mawh pa singax.
27 Ka daux ngaix sang hu laig nawh ka dee pa singax singeh, sonsang yuh kaing jhaw, ka daux dee pa singax singeh an, nawh tak yaox tix tan krax tan pa pluat phimap cao tix ka plak daux ding, Siyiex ah nan heue.
28 Grawng pa dex mai sinngao kix, Aux mawh sinngao khraung khrai kix, pex tak ang pon ti tawx kix cie sinngao ka daux haktiex Isarelax tix ceu kawx, Aux mawh sinngao pa sang pon kix heue.Ref 44:28 Si 18:20
29 Kix tak ih krax tan plix nghox koi mai krax tan pa pluat ploi phimap mai krax tan son pa lud, mai can ceu pa hoik tiextu tix tan kuceu ka daux haktiex Isarelax tak mawh cie kix heue.Ref 44:29-30 Si 18:8-19
30 Plix khaox pa liang ti plix kuceu khawmuik mai krax tan kuceu khaing daux krax tan krax lu, tak sang mawh cie cao giex kaing li, mai phawng blah pa liang pex ti yuh khankix pex tak yaox ti tawx ka cao giex kaing li sonsang nawb bwan ka piang nyiex ma pex.
31 Nex sim ang ah nex totiag ang ah pa tang yum mai pa kiied totiag khankix, cao giex kaing li tak ang pon ti ih ka heue.Ref 44:31 Krub 22:8