1 Gumlox Siyiex hoek ka aux ah nin, 2 “Kawn pui eue, krai lox jhai ka cao liang yung ceu pui Isarelax, krai lox jhai mai ah nin ka kix, Siyiex ah nin ka cao liang yung, kieh krax kha rhawm koe ka cao liang yung pa priex ka tokaux khaing, mawh ang cao liang yung khankix priex ka cub yung kix lie?” 3 Pex nyaux ka rawm teeih yung mai ceep ka hauk yung mai pah ti ih yung pa kluing, viang mawh nan, pex ang tawx yung ih priex heue. 4 “Pex ang teem ka yung pa iak riang mai pex ang pai ka yung pa saux mai ang kie sidah ka yung pa pot si-ang mai ang deeh viex yung pa grheu to deeh hoek mai ang sawg ka yung pa hoik grai an. Viang mawh nan, pex kwang ka kix ka daux pa lang teung kin heue. 5 “Mawh kheu nan, kix hoik prung prang kheu ang cao liang yung lai koe, mai kix lih ti mawh ceu pa ih son totiag, yam hoik prung prang rairuat kix heue.”Ref 34:5 Si 27:17; 1Sim 22:17; Mat 9:36; Mak 6:34 6 “Yung Aux khankix hoik vung viang, ka piang gawng lua an mai ka piang ton gawng lhaong khankix, cub yung Aux khankix hoik prung prang rairuat sidah piang ca haktiex khawmuik mai pui pa sawg pa khrieh ka nawh ang lai koe tix kaux kawx heue.” 7 “Mawh kheu nan, pex pa mawh cao liang yung khankix eue, nghiet ka gumlox Siyiex heue.” 8 “Siyiex ah nin, awm im ju Aux, kheu jao hoik lih mawh cub yung Aux pa tud rhim mai lih ti mawh priex pa ih totiag kheu ang cao liang yung lai koe, mai ang cao liang yung hawt sawg ka cub yung Aux khankix, viang mawh nan, cao liang yung khankix priex tokaux cao khaing mai ang tawx priex ih cub yung Aux khankix, 9 Mawh kheu nan, cao liang yung khankix eue, nghiet ka gumlox Siyiex, 10 Siyiex ah nin, “Jhak heue, Aux tak yuh cao liang yung an khankix laux, mai Aux tak deeh mhaing cub yung Aux khaing daux taix kix, Aux tak pluat kix khaing cao liang yung, mai kix tak ang lai yaox ti priex tokaux cao tix, khaix in tix bawg kawx, Aux tak sang deeh taoh cub yung Aux khankix khaing daux jheeh kix, son ang lai mawh pa ih son kix heue.

11 Siyiex ah nin, “Tokaux Aux tak sang hu sawg ka yung tix mai taoh ka kix,” 12 “Awm sawg cao liang yung tix khrawm ka cub yung tix daux sinax yung pa hoik prung prang khankix, awm an Aux tak sawg yung Aux khankix mai deeh taoh ka kix, khaing dee pa hoik prung prang kix ka daux singaix ceep paiawm mai singaix koe pa kied faik heue.” 13 “Aux tak viex kix lih khaing ceu pui khankix mai khrawm kix khaing haktiex an mai deeh viex hoek ka haktiex cao kix, mai Aux tak liang kix ka piang gawng lua haktiex Isarelax mai ka praok rawm klawng khankix mai ka can dee ot pui daux haktiex an heue.” 14 “Aux tak sang liang kix ka dee mhawm rib mai kawg kix tak koe ka piang gawng lhaong haktiex Isarelax, kix tak it ka daux kawg pa mhawm mai yaox tix sawm ka dee kied mhawm klai rib khankix ka piang gawng haktiex Isarelax heue. 15 “Aux tak liang ka cub yung Aux mai Aux tak kieh kix it, Siyiex ah nan heue. 16 “Aux tak sawg ka yung pa