1 Yam gwieh pex haktiex ka pa caw nieb sonsang mawh sinngao, pex tak tang deuh haktiex tix gwang son Siyiex mai tan haktiex mawh pa singax singeh son Siyiex, krax lang caw tix koe ra mheen phwan rheng sawk mai krax vieh caw tix koe tix mheen sawk, mee haktiex an khawmuik tak mawh dee pa singax singeh. 2 Khaing daux sigreung haktiex in, tak yaox ti deuh son dee pa singax singeh pa sidu pon daog, plak lang phwan yieh sawk mai plak vieh phwan yieh sawk, tau mai tixphwan sawk hawt vung viang gwang an sonsang mawh dee pa singax singeh. 3 Khaix hoik tiag maix krax lang ra mheen phwan rheng sawk mai krax vieh tix mheen sawk ka daux an tak mawh dee pa singax singeh, mawh pa kied singax singeh pa koe ka heue. 4 An tak mawh haktiex dee pa singax singeh tidah, pa mawh nyum son cao giex kaing li pa yuh kaing ka dee pa singax singeh mai cao pa greed ti hoek dex Siyiex, sonsang yuh kaing jhaw Nawh mai tak mawh dee sum tix ot kah mai mawh dee pa singax singeh sonsang sum dee pa singax singeh kah heue. 5 Dah dee pa koe krax lang ra mheen phwan rheng sawk, krax vieh tix mheen sawk tak mawh cie ceu pui Lewix, pa yuh kaing ka daux nyiex bwan mai sonsang yuh lawg ot kix tixnga mu heue.

6 Pex tak tat ti deuh haktiex tixdah sonsang mawh haktiex veng mai pa koe krax vieh phwan rheng sawk, plak krax lang ra mheen phwan rheng sawk, pa koe plak toi haktiex pa singax singeh an, an tak mawh cie nyiex ma ceu pui Isarelax khawmuik heue. 7 Cao kaing tak sang yaox ti cie nyum pa koe ka praok mee toi plak an ka baoh haktiex dee pa singax singeh mai haktiex cie veng, jah ka baoh mee haktiex dee pa singax singeh an mai ka baoh haktiex veng khankix, hu plak klip singaix tom hoek plak lih singaix krax lang tak mawh pa sidu koe awm nyum pa pon ceu pui Isarelax khankix heue. 8 Haktiex an tak mawh cie kix ka daux haktiex Isarelax mai cao kaing Aux khankix tak ang lai baox yaox ti yuh krax kha rhawm ka pui Aux khaix in tix bawg kawx, viang mawh nan, kix tak gwieh haktiex pa kawn deuk an ka nyiex ma ceu pui Isarelax awm koe doeh ceu cat kix heue.

9 “Siyiex ah nin, cao kaing Isarelax khankix eue, fah rhawm heue, tik ceu pa yuh krax khin mai pa tud rhim mai prawng ca rahsee ka pa mawh pa meh, mai paw lai baox yuh krax kha rhawm ka piang pui Aux khankix, Siyiex ah nan heue.” 10 Pex caw tix koe jiang ciang pa see mai Epha mai Bat pa see heue.Ref 45:10 Krub 19:36 11 Diag Epha mai Bat tak mawh pa sidu, kao son tix son Epha koe tix Awmie mai kao son tix son Bat koe tix Awmie. Diag pa tiag kix mawh Awmie heue. 12 Tix shekhe koe tixnga Gera, tixnga shekhe, tixnga phwan shekhe mai kao phwan shekhe, tak caw ti mawh Mina cie pex heue. 13 “In mawh krax tan lu pa tak caw pex ti yuh, pex tak yaox ti tawx nghox ca liah son tix son Epha khaing daux tix Awmie mai koi liah son tix son Epha khaing daux tix Awmie,” 14 Lox pingyap pa deuh tix son krax tan rawm bee, pex tak yaox tix tawx kao son tix son Bat khaing daux tix kawrax, 15 teei kawn yung tix mu, khaing phung yung ra yieh khaing baoh dee klai rib ka daux haktiex Isarelax, in tak mawh son krax tan phawng nghox ca im mai krax tan pa gleeing mai krax tan pa nhim, sonsang pluat ploi phimap son kix, Siyiex ah nan heue. 16 “Pui haktiex khawmuik, tak tawx krax tan in ka cao kaing cao kap ceu pui Isarelax heue.” 17 An tak mawh beeh glawm son cao kaing cao kap pa sang gleeing krax tan pa gleeing, krax tan phawng nghox ca im mai krax tan pa nyaux khankix ka daux pawie, ka daux khix khraox mai ka ngaix twah mai pawie pa hoik tat son ka daux bawg yam pa hoik tat nyiex ma ceu pui Isarelax khankix, Nawh tak khre rien krax tan pa pluat ploi phimap, krax tan phawng nghox ca im, krax tan pa gleeing mai krax tan pa nhim, sonsang yuh krax pa pluat ploi phimap son nyiex ma ceu pui Isarelax khankix heue.

18 Siyiex ah nin, “Ka daux khix tix, haok khix tix ngaix, pex tak teei kawn mawie mhaing pa loig tix mu mai sigrhah ka dee pa singax singeh an ka heue.” 19 Cao giex kaing li tak teei nham krax tan pa pluat ploi phimap tiblah mai kraix ka piang pang siviex nyiex bwan mai khawm pon daog khu dee tan mai ka rong siviex nyiex bwan plak daux khankix. 20 Yam haok khix an aliah ngaix tix ngaix pex tak yuh awm an, son pui pa yuh phimap tix kaux kaux ka daux pa ang tawng nam nex tix, mawh kheu nan maix tak yuh pa sigrhah ka son nyiex bwan heue. 21 Ka daux khix tix, haok khix kao pon ngaix, pex tak yuh pawie Pasakha, ka daux pawie pa rheung aliah ngaix an, pex tak caw tix ih blah pa ang sau susaix heue.Ref 45:21 Lih 12:1-20; Si 28:16-25 22 Ka daux singaix an cao kaing cao kap mai pui haktiex khawmuik tak yuh krax tan pa pluat ploi phimap tix ka mawie mhaing tix mu heue. 23 Ka daux vong pawie aliah ngaix nawh tak yuh krax tan pa gleeing ka son Siyiex, mawie mhaing pa loig aliah mu mai yung mhaing aliah mu mai son krax pluat ploi phimap ka pex mhaing tix ngaix tix mu ka daux aliah ngaix ku ngaix heue. 24 Nawh tak khre krax tan phawng nghox ca im tix Epha son mawie mhaing ku mu tix Epha son yung mhaing ku mu mai rawm bee tix Heng tau mai ku Epha heue. 25 “Ka daux khix aliah haok khix kao phwan ngaix, son pawie aliah ngaix an maix tak yuh awm koe krax tan pluat ploi phimap mai krax tan pa gleeing mai krax tan phawng nghox ca im mai krax tan rawm bee awm an khankix heue.”Ref 45:25 Krub 23:33-36; Si 29:12-38