1 Khaix an nawh viex aux hoek ka siviex, pa veeh ngaix tix ka see plak lih singaix heue. 2 Jhak heue, min sibrawm Siyiex pui Isarelax hoek khaing plak lih singaix, mai lox pa hoek nawh awm lox sinum rawm, mai min sibrawm Nawh jhan riang ka piang haktiex heue.Ref 43:2 Yez 10:3-4, 18-19, 11:22-23; Jhi 1:15 3 An hoik awm riang susai pa yaox aux yam hoek Nawh ti yuh veng laux leeing mai awm riang susai pa hoik sax yaox aux hawt rawm klawng Kheba, mai aux goh gup ngai tix piang tiex. 4 Min sibrawm Siyiex hoek laig ka daux nyiex bwan khaing siviex pa veeh ngai tix ka plak lih singaix, 5 khwan Siyiex yaog aux haok mai viex aux hoek ka brawk nyiex bwan, mai jhak heue, min sibrawm Siyiex hoik naog ka daux nyiex bwan heue. 6 Yam cung pui tix kaux ka praok aux, aux mhong sikah pui tix kaux ka aux, khaing daux nyiex bwan, 7 mai Nawh ah nin ka aux, “Kawn pui eue, in mawh dang ngeung Aux mai mawh dee deuh Aux caong tix, ka sinax kawn praix ceu pui Isarelax leeing ju. Nyiex ma ceu pui Isarelax tak ang lai salao ceu kaux pa singax Aux khaix in tix bawg kawx, cao kix mai simiang kix, ang lai lud vao mai ang krub riang yum simiang kix ka dee pa lhaong kix heue. 8 Kix hoik yuh pang siviex kleuk tix mawh pang siviex Aux mai kieh rong siviex dex mai rong Aux, mawh ding ngie pa khan sinax kix mai aux, kix hoik kieh ceu kaux pa singax singeh Aux seeing brai, ka pa lud tix, mawh kheu nan, Aux hoik kieh kix laux leeing ka krax pa song rhawm tix heue. 9 Kieh kix teei ti tik krax pa lud vao tix mai tokaux yum simiang kix singai khaing Aux mai Aux tak ot ka sinax kix leeing ju heue. 10 “Kawn pui eue, krai nyiex ma ceu pui Isarelax mhong grawng nyiex bwan mai kieh kix tiag ti yaox pakpeung nyiex bwan an, sonsang kaig tua kix ka phimap yuh cao tix. 11 Phan kix hoik kaig tua ka ceu pa hoik yuh tix, jhi kix yaox grang pakpeung nyiex bwan mai krax laig krax lih son pa sang khre rien tix khankix mai kieh kix tawng grawng been mai lox tat jhawm prawng khawmuik mai tiiem ti deuh grawng an khankix ka plak sivoe ngai kix, son tak sang hawt kix ti yuh awm been mai awm lox tat jhawm prawng khankix. 12 In mawh been lox tat jhawm prawng pa dex dawd mai nyiex bwan, ka dah dee vung viang ka piang choek gawng tak mawh dee pa kied singax jhak heue, in mawh been lox tat jhawm prawng nyiex bwan heue.”

13 Inkix mawh grawng pa tiag ka khu dee tan ka diag sawk, tix sawk an koe tix sawk mai tix plah taix, jaong num nawh lhaong tix sawk mai vieh tix sawk mai krax pu hawt vung viang an koe tix diex, in mawh krax lang khu dee tan.Ref 43:13-17 Lih 27:1-2; 2Been 4:1 14 Jah ka jaong num khaing piang tiex tom hoek ka glawk mee ka greem koe ra sawk mai krax vieh koe tix sawk, jah ka glawk iak tom hoek ka glawk pa ting lhaong koe pon sawk mai krax vieh tix sawk, 15 glah ngu khu dee tan lhaong pon sawk, tau mai rung pa koe tix sawk pon mu jung tix haok ka piang khaing daux glah ngu heue. 16 Pakpeung glah ngu khu dee tan an sidu paox tix khawm pon daug, krax lang koe kao ra sawk mai krax vieh kao ra sawk. 17 Pakpeung glawk an kawx tak sidu paox tix khawm pon daog, krax lang koe kao pon sawk krax vieh kao pon sawk, hawt vung viang moing vieh tix sawk plak, num plak greem lih tix sawk hawt vung viang mai bawng khu dee tan tak veeh ngai tix ka plak lih singaix.

18 Nawh Cao ah nin ka aux, “Kawn pui eue, Siyiex ah nin, in mawh been pa dex dawd son khu dee tan ka daux singaix yam yuh maix ka khu dee tan sonsang tan ka krax tan pa gleeing khankix ka piang an mai sonsang phruah nham ka piang an heue.” 19 Maix tak tawx kawn mawie mhaing awn ju tix mu, son krax tan pa pluat ploi phimap ka cao giex kaing li ceu pui Lewix khaing nyiex ma Zadok, pa greed ti hoek dex Aux, sonsang yuh kaing jhaw Aux khankix, Siyiex ah nan. 20 Maix teei nham tiblah mai sau nawh ka piang rung khu dee tan pon mu, khawm pon daog glawk mee an mai hawt vung viang ka piang moing an, maix tak ap khu dee tan in mawh pa singax singeh ka heue. 21 Maix tak baox teei kawn mawie mhaing son krax tan pa pluat ploi phimap mai gleeing an ka dah dee pa hoik laug ti deuh daux nyiex bwan ka plak praix dee pa singax heue. 22 Ka daux ra ngaix tix ngaix maix tak tan kawn pex mhaing pa loig tix mu, son krax tan pa pluat ploi phimap, maix tak kieh khu dee tan an singax awm hoik kieh maix khu dee tan an singax ka nham mawie mhaing heue. 23 Yam kieh maix khu dee tan singax maix tak tan kawn mawie mhaing pa loig tix mu mai kawn yung mhaing pa loig khaing phung yung. 24 Maix tak viex an hoek ka plak sivoe Siyiex, cao giex kaing li tak groi kih ka piang an khankix mai tan an mawh krax tan pa gleeing ka Siyiex heue. 25 Son aliah singaix ku ngaix maix tak tan pex tix mu son krax tan pa pluat ploi phimap tix mai kawn mawie mhaing pa loig mai kawn yung mhaing pa loig khaing phung yung maix tak yaox tix tan heue. 26 Daux aliah singaix, kix tak yuh khu dee tan mawh pa singax singeh mai ap dee an mawh pa singax singeh heue. 27 Yam hoik naog pa singax aliah singaix, ka daux daix ngaix hu sivoe, cao giex kaing li tak tan krax tan pa gleeing pex mai krax tan pa nhim pex ka piang khu dee tan, mai Aux tak rieb ti teei pex, Siyiex ah nan heue.”Ref 43:27 Lih 29:35-37