35
1 Gumlox Siyiex hoek ka aux ah nin, Ref 35:1-15 Isa 34:5-17, 63:1-6; Ye 49:7-22; Yez 25:12-14; Amo 1:11-12; Aw 1-14; Ma 1:2-5
2 “Kawn pui eue, veeh ngai maix ka plak gawng Sirax mai krai lox jhai pa yuh laux ka piang nawh,
3 ah nin ka nawh, Siyiex ah nin, gawng Sirax eue, Aux tak yuh maix laux leeing, Aux tak nyeu taix tix ka piang maix mai yuh maix laux kieh mawh dee pa yiien heue.”
4 “Aux tak kieh veng maix mawh pa laux leeing mai maix tak mawh dee pa yiien, mai maix tak tawng ka mawh Aux Siyiex heue.”
5 “Mawh kheu jao hoik dawg koe rhawm pa koeng maix sijheeng mai hoik kieh nham kawn praix ceu pui Isarelax jauh ka lawm vaig yam koe krax kha rhawm kix, yam hoek dee sidah phimap yuh kix,
6 mawh kheu nan Siyiex ah nin, awm im ju Aux, Aux tak khre pa jauh nham ka son maix mai nham phimap an tak hawt khaix maix, kheu ang maix koeng ka pa jauh nham, mawh kheu nan, nham an tak hawt khaix maix heue.
7 Aux tak yuh gawng Sirax mawh dee pa yiien mai tat ti tik pui pa lih mai pui pa laig khankix daux nawh heue.
8 “Aux tak kieh gawng maix khankix naog ka pa yum mai ka piang ton mai ka daux lung daux ngawd mai hawt klawng, pui pa yum ka lawm vaig tak koe ka heue.”
9 “Aux tak kieh maix mawh dee pa yiien jheung jheung mai veng maix tak mawh dee ang pui lai ot ka, khaix an maix tak tawng ka mawh Aux Siyiex heue.”
10 “Mawh kheu maix hoik ah nin, ka ceu pui ra ceu mai ka haktiex inkix ra dah tak mawh cie aux mai ex tak pon ti cie ka inkix, viang Siyiex hoik ot tan kawx,
11 mawh kheu nan, Siyiex ah nin, awm im ju Aux, Aux tak sang yuh awm pa song rhawm maix mai awm pa boh rhawm maix, pa hoik jhi maix pa koeng tix ka piang kix, mai Aux tak kieh kix tawng ka daux singaix yam ciyang aux ka maix heue.”
12 Maix tak tawng ka mawh Aux Siyiex, mhong ka lox pa lud maix khawmuik, pa mawh lox pa sibriem maix ka gawng lua haktiex Isarelax khankix pa ah nin, kix tak mawh dee pa yiien mai kix tak mawh pa tawx son pa sang ih yix heue.
13 “Awm an mai jheeh maix hoik ah lox yaw rangdi piang Aux mai hoik baox ah lox haoh hun ka piang Aux, Aux hoik mhong ka lox an heue.
14 Siyiex ah nin, haktiex khawmuik tak koe krax gaux rhawm, yam yuh Aux maix laux leeing heue.”
15 “Awm hoik gaux rhawm maix ka laux leeing haktiex sinngao nyiex ma ceu pui Isarelax, Aux yuh ka maix awm an, gawng Sirax eue maix tak laux leeing awm laux leeing haktiex Edom mai can pa koe ka daux nawh khawmuik, khaix an kix tak tawng ka mawh Aux Siyiex heue.