1 Yam kawn mawh ex pui pa giex laung ka daux tixnga phwan num tix num, khix tix kao ngaix, yam hoik naog laux veng Yerusaliem kao pon num, ka daux ngaix an, plawng taix Siyiex hoik koe ka piang aux mai Nawh Cao viex aux hu ka veng an. 2 Ka daux riang susai Siyiex, Nawh Cao viex aux hu ka daux haktiex Isarelax mai hoik deuh aux ka piang gawng an see plak seh hoik koe pa awm pakpeung veng tix mu heue.Ref 40:2 Jhi 21:10 3 Nawh Cao viex aux hu tan, jhak heue, pui tix kaux hoek awm grang pakpeung tawng lheung hoek bleeh tan, tau mai pa giex gawng priem mai maox diag tiag tix nyaing ka daux taix tix mai cung ka diang siviex veng heue.Ref 40:3 Jhi 11:1, 21:15 4 Pui an ah nin ka aux, “Kawn kawn pui heue, jhak ka ngai maix mai nghiet ka yhaok maix mhawm mhawm mai priex can ceu pa sang jhi Aux ka maix, ka daux rhawm rhi tix, Aux hoik viex maix hoek tin, sonsang krai maix can ceu pa yaox maix kuceu ka nyiex ma ceu pui Isarelax heue.” 5 Jhak heue, guh veng hoek hawt vung viang plak praix nyiex bwan, ka daux taix pui an koe khaox diag tiag pa lang liah sawk ka tix gawng, tix diag khaox an koe been tix sawk mai tix tiag taix mai nawh tiag ti yaox ka krax vieh guh veng an koe tix diag khaox tiag an tix gawng mai krax lhaong kawx awm an heue.Ref 40:5-42:20 1Sim 6:1-38; 2Been 3:1-9

6 Khaix an nawh laig ka diang siviex plak lih singaix mai haok ka glawk bawng khankix mai tiag ti yaox diang siviex an, plak vieh koe tix diag khaox tiag an mai plak lhaong kawx awm an heue. 7 Nyiex pau yam, krax lhaong koe tix diag khaox tiag mai krax vieh kawx koe tix diag khaox tiag an, mai sinax lawg pau yam khankix, khan paox tix, tix lawg hoik tix lawg phwan sawk. diang siviex laig plak daux koe tix diag khaox tiag heue. 8 Nawh deeh baox tiag ti yaox siviex sidub plak daux mai koe daix sawk heue. 9 Rong sidub an khankix koe ra sawk mai sidub an koe ka praok plak daux heue. 10 Ka diang siviex plak lih singaix ka plak in plak an tang koe nyiex pau yam ka loe mu, an loe mu krax lhaong krax vieh hoik sidu lhaong awm paox tix mai rong kawx sidu lhaong awm paox tix heue. 11 Nawh tiag ti yaox plak vieh diang laig daux siviex an koe kao sawk mai krax lhaong daux siviex an koe kao loe sawk heue. 12 Ka sivoe ngai lawg pau yam an koe ding pa khan plak in plak an, pa vieh tix sawk, lawg pa koe plak in plak an plak vieh mai plak lhaong koe liah sawk awm paox heue. 13 Khaix an nawh tiag ti yaox braux lawg jah khaing braux plak in tom hoek braux lawg plak an pa hu krax sinax plak vieh koe tixnga phwan sawk mai siviex lawg an kix see paox tix heue. 14 Nawh jah ti tiag ka rong sidub tom hoek ka brawk nyiex koe tigliah sawk. 15 Jah khaing siviex laig plak praix tom hoek ka siviex sidub nyiex, pa laig plak daux koe tixphwan sawk. 16 Hawt vung viang daux krax siviex veng koe siviex iak ka mai siviex iak an khankix sikhawp hu sipie tom hoek ka diang siviex sidub nyiex, lheu khaing an ka plak daux sidub nyiex koe siviex iak hawt vung viang mai ka piang pang siviex iak khankix ku mu koe riang khaox jhie yaong kah. 17 Khaix an nawh viex aux hu plak praix ka brawk, jhak heue, kix tawm simaox jah ka daux lawg tom hoek ka brawk nyiex mai lawg pa tawm simaox koe tixngoe lawg heue. 18 Simaox pa tawm an, koe hawt praok krax hu ka diang siviex khankix mai sidu lang awm siviex an khankix, in mawh simaox tawm ka dee tiem heue. 19 Khaix an nawh tiag ti yaox krax vieh, jah khaing sivoe siviex veng plak greem tom hoek ka sivoe brawk, koe tix yieh sawk, pa koe see plak lih singaix mai ka plak laong heue.

20 Khaix an nawh tiag ti yaox krax vieh krax lang siviex veng pa veeh ngai tix plak laong heue. 21 Nyiex pau yam plak an plak in koe lawg tix plak loe lawg, pang siviex mai pang sidub an sidu awm pang siviex pa koe sivoe khankix, krax lang koe been tixphwan sawk mai krax vieh koe tixnga phwan sawk heue. 22 Siviex iak mai sidub koe riang khaox jhie yaong pa awm pa hoik koe ka siviex veng sivoe an, pa veeh ngai tix ka plak lih singaix, koe glawk bawng aliah glawk pa haok ka siviex an mai sidub koe ka plak daux heue. 23 Siviex veng ot see plak siviex plak krax laong mai awm daux siviex veng pa koe plak lih singaix mai koe siviex pa laig ka lawg plak daux mai nawh tiag ti yaox ka siviex tix mu hoik tix mu koe tix yieh sawk heue.