grai mai deeh viex yung pa hoik grheu ti tik khankix hoek mai kie ka dee pot si-ang ka man mai tawx riang rao ka yung pa awn riang khankix, viang mawh nan, Aux tak kieh yung pa kluing mai pa koe riang khankix laux leeing mai liang kix ka daux krax prawng krax ciyang heue.Ref 34:16 Luk 19:10 17 Phan mawh son pex, cub yung Aux khankix eue, Siyiex ah nin jhak heue, Aux tak sang prawng ca sinax yung mai yung khankix mai sinax yung mhaing mai pex mhaing khankix heue. 18 Pex yaox ti ih ka dee pa kied mhawm klai rib mai dig rib pa kawn deuk ka caong tix, pex keud mawh pa kied iak ka son pex lie? Mai pex yaox ti nyaux rawm singaong mai dig ka rawm pa kawn deuk khankix ka caong tix kieh sigu, pex keud mawh pa iak ka son pex lie? 19 “Yung Aux khankix ih rib pa hoik dig pex ka caong tix mai nyaux rawm pa hoik sigu dig pex ka caong tix heue.” 20 “Mawh kheu nan, Siyiex ah nin ka kix, jhak heue, tokaux cao Aux, tak prawng ca sinax yung pa kluing mai yung pa krawx heue.” 21 Mawh kheu hoik cot pex paw kix, klip kix mai teed yung pa iak riang an khankix, prung prang hu kudah kudee, 22 Aux tak taoh cub yung Aux mai ang lai mawh pa rhim totiag ka mai Aux tak sang prawng ca sinax yung khankix heue. 23 “Aux tak deuh cao liang yung koe tix kaux ka piang kix mai nawh tak sang liang kix, mai nawh tak mawh kawncau Aux Davit, nawh tak sang liang kix mai mawh cao liang yung ka piang kix heue.” Ref 34:23 Jhi 7:17 24 “Aux pa mawh Siyiex, tak mawh Siyiex kix mai kawncau Aux Davit tak mawh simiang kix, Aux pa mawh Siyiex hoik krai nawh heue.”Ref 34:24 Yez 37:24 25 “Aux tak yuh gumlox sijax mukheu pa nhim tau mai kix mai kieh totiag pa vao grai khaing haktiex an mai kix tak yaox ti ot yiien yawg ka daux tiagtu mai yaox tix nyawm it ka daux nong heue. 26 “Aux tak kieh kix ot rawb rim gawng Aux mai pon bwanson pa nawb Aux, mai tak kieh lhiex lih ka daux bawg yam kix mai lhiex bwanson tak sang lih tan heue.” 27 Khaox daux tiag khankix tak sang koe plix mai haktiex tak sang tawx plix simie, kix tak yaox ti ot yiien yawg ka daux haktiex tix mai kix tak tawng ka mawh Aux Siyiex, yam hoik tat Aux ti tik maox khaox glawm kix, mai yam taoh Aux kix khaing daux tawm taix pui pa kin kieh kix yuh siliex heue. 28 “Kix tak ang lai mawh pa rhim son ceu pui tang ceu mai totiag haktiex tak ang lai pon kiied ti ih kix, kix tak yaox ti ot yiien yawg mai pui tix kaux kawx ang lai pon kieh kix koe krax lhat graung heue.” 29 “Aux tak khre sipeem pa koe min plakngai ka son kix mai kix tak ang lai koe pa laux leeing ka pa cai rhawm ka daux haktiex mai ang lai yaox ti kham krax kaig tua pa yuh pui tang ceu khaix in tix bawg kawx heue.” 30 Kix tak tawng ka mawh Aux, Siyiex pa mawh Siyiex Cao kix, pa ot tau mai kix mai pa mawh nyiex ma ceu pui Isarelax, pui cie Aux, Siyiex ah nan heue. 31 “Pex mawh cub yung Aux, pa sawm dee klai rib Aux, pex mawh pui Aux mai Aux mawh Siyiex pex, Siyiex ah nan heue.