1 Gumlox Siyiex hoek ka aux ah nin, 2 “Kawn pui eue, krai lox jhai ah nin, Siyiex ah nin, alo ngaix pa sang hoek mawh ngaix pa kied ting koe krax pa laux rhawm heue. 3 Mawh kheu singaix an hoik dex, singaix Siyiex kawx hoik dex, singaix an, tak sang mawh singaix ceep paiawm, mawh bawg yam pa tat ti deuh son ceu pui khawmuik. 4 Vaig lawm tak sang hoek ka piang meung Ejiptux mai pa kied khi rhawm tak koe ka haktiex Ethiopia, yam koe ceu pa pah yum ka daux haktiex Ejiptux mai kix tak viex sinngao nawh hu mai raig jhong num nawh laux leeing heue. 5 Pui haktiex Ethiopia mai Putix mai Ludix mai Arabia khawmuik mai Libia mai pui pa yuh paox pie tau mai kix tak goh gup ka lawm vaig tau mai pui Ejiptux heue.” 6 Siyiex ah nin, “Pui pa joh jhan ka haktiex Ejiptux, tak goh gup mai min plakngai sibrawm pa yaw nawh rangdi tix tak grhup, jah khaing veng Migadawlax tom hoek ka veng Sune, pui pa ot ka daux nawh khankix, tak goh gup ka vaig, Siyiex ah nan heue.” 7 Nawh tak mawh dee pa yiien ka daux sigreung haktiex dee pa yiien mai veng nawh khankix tak ot ka daux sigreung pa laux leeing heue. 8 Khaix an kix tak tawng ka mawh Aux Siyiex, yam cux Aux ngu ka meung Ejiptux mai pui pa teem ka nawh tak laux leeing khawmuik heue. 9 “Ka daux ngaix an, cao cau pa ploi Aux khankix, tak brug reu ting, sonsang hu krai ka pui Ethiopia pa ang tawng ti koe krax khi glawh mai krax khi rhawm pa kied ting, tak sang hoek ka piang kix, awm ngaix laux leeing meung Ejiptux, mawh kheu ngaix an hoik dex heue. 10 Siyiex ah nin, “Aux tak tat sinngao meung Ejiptux grai grup ka taix Nebukhaneza simiang Babulon heue. 11 Nawh mai pui nawh khankix, pa mawh ceu pui pa kied koe krax lhat graung pui ka, tak hoek sonsang yuh haktiex an laux leeing, kix tak lawd vaig tix yuh laux ka meung Ejiptux mai haktiex hoik naog ka pui yum heue. 12 Aux tak kieh rawm klawng Nilax hit mai coh haktiex ka daux tawm taix pui pa caox caig, Aux tak kieh haktiex an mai can pa koe daux nawh mawh dee yiien ka taix pui tang meung, Aux pa mawh Siyiex ah nan heue.” 13 Siyiex ah nin, “Aux tak sang yuh riang grang krub laux leeing mai tat ti tik riang grang raug grai ka daux haktiex Nawphax, ang lai koe cao kaing cao kap ka daux haktiex Ejiptux khaix in tix bawg kawx, Aux tak kieh krax lhat graung koe ka daux haktiex Ejiptux heue. 14 Aux tak kieh haktiex Patarot deeh yiien mai tak cux ngu ka veng Zawna mai prawng ca ka veng Thebit heue. 15 Aux tak klup krax song rhawm ka piang veng Pelushem, pa mawh pa ting riang haktiex Ejiptux, Aux tak tat ti tik pui veng Thebit khankix. 16 Aux tak cux ngu ka haktiex Ejiptux, veng Pelushem tak pub krax kha rhawm pa kied ting, Thebit tak grhup mai guh veng Nawphax tak kham pa puing pui koeng tix ponngaix heue. 17 Pui awn ju veng Avin mai veng Pebesiet, tak goh ka lawm vaig mai bun khankix tak mawh pa giex laung heue. 18 Ka daux veng Taphaniet, ponngaix tak lih tix faik, yam raig Aux ti tik krong pliah haktiex Ejiptux mai riang rao min plakngai nawh kieh yiien, paiawm tak sang kheem ka nawh mai kawn bun nawh tak mawh pa giex laung heue. 19 Awm an, yam prawng ca Aux ka phimap meung Ejiptux, khaix an, kix tak tawng ka mawh Aux Siyiex heue.”

20 Yam hoek ka daux kao tix num tix num, daux khix jah, aliah ngaix, gumlox Siyiex hoek ka aux ah nin, 21 “Kawn pui eue, Aux hoik raig ti tik plawng taix Pharaw meung Ejiptux ang koe sidah pa cox kie, ang koe man pa pua ka, sonsang deeh koe riang awm yam jah mai sonsang pon giex vaig heue.” 22 Mawh kheu Siyiex ah nin, “Jhak heue, Aux yuh Pharaw meung Ejiptux laux mai tak raig plawng taix pa kaux cong nawh an tix khawn mai pa hoik graig an tix khawn khawm ra mai Aux tak kieh vaig cod khaing taix nawh heue.” 23 “Aux tak sang prung prang ti tik pui Ejiptux daux sinax ceu pui khankix mai rhuat kix hu ka daux haktiex ku dah heue.” 24 Aux tak tawx riang rao plawng khawn taix simiang Babulon mai tawx vaig Aux ka daux taix nawh, viang mawh nan, Aux tak sang raig plawng taix Pharaw mai nawh tak ngia sivoe nawh awm pui pa mat pa dex sang yum heue. 25 Aux tak tawx riang rao plawng taix simiang Babulon, viang mawh nan, riang rao plawng taix Pharaw tak rau, kix tak tawng ka mawh Aux Siyiex yam tawx Aux vaig tix ka daux taix simiang Babulon mai nawh tak yuh laux ka meung Ejiptux heue. 26 “Aux tak prung prang ti tik pui Ejiptux khankix ka daux sinax ceu pui mai rhuat kix hu ka daux haktiex kudah, khaix an, kix tak tawng ka mawh Aux Siyiex heue.”