24 Khaix an nawh viex aux hu plak seh mai yaox ka koe siviex ka plak seh tix mu tan mai nawh tiag ti yaox pang siviex sidub khankix hoik awm diag pa koe sivoe an heue. 25 Dee an koe siviex iak hawt vung viang sidub, awm siviex iak pa koe sivoe khankix, krax lang koe tixphwan sawk mai krax vieh koe tixnga phwan sawk heue. 26 Koe glawk bawng aliah glawk pa haok ka siviex an mai sidub an koe ka plak daux sivoe bawng an, pang siviex plak in plak an koe riang khaox jhie yaong ka tix plak tix mu heue. 27 Koe siviex ka plak seh pa laig ka plak daux tix mu mai nawh tiag ti yaox siviex veng tix mu hoik tix mu tom hoek ka plak seh koe tix yieh sawk heue.

28 Khaix an nawh viex aux laig ka daux siviex veng ka brawk an plak seh mai nawh tiag ti yaox siviex veng plak seh, pa hoik sidu awm pa hoik koe sivoe heue. 29 Nyiex pau yam mai pang siviex mai sidub sidu awm pa koe sivoe khankix mai siviex iak koe hawt vung viang ka daux sidub an, krax lang koe tixphwan sawk mai krax vieh koe tixnga phwan sawk heue. 30 Sidub pa koe hawt vung viang baoh an khawmuik, krax lang koe tixnga phwan sawk mai krax vieh koe phwan sawk heue. 31 Sidub nyiex veeh ngai tix ka plak praix brawk nyiex mai ka pang siviex koe riang khaox jhie yaong ka mai koe glawk bawng ka daix glawk heue. 32 Khaix an nawh viex aux laig ka daux brawk nyiex plak lih singaix mai nawh tiag ti yaox siviex veng an, awm diag pa hoik koe sivoe an heue. 33 Nyiex pau yam mai pang siviex mai sidub nyiex hoik awm diag pa koe sivoe an mai siviex iak koe ka daux hawt vung viang sidub nyiex, krax lang koe tixphwan sawk mai krax vieh koe tixnga phwan sawk heue. 34 Sidub an veeh ngai tix see plak praix brawk nyiex mai ka piang pang siviex plak in plak an koe riang khaox jhie yaong tix plak tix mu mai koe glawk bawng ka daix glawk heue. 35 Khaix an nawh viex aux hu ka siviex veng pa koe ka plak laong mai nawh tiag ti yaox ka an, hoik awm diag pa hoik koe sivoe an heue. 36 Nyiex pau yam khankix, pang siviex mai sidub nyiex awm pa hoik koe sivoe an, mai hawt vung viang an koe siviex iak, krax lang koe tixphwan sawk mai krax vieh koe tixnga phwan sawk heue. 37 Sidub nyiex veeh pakngai ti see ka plak praix brawk nyiex mai ka pang siviex koe riang khaox jhie yaong ka plak an plak in tix plak tix mu mai koe glawk bawng ka daix glawk heue.

38 Koe lawg tix mu pa kleuk tix ka pang siviex pa laig daux lawg ting, lawg an mawh lawg dee sigrhah kix krax tan pa gleeing heue. 39 Ka daux siviex laig ka sidub an koe pheen ka praok plak in plak an tix plak ra mu, ka piang pheen an mawh dee pa sang pah kix krax tan pa gleeing mai krax tan pa pluat ploi phimap mai krax tan pa pluat krax lud heue. 40 Ka plak praix siviex laig ka sidub plak laong ka plak an plak in koe pheen ka tix plak ra mu heue. 41 Ka praok siviex plak in plak an koe pheen pon mu, khawmuik mawh pheen daix mu sonsang pah kix krax tan tix ka piang heue. 42 Koe pheen simaox pon mu, pa hoik bre tix saik mhawm mhawm, son krax tan pa gleeing, krax lang koe tix sawk plak mai krax vieh koe tix sawk plak mai krax lhaong koe tix sawk, pheen an mawh pa deuh kix kraung pa shiao tix khankix yam pah kix krax tan pa gleeing mai krax tan pa appong tix heue. 43 Hawt vung viang pheen an, kix phyawk gok rhiem pa lang tix diex ka, sonsang feuk kix nex krax tan pa appong tix ka piang heue.

44 Nawh viex aux lih khaing plak praix mai laig ka plak daux, ka dee an koe lawg ra lawg ka plak daux mai lawg an tix mu koe dex siviex veng plak laong mai veeh ngai tix plak seh mai lawg an tang lawg koe dex siviex veng plak seh mai veeh ngai tix plak laong heue. 45 Nawh ah nin ka aux, lawg pa veeh ngai tix plak seh in, mawh sonsang ot cao giex kaing li pa koe beeh glawm ti yuh kaing daux nyiex bwan heue. 46 Lawg an pa veeh ngai tix ka plak laong mawh sonsang ot cao giex kaing li pa koe beeh glawm ti yuh kaing ka khu dee tan, inkix mawh kawn simex Zadok, pa kaoh khaing daux cub kawn simex pui Lewix khankix, pa pon greed ti dex Siyiex khaing sonsang yuh kaing jhaw ka son Nawh Cao heue.

47 Nawh tiag ti yaox brawk nyiex, krax lang koe tix yieh sawk mai krax vieh koe tix yieh sawk, sidu paox tix khawm pon daog, khu dee tan koe ka plak sivoe nyiex bwan heue. 48 Khaix an nawh viex aux hu ka sidub nyiex bwan mai tiag ti yaox ka rong sidub khankix, rong sidub nyiex ku mu koe phwan sawk khawm ra plak mai krax vieh daux siviex an, koe tix plak loe sawk heue. 49 Krax lang sidub nyiex, koe tixnga sawk mai krax vieh koe kao tix sawk mai koe glawk bawng kao glawk pa sang haok ka, rong koe ka sivoe sidub nyiex tix plak tix mu heue.