1 Ka daux kao tix num tix num, ka daux khix loe, tix ngaix, gumlox Siyiex hoek ka aux ah nin, 2 “Kawn pui eue, krai ka Pharaw meung Ejiptux mai ka pui nawh khankix maix mawh pa ting sibrawm awm pui mawx lie? 3 Pui Surix mawh num khaox Arit ka daux Lebanon, tau mai kak pa mhawm grang mai pa koe veei ka daux nong tiag khaox mai pa lhaong gaw mai rao nyoig koe ka sinax yeem kak khaox ting an heue.” 4 “Rawm hoik kieh nawh kuah tix lih ting, greem tiex pa kied raux kieh nawh mawh pa kied lhaong mai rawm klawng khankix lih hu hawt vung viang ka dee hoik sum tix mai kieh rawm klawng iak caux yuh num khaox pa koe daux nong khawmuik heue. 5 Mawh kheu nan, nawh hoik lhaong khaing gaw khaox daux nong, kak nawh nie haoh hun mai kied lhaong, kheu jao kied nie rawm pa lih hu tan heue.” 6 Sim sai daux raoma yuh mheem tix ka piang kak nawh, ka greem kak nawh totiag hoik keh kawn tix ka, mai ka greem veei nawh ceu pui pa kied ting lhaong ot ka heue. 7 Kheu koe riah nawh ka dee nie rawm, nawh ting lhaong kak nawh kawx lang mai kied mhawm grang heue. 8 Num khaox Arit pa koe daux sipeem Siyiex an, tak ang pon mox ka nawh, num khaox gixRef 31:8 Jah 2:9; Jhi 2:7 mai num khaox Aramon ang grum awm kak nawh, can num khaox pa koe ka daux sipeem Siyiex khawmuik ang mhawm grang awm nawh heue. 9 Aux hoik yuh nawh mhawm grang ka pa haoh kak khankix, sonsang koe pa boh rhawm num khaox baoh Eden sipeem Siyiex ka nawh heue. 10 Siyiex ah nin, mawh kheu kied lhaong nawh mai kieh rao nyoik lhaong khaing sinax kak khaox an kix mai kieh rhawm nawh yaog ti lhaong ka daux pa yaw rangdi tix, 11 Aux ap nawh ka daux taix ceu pui pa kied ting riang rao mai kix yuh pa kin ka nawh awm pa hoik yuh nawh. Aux hoik grheu nawh lih kheu krax pa caox caig yuh nawh heue. 12 “Pui tang praix klawng ceu pui pa kied vao, tak kid nawh goh mai prah nawh. Kak nawh khankix cod ka piang gawng lua mai ka daux ngawd daux lung mai kak nawh hoik graig hawt rawm klawng pa koe daux haktiex khawmuik mai pui haktiex khankix hoik lih hu khaing greem veei nawh mai prah nawh heue.” 13 Sim sai daux raoma, tak sang tum ka piang kak pa kawn deuk mai totiag daux nong tak sang ot ka piang kak nawh khankix, 14 son ang num khaox pa koe hawt rawm pon yaw rangdi ka pa kied ting lhaong tix mai ang pon yaogyaw rao nyoig tix ka sinax kak mai son ang num khaox pa nyaux rawm khankix, tak ang lai pon tiag pa lhaong tix sigreung ankix, mawh kheu kix hoik dawg mawh pa ap tix ka krax yum, ka greem tiex sinax kawn pui, pa lih hu ka daux tiex heue. 15 Siyiex ah nin, “Ka daux ngaix yam hu nawh ka daux meung yum, Aux kieh krax khi rhawm koe son nawh mai kieh rawm dee pa raux an kheem ka nawh, Aux hoik gang ti deuh rawm klawng khankix mai Aux kieh gawng Lebanon koe krax khi rhawm son nawh mai num khaox daux nong khankix hoik fit hoik kroh kheu jao nawh heue.” 16 Aux kieh ceu pui sikua ka lox sinum rau nawh, yam tik Aux nawh lih ka daux meung yum, tau mai pui pa lih ka daux tiex, can num khaox pa koe ka daux Eden mai khaox pa kied mhawm khaing piang gawng Lebanon khankix, can pa pon tix nyaux ka rawm, hoik koe krax nyawm rhawm ka greem tiex tau heue. 17 Kix hoik lih hu tau ka daux meung yum, tau mai nawh, khawm pui pa yum ka vaig mai ceu pui pa mawh riang rao plawng taix nawh mai pa ot ka greem veei nawh sinax ceu pui khankix heue. 18 Maix hoik awm khaox pa koe min plakngai mai pa kied ting lhaong khaing khaox can pa koe ka daux sipeem Eden ang mawh lie? Tak sang viex maix laig tau mai khaox can pa koe ka daux sipeem Eden ka greem tiex, maix tak sang it tau mai pui pa ang pat hak mai pui pa yum ka vaig. “In mawh pa sang lih mawh ka Pharaw mai khawm pui nawh khawmuik Siyiex ah nan heue.