41
1 Khaix an nawh viex aux laig ka daux nyiex bwan pa singax mai tiag ti yaox rong pang siviex, krax vieh plak in plak an koe liah sawk,
2 siviex laig ka nyiex bwan koe kao sawk, mai dee laig praok ding plak in plak an koe phwan sawk mai nawh tiag ti yaox krax lang koe tixpon sawk mai krax vieh koe tixnga sawk heue.
3 Khaix an nawh laig ka lawg plak daux mai hoik tiag ti yaox rong diang siviex koe ra sawk mai diang dee laig an krax vieh koe liah sawk mai krax lhaong diang laig an koe aliah sawk heue.
4 Nawh tiag ti yaox daux lawg an, krax lang koe tixnga sawk mai krax vieh koe tixnga sawk mai nawh ah nin ka aux, ka plak toi nyiex bwan pa singax, in mawh dee pa kied singax singeh heue.
5 Khaix an nawh tiag ti yaox ding nyiex bwan, krax pu koe liah sawk mai lawg pa koe hawt vung viang nyiex bwan, krax vieh koe pon sawk ku mu heue.
6 Lawg pa koe praok khankix koe loe can, daux tix can koe tixngoe lawg, lawg ghoik ka piang ang lai lo ka rong joh, mawh kheu hoik neung tix ka khaox lat ding nyiex bwan heue.
7 Phan yeh nyiex haok tix glawk hoik tix glawk, lawg pa koe praok ding kawx nie vieh hu sipie hawt vung viang khawmuik, mawh kheu lat pa joh ka ding nyiex bwan khankix hoik lih dung awm glawk bawng, mawh kheu nan, pakpeung krax vieh nyiex bwan an hoik baox nie hu awm haok glawk jah ka plak greem glawk sigreung tom hoek ka glawk plak piang heue.
8 Aux baox yaox plak dee lhaong num riah nyiex bwan hawt vung viang khawmuik mai num riah nyiex bwan an koe tix diag khaox tiag mai lhaong liah sawk heue.
9 Krax pu ding lawg plak praix koe phwan sawk mai lawg pa deuk khankix kleuk tix mai nyiex bwan,
10 ding lawg pa koe hawt vung viang ding nyiex bwan, keu paox tix tixnga sawk khaing paox tix ku mu heue.
11 Siviex pa koe ka praok hoik paoh tix plak laong krax an mai siviex an veeh tix see plak laong mai an tang mu veeh tix ka plak see piak seh mai krax vieh blawng krax an koe phwan sawk hawt vung viang khawmuik heue.
12 Nyiex pa koe sivoe brawk nyiex bwan plak klip singaix, plak vieh koe tigliah sawk, mai ding hawt vung viang nyiex an krax pu koe phwan sawk mai krax lang koe tixdim sawk.
13 Khaix an nawh tiag ti yaox krax lang nyiex bwan, koe tix yieh sawk mai sinax brawk nyiex tom hoek ka ding lang tix yieh sawk,
14 krax vieh brawk nyiex bwan plak lih singaix koe tix yieh sawk heue.
15 Nawh tiag ti yaox, krax lang brawk nyiex an pa veeh tix plak lih singaix, tau mai brawk plak klip singaix khawm lawg nyiex pa koe ka praok plak an plak in koe tix yieh sawk heue.
16 Pang siviex mai lat siviex iak mai pang siviex iak pa koe hawt vung viang glawk loe can, pa jah ka meeh phia tom hoek ka siviex iak, plak piang hoik tawm hoik kab ka phia khawmuik,
17 ka siviex iak siviex ting plak praix plak daux khawmuik mai khawm ka piang hawt vung viang ding plak daux mai plak praix, nawh tiag ti yaox heue.
18 Koe riang Cherubin mai khaox jhie yaong tix pang koe sinax Cherubin ra mu. Cherubin an tix mu koe pakngai ra mu,
19 mai hoik tawk tix sau pakngai pui tix kaux ka see pang khaox jhie yaong tix pang ka praok mai ka pakngai sivai sangsi awn ju an tix mu ka see pang khaox jhie yaong an mai kix tawk tix sau an khankix ka hawt vung viang nyiex bwan khawmuik heue.
20 Jah khaing piang meeh tawm hoek ka daux piang siviex ting mai ka piang ding khawmuik tawk tix sau riang Cherubin mai riang khaox jhie yaong ka khawmuik heue.
21 Rong siviex nyiex bwan khankix koe pakpeung pon daog mai khu dee tan pa koe plak sivoe dee pa singax singeh an kawx hoik awm pakpeung rong siviex nyiex bwan an heue.
22 Khu tan pa yuh ka khaox, krax lhaong koe loe sawk mai krax vieh koe ra sawk, rong khawm pon daog mai plak daux khawm ding yuh tix ka khaox khawmuik mai nawh ah nin ka aux, “In mawh pheen pa deuh ka plak sivoe Siyiex heue.”
23 Nyiex bwan mai dee pa singax singeh an koe siviex ting ra mu heue.
24 Siviex ting koe plah siviex ra mu, mawh pa chix niiep tix laig khawm ra mu tau heue.
25 Awm saik kix tix sau riang Cherubin mai riang khaox jhie yaong ka piang ding nyiex bwan khankix, ka piang plah siviex nyiex bwan khankix kawx, hoik saik ti sau awm an, mai tawk ti sau phia ka piang sidub nyiex plak praix heue.
26 Daux siviex iak hoik saik ti sau riang khaox jhie yaong ka piang praok plak in mai plak an, ka piang praok sidub nyiex mai vung viang ka piang praok nyiex bwan mai ka piang pang siviex heue.