1 Khaix an nawh viex aux lih hoek ka ding plak praix, ka krax see plak laong mai nawh viex aux laig ka daux, pa koe ka sivoe brawk ding pa khan tix mai pa koe sivoe lawg ka see plak laong heue. 2 Krax lang lawg an tom hoek ka siviex plak laong koe tix yieh sawk mai krax vieh koe tixphwan sawk, 3 ka plak sivoe ding plak daux koe tixnga sawk mai ka plak praix ding dee tawm simaox, koe lawg pa koe loe thaix heue. 4 Ka sivoe lawg an ka plak daux koe krax pa sang lailing ka pa vieh kao sawk mai krax lang tix yieh sawk mai siviex ting an veeh ngai tix ka plak laong heue. 5 Lawg pa koe plak piang khankix nie sikhawp, kheu jao hoik laig meeh tawm an plak daux lheu khaing lawg plak greem mai lawg sigreung glawk nyiex khankix heue. 6 Mawh kheu hoik koe an kix loe thaix mai ang koe rong, awm ding khankix, mawh kheu nan, nawh nie lheu sikhawp khaing lawg plak greem mai lawg sigreung heue. 7 Ding pa lih ka plak praix an tix mu, koe lawg pa sidu see ka ding khankix mai lawg pa koe see ding an plak praix mai krax lang koe tixphwan sawk heue. 8 Krax lang lawg an plak praix ding koe tixphwan sawk, krax lang nawh khaing plak sivoe ngai nyiex bwan koe been tix yieh sawk heue. 9 Ka greem lawg pa koe ka plak lih singaix, koe siviex pa sang lih khaing ding an plak praix heue. 10 Ka plak seh nyiex bwan ka baoh dee yi ka praok ding tan baox koe lawg kah. 11 Krax lailing pa koe sivoe lawg ankix mai pakpeung krax vieh krax lang mai krax laig krax lih lawg an hoik awm lawg pa koe plak laong heue. 12 Siviex lawg pa koe plak seh, hoik awm siviex lawg pa koe plak laong mai koe siviex ting tix mu pa sang laig ka krax pa lailing, ka plak sivoe ding see plak lih singaix heue. 13 Nawh ah nin ka aux, “Lawg plak laong mai lawg plak seh, pa koe sivoe brawk an khankix, mawh lawg pa singax singeh, dee ot cao giex kaing li, pa greed ti dex Siyiex sonsang ih krax tan lu, pa kied singax singeh ka dee an, kix deuh krax tan phawng nghox ca im, krax tan pa pluat ploi phimap mai krax tan son pa lud, mawh kheu mawh pa singax singeh heue.” 14 “Yam laig cao giex kaing li ka daux lawg pa singax singeh, kix ang yaox tix lih hu ka plak praix lawg pa singax singeh tom hoek ka brawk ding plak praix, kix tak yaox ti peeik ti deuh kraung ceep pa yuh kaing jhaw, mawh kheu kraung in mawh pa singax singeh, kix tak ceep kraung tang ceu khaix an, kix tak pon hu greed dex ka pui khankix heue.

15 Yam hoik tiag ti yaox ka diag plak daux nyiex bwan, nawh viex aux lih khaing siviex pa veeh ngai tix see plak lih singaix mai tiag ti yaox diag gwang hawt vung viang nyiex bwan khawmuik heue. 16 Nawh tiag ti yaox praok plak lih singaix ka gawng khaox tiag an mai koe phwan yieh sawk ka diag khaox tiag an heue. 17 Nawh tiag ti yaox praok plak laong mai koe phwan yieh sawk diag khaox tiag an heue. 18 Nawh hoik tiag ti yaox praok plak seh mai hoik koe been phwan yieh sawk ka diag khaox tiag an heue. 19 Nawh tiag ti yaox praok plak klip singaix mai koe phwan yieh sawk ka diag khaox tiag an heue. 20 Nawh tiag an khawm pon praok, hawt vung viang ding an, krax lang phwan yieh sawk mai krax vieh phwan yieh sawk, sonsang tang gwieh dee pa singax mai dee pa ang singax heue.