1 Gumlox Siyiex hoek ka aux ah nin, 2 “Kawn pui eue, krai ka pui maix khankix ah nin, yam viex Aux lawm vaig hoek ka haktiex tixdah pui haktiex an laug ka pui tix kaux khaing daux haktiex kix mai kieh nawh mawh cao pa pau son kix, 3 yam yaox pui an ka hoik bleeh lawm vaig ka piang haktiex mai phan nawh phlu teettawng mai tawx satix ka pui khankix, 4 khaix an pui mawx ang ah, pa mhong ka lox teettawng mai ang rien rhawm tix, phan lawm vaig an hoek bleeh mai phan nawh som ju tix, nham phimap nawh tak koe ka piang kaing cao nawh heue. 5 Pui pa mhong ka lox teettawng mai ang rien rhawm tix, nham phimap nawh tak koe ka piang cao nawh, viang mawh nan, pui pa rien rhawm tix tak pon taoh ka ju tix heue. 6 “Viang mawh nan, phan cao pau yaox ka hoek lawm vaig mai ang phlu lox teettawng mai pui khankix ang yaox tix rien rhawm tix mai lawm vaig an hoek bleeh kieh pui tix kaux kaux som ju tix daux sinax kix ka daux pa koe phimap tix kawx, viang mawh nan, Aux tak sang mhaing ngawh nham phimap nawh khaing taix cao pa pau heue. 7 “Mawh kheu nan maix pa mawh kawn pui eue, Aux hoik kieh maix mawh cao pau, son nyiex ma ceu pui Isarelax, maix tak yaox ti tawx satix ka kix khaing gumlox pa hoik mhong maix khaing daux jheeh Aux heue.” 8 “Yam ah Aux nin ka pui caox caig an, pui caox caig eue maix tak yaox ti yum tete maix ang tawx satix ka pui caox caig an sonsang veeh khaing daux krax pa yuh nawh mai pui caox caig an tak yum ka daux pa caox caig yuh tix, viang mawh nan, Aux tak mhaing ngawh nham phimap nawh khaing taix maix heue.” 9 Phan maix hoik tawx satix ka pui caox caig an sonsang veeh khaing krax pa yuh tix, phan nawh ang veeh khaing daux krax pa yuh cao tix, nawh tak yum ka daux pa caox caig pa yuh tix, viang mawh nan maix hoik taoh ka ju tix heue.” 10 “Maix pa mawh kawn pui eue, krai ah nin ka nyiex ma ceu pui Isarelax, pex krai yuh nin, phan pa lud ex mai phimap koe ka piang cao ex mai hoik koe krax pa awn riang rao ka, mawh sang pon im ju ex yuh ka mawx lie?” 11 “Krai ka kix, Siyiex ah nin, Ref 33:11 Yez 18:23, 32awm im ju Aux, Aux ang nyawm rhawm ka yum pui caox caig, viang mawh nan, Aux koe rhawm ka veeh pui caox caig khaing daux krax pa yuh tix mai im ju, nyiex ma ceu pui Isarelax khankix eue, deeh veeh tix, deeh veeh khaing daux pa caox caig pa yuh pex, mawh kheu tix pex lai simie ti yum yuh ka mawx lie?”

12 “Maix pa mawh kawn pui eue, krai ka ceu pui maix khankix, phan pui rahsee lud, krax rahsee nawh glang ka an, ang pon taoh nawh ngaix pa koe krax lud nawh, phan pui pa caox caig via khaing pa caox caig yuh tix, nawh ang koe krax som nai, kheu jao singaix deeh veeh nawh khaing pa caox caig yuh tix mai pui rahsee kawx, tak ang pon tix im ju kheu jao singaix koe krax lud nawh heue.” 13 “Yam ah Aux nin ka pui rahsee nawh sang pon tix im ju tete kawx, phan nawh kawn een rhawm ka krax pa rahsee tix mai lud, pa rahsee yuh nawh khankix, tak mawh pa ang lai deeh doh keud ka, viang mawh nan, nawh tak yum kheu phimap pa lud tix heue. 14 Yam deeh ah Aux nin ka pui pa caox caig maix tak yaox ti yum tete, phan nawh deeh veeh khaing pa caox caig yuh tix mai yuh awm pa koe ka daux lox lai beenli mai yuh ceu pa rahsee, 15 phan pui pa caox caig an, deeh tawx ceu pa hoik tang pui ka nawh mai kraung pa rhim nawh khankix mai lawng ti hu ka daux krax pa im ju pa mawh lox tat jhawm prawng mai ang lai yuh phimap, nawh tak yaox ti im ju mai ang yaox ti yum kah heue. 16 Phimap pa hoik lud yuh nawh khankix tak ang lai deeh doh keud ka piang nawh tix ceu kawx, kheu hoik yuh nawh pa khaw caw mai pa rahsee, nawh tak pon tix im ju ka tete heue.” 17 Viang mawh nan, ceu pui maix khankix kawn ah nin, pa prawng ca Siyiex ang rahsee, mawh ngie pa prawng ca kix pa ang rahsee khaing heue. 18 Phan pui rahsee tik vud pa rahsee tix mai deeh yuh pa caox caig, nawh tak yum kheu jao an heue. 19 “Phan pui caox caig deeh veeh khaing pa rahsee, nawh tak im ju kheu jao an heue.” 20 “Viang yuh nan, pex ah nin, pa prawng ca Siyiex ang rahsee, nyiex ma ceu pui Isarelax eue, Aux tak prawng ca ka pex ku kaux awm kaing pa yuh pex heue.”

