1 Yam hoek ka daux kao ra num tix num, khix kao ra tix ngaix, gumlox Siyiex hoek ka aux ah nin, 2 Kawn pui eue, yiiem doe ka son Pharaw, simiang meung Ejiptux mai ah nin ka nawh, “Maix mawh pa awm sivai sangsi pa awn ju daux sinax ceu pui khankix mai mawh pa awm goe rawm ka daux rawm sigrit sigra mai yam tiang maix tix hu khaing daux rawm klawng mai kieh rawm sigu ka caong tix mai pa seeing sioe yuh rawm klawng heue.” 3 Siyiex ah nin, “Aux tak ploi rub lih ka piang maix, tau mai cub pui hun mai kix tak sang bluh maix haok ka rub Aux heue. 4 Aux tak prah maix ka piang tiex mai tik maix ka piang dee sidawm tiex, daux tong khankix mai kieh sim sai daux raoma hoek tum ka piang maix mai Aux tak sang kieh totiag piang haktiex khawmuik sak ka maix heue. 5 Aux tak sang nih nex maix ka piang gawng lua mai to yum maix tak naog yuh daux tong daux ngawd, 6 Aux tak kieh haktiex caux ka nham maix, tom hoek ka piang gawng lua mai rawm klawng khankix tak sang naog ka nham maix heue. 7 Yam yuh Aux maix laux leeing, Aux tak pie lhien ka raoma mai kieh simuing khankix faik, Aux tak tawp kheem singaix ka paiawm mai khix tak ang lai tawx pa riang tix heue.Ref 32:7 Isa 13:10; Mat 24:29; Mak 13:24-25; Luk 21:25; Jhi 6:12-13, 8:12 8 Can pa jhan riang tix lih khaing raoma khawmuik Aux tak kieh faik ka piang maix mai kieh pa faik kheem ka piang haktiex maix, “Siyiex ah nan heue. 9 “Yam viex Aux krax laux leeing maix hoek sinax ceu pui khankix, ka daux haktiex pa ang maix sax tawng, Aux tak kieh pui tom nie khi rhawm heue. 10 Aux tak sang yuh pui tom nie, koe krax daox am ka maix mai simiang tak koe krax lhat graung ka maix, yam nyeu Aux vaig tix ka plak sivoe kix mai kix tak khi rhawm ku bawg yam, ka son ju tix ku kaux, ka daux ngaix yam goh grhup maix heue. 11 Mawh kheu Siyiex ah yuh nin, lawm vaig simiang Babulon tak hoek ka piang maix heue. 12 Aux tak kieh pui hun maix goh ti yum ka lawm vaig pui pa ting riang rao an khankix, pa mawh ceu pui pa tawx krax pa kied lhat ka sinax ceu pui kix tak yuh pa ting rhawm ca nyhau Ejiptux mai khawm pui hun nawh khankix hoek krax laux leeing heue. 13 Aux tak kieh to brie cie nawh pa sawg tix ih priex hawt praok rawm klawng laux leeing mai tak ang lai kieh caong pui mai caong to brie khankix sigu yuh rawm khaix in pie tix bawg kawx heue. 14 Khaix an Aux tak deeh kieh rawm kix singaong mai kieh rawm klawng kix hu awm bee, Siyiex ah nan heue. 15 “Yam yuh Aux haktiex meung Ejiptux mawh dee pa yiien mai kieh haktiex an mawh pa ang lai koe tidtix tix ceu kawx, pa hoik grum koe nawh glang ka an tix bawg dix, yam prawng ca Aux ka pui pa ot ka daux haktiex an khawmuik, khaix an, kix tak tawng ka mawh Aux Siyiex heue.” 16 “In mawh grawng pa khi rhawm pa tak sang koe krax yiiem doe kix ka son nawh, kawn bun ceu pui khankix tak khi rhawm yiiem doe, ka son meung Ejiptux mai son pui hun nawh khawmuik,” Siyiex ah nan heue.