21 Yam hoek num pa giex laung ex, ka daux kao ra num, khix kao, phwan ngaix, pui tix kaux pa to tix glawd khaing veng Yerusaliem, hoek ka aux ah nin, “Veng hoik laux leeing heue.Ref 33:21 2Sim 25:3-10; Ye 39:2-8, 52:4-14 22 Yam in taix Siyiex koe ka piang aux, plak ponbo sivoe ang pui pa glawd an nyang hoek ka aux, yam hoik bleeh pui an tix hoek ka aux plak ponngawb, Nawh cao paoh daux jheeh aux mawh kheu nan jheeh aux chix sikah heue.”

23 Gumlox Siyiex hoek ka aux, 24 “Kawn pui eue, kix pa kawn ot daux haktiex Isarelax pa laux leeing khankix, ca kawn ah nin, mawh Abraham tix kaux khaing, pa pon haktiex in mawh sinngao tix, viang mawh nan, yix mawh pui hun, haktiex in hoik mawh sinngao pa tawx ka son yix heue.” 25 “Mawh kheu nan, krai ka kix, Siyiex ah nin, pex ih nex tau mai nham mai yaog ngai ti jhak ka riang grang krub pex mai kieh nham jauh, kawn keud pex ti sang pon cie haktiex in lie?” 26 “Pex een rhawm ka lawm vaig tix, pex hoik yuh ceu pa seeing brai lud vao mai moeng paox tix, kawn keud pex ti sang pon ti cie haktiex in lie? 27 Ah nin ka kix, Siyiex ah nin, “Awm im ju Aux, pui pa ot ka dah dee pa laux leeing khankix, tak goh yum ka lawm vaig mai pui ot ka daux lung daux blang, Aux tak ap totiag vao kiied tix ih kix mai pui pa ot ka daux dee pa kaux cong mai ka daux rang khankix, tak yum ka jhawm saux preng heue.” 28 “Aux tak sang yuh haktiex in mawh dee pa laux leeing yiien yawg mai riang rao min plakngai kix kawx tak grai, mai gawng haktiex Isarelax khankix kawx tak mawh pa yiien mai ang koe pui pa lailing ka dee an tix kaux kawx heue.” 29 “Khaix an kix tak tawng ka mawh Aux Siyiex, yam hoik yuh Aux haktiex in mawh dee pa laux leeing pa yiien kheu jao pa seeing brai yuh kix kuceu heue.”

30 Lheu khaing an maix pa mawh kawn pui eue, ceu pui maix khankix kawn krai grawng maix hawt praok ding nyiex mai ka hawt diang siviex nyiex mai kix ca sikah tau mai paox tix, tix kaux lai tix kaux mai ka puxaik tix, ‘Hoek! ex nghiet mawh gumlox ceu tix, pa kaoh khaing Siyiex.’ 31 Kix hoek ka maix awm khrawm pui hun paox tix, kix ngawm ka plak sivoe maix awm ceu pui Aux mai kix mhong ka gumlox maix, viang mawh nan, kix ang hawt ti yuh, viang jheeh kix jhi mhai rug pa kied moh tix kawx, rhawm rhi kix hawt khaix pa ghoing ka sinngao haktiex heue. 32 “Maix awm lox rhax pa kied nyawm ti nghiet khaing pui pa koe lox pa naog ka ceu pa khaw rhawm khaing cao pa jiet chix tah ting ka son kix, viang kix mhong lox maix kawx, kix ang hawt ti yuh heue.” 33 Yam hoek bleeh an, an tak hoek bleeh tete, khaix an, kix tak tawng ka hoik dawg ot cao jhai tix kaux sinax kix heue.