17 Yam baox hoek ka daux kao ra num tix num, ka daux khix tix, kao phwan ngaix, gumlox Siyiex hoek ka aux ah nan, 18 “Kawn pui eue, yiiem doe ka son pui hun haktiex meung Ejiptux mai kix pa hoik tik lih ka daux tiag, cao nawh mai khawm kawn bun ceu pui pa kied ao min khankix, tau mai pui pa lih hu ka daux tiex, 19 Mawh nie lheu mhawm maix khaing pui mawx lie? Lih hu ot tau mai pui pa ang nyang pat hak khankix heue. 20 “Kix tak goh tix yum ka daux sigreung pui pa hoik pah yum ka vaig kheu mawh pa hoik ap nawh ka vaig, bluh nawh mai khawm pui nawh khawmuik lih heue.” 21 Pui pa kwa pa vao daux sinax pui pa ting riang ting rao tak sikah ka nawh khaing daux sigreung meung yum mai pui pa teem ka nawh, kix hoik lih hu ot tau mai pui pa ang nyang pat hak pa hoik yum ka vaig heue. 22 “Asurix mai cub pui nawh ot tau daux simeeig tan, hawt vung viang nawh kix sipaung kawn lien nawh ka, pa pah tix yum mai pa goh ti yum ka vaig heue,” 23 Simeeig nawh khankix, ot ka dee die daux simeeig mai cub pui nawh koe hawt vung viang moing simeeig nawh khawmuik, pa mawh pui pa hoik goh tix yum ka vaig, pa hoik kieh pui haktiex pa im ju lhat graung ka tix heue. 24 “Elam mai pui nawh khankix ot vung viang simeeig nawh tan, kix mawh pa pah tix yum mai pa goh ka vaig mai pa lih hu daux meung yum tau mai pui ang nyang pat hak tix, pa hoik kieh pui haktiex pa im ju khankix lhat graung ka tix, yam in, kix hoik pon krax kaig tua tau mai pui pa lih hu ka daux tiag heue.” 25 Kix hoik deuh dee it nawh ka daux sinax pa yum tau mai cub pui nawh mai simeeig kix koe hawt vung viang nawh khawmuik, kix khawmuik mawh pa ang nyang pat hak, mawh pa hoik pah yum ka vaig viang kix hoik kieh pui haktiex pa im ju lhat graung ka tix kawx, yam in kix tak yaox ti kham krax kaig tua tix tau mai pui pa lih hu ka daux tiex, nawh yaox ti ot ka daux sinax pa yum heue. 26 “Meshiet mai Tubalax, khawm cub pui nawh ot tan, simeeig kix koe hawt vung viang an khawmuik, kix mawh pa ang nyang pat hak mai mawh pa hoik pah tix yum ka vaig, viang kix hoik kieh pui haktiex pa im ju lhat graung ka tix kawx heue.” 27 Kix ang yaox ti it tau mai pui pa ting riang rao pa hoik goh ti yum ka daux pa ang nyang pat hak tix mai pa lih hu ka daux meung yum tau mai kraung naing tix kix hoik deuh vaig tix ka greem kaing tix mai plah tieb naing koe ka piang si-ang kix, kheu jao pa ting riang ting rao an hoik kieh pui haktiex pa im ju lhat graung ka tix heue. 28 Mawh kheu maix tak raig laux leeing ka daux sinax pui pa ang nyang pat hak mai it tau mai pui pa hoik pah ti yum ka vaig heue. 29 “Edom kawx koe tan, simiang nawh mai cao kaing cao kap khankix mai pa koe sibrawm mai pui ting riang rao kix hoik deuh tix tau mai pui pa pah tix yum ka vaig, mai kix tak it tau mai pui pa ang nyang pat hak khankix tau mai pui pa lih hu ka daux tiex heue. 30 Cub simiang haktiex plak laong mai pui Sidom khawmuik koe tan, lih hu tau mai pui pa yum, ka daux pa kaig tua, pa lhat graung, kheu sibrawm riang rao pa yuh tix, kix it ka daux pa ang tix nyang pat hak, tau mai pui pa hoik yum ka vaig mai yaox ti kham krax kaig tua, tau mai pui pa lih hu ka daux tiex heue. 31 Pharaw tak koe krax pa nyawm rhawm ka yaox tix cub pui hun nawh khankix mai cub kru naing nawh pa yum ka vaig daux naing, Siyiex ah nan heue. 32 Mawh kheu Aux hoik kieh krax lhat koe ka daux haktiex pa im ju, mai nawh hoik mawh pa deuh tix ka daux sinax pui pa ang nyang pat hak, tau mai pui pa hoik yum ka vaig mai khawm Pharaw mai cub pui hun nawh khawmuik, “Siyiex ah nan heue.”