1 Yam hoik hoek kao num tix num, daux khix kao, kao ra ngaix, gumlox Siyiex hoek ka aux ah nin,Ref 29:1-32:32 Isa 19:1-25; Ye 46:2-26 2 “Kawn pui eue, veeh ngai maix ka plak Pharaw meung Ejiptux mai krai lox jhai grawng pa ciyang ka piang nawh mai ka piang meung Ejiptux khawmuik heue.” 3 Krai ah nin, Siyiex ah nin, Pharaw simiang meung Ejiptux, pa mawh goe rawm ting pa ot ka daux sigreung rawm klawng eue maix ah nin, rawm klawng Nilax mawh cie aux mai aux phan ti deuh ka son tix, jhak heue, Aux ciyang ka maix heue. 4 Aux tak teei miiet mai feuk ka kap maix mai kieh kax ot daux rawm klawng maix khankix klieb ka sibriak maix mai Aux tak teei maix lih khaing sigreung rawm klawng maix mai kax pa koe ka daux rawm klawng maix tak sang klieb tix ka sibriak maix heue. 5 Aux tak prah tak grham pex ka daux tiag maix mai kax pa koe ka daux rawm klawng maix khawmuik, cod ka daux lung mai ang lai koe pui khrawm sipaung ka maix, Aux hoik ap maix mawh priex ih totiag ka piang haktiex mai sim raoma heue.Ref 29:6 Isa 36:6 6 Khaix an can pui pa ot ka daux meung Ejiptux, tak tawng ka mawh Aux Siyiex, mawh kheu mawh maix khaox gix, priem ka nyiex ma ceu pui Isarelax heue.Ref 29:6 Isa 36:6 7 “Yam teei kix taix tix giex ka maix, maix hoik graig mai hoik kieh klip kix khluik, yam neung kix tix piang maix mai hoik pot mai hoik kieh nyoi kix saux heue.” 8 Siyiex ah nin Aux tak sang viex vaig hoek ka piang maix mai tat ti tik pui mai totiag khaing maix, 9 haktiex Ejiptux, tak sang lih mawh dee yiien mai dee pa laux leeing, khaix an, kix tak tawng ka mawh Aux Siyiex. Kheu jao hoik ah maix nin, rawm klawng Nilax mawh cie aux, aux phan deuh ka son tix, 10 Aux tak mawh pui koeng ka maix mai ka rawm klawng maix mai Aux tak kieh haktiex Ejiptux laux leeing mai mawh dee yiien khawmuik, jah khaing veng Migadawlax tom hoek ka veng Sune, tom sidah hoek ka mee haktiex Ethiopia heue. 11 Ka daux tixpon num ang lai koe caong pui lailing ka daux nawh mai ang lai koe caong totiag pa lailing ka daux nawh mai ang lai mawh haktiex dee ot pui ka daux nawh tix kaux kawx heue. 12 Aux tak kieh haktiex Ejiptux mawh dee yiien pui ka daux sinax haktiex dee pa yiien khankix, mai veng an tak yiien tixpon num ka daux sinax veng pa laux leeing mai Aux tak kieh pui Ejiptux prung prang sinax ceu pui khankix mai kieh kix prung prang ka daux haktiex heue. 13 Siyiex ah nin, “Yam hoik sidah tixpon num Aux tak deeh khrawm pui Ejiptux, khaing sinax pui pa hoik prung prang kix tix ot, 14 Aux tak dee viex pui pa giex laung pui Ejiptux khankix deeh hoek mai kieh kix deeh ing hoek ka haktiex cao kix Patarot mai kix tak mawh meung haktiex pa tiem son tan heue. 15 An tak mawh meung haktiex pa kied tiem son khaing meung haktiex an mai ang lai pon yaog kaing tix ka piang ceu pui khaix in tix bawg kawx, Aux tak kieh kix iak riang mai ang lai pon kwang ka piang ceu pui khankix tix bawg kawx heue. 16 Nyiex ma ceu pui Isarelax tak ang lai een rhawm tix ka kix son krax teem mai kieh kix deeh doh keud ka phimap pa caox caig pa hoik yuh tix, yam deuh kix rhawm tix ka pui Ejiptux. Khaix an kix tak tawng ka mawh Aux Siyiex heue.”

17 Yam hoek ka daux tixnga aliah num ka daux khix tix, tix ngaix, ka daux khix an, gumlox Siyiex hoek ka aux, 18 “Kawn pui eue, Nebukhaneza simiang Babulon hoik kieh cub krung naing sau riang ti puing ka veng Turux, pui naing ku kaux hoik pak kaing mai klaoh klip ka, viang yuh nan kawx nawh mai kru naing nawh khankix ang lai pon ngawh riang tidtix ka puing tix Turux heue. 19 Mawh kheu nan, Siyiex ah nin, Aux tak ap haktiex Ejiptux ka Nebukhaneza simiang Babulon mai nawh tak rhim sinngao maix hu mai viex kraung pa tud rhim tix khankix mai rhim ti teei tawx ngawh riang pui naing tix ka heue. 20 Aux hoik tawx meung Ejiptux ka nawh son ngawh riang yuh nawh kaing, mawh kheu kix hoik yuh kaing ka son Aux, Siyiex ah nan heue. 21 Ka daux ngaix an, Aux tak kieh nyiex ma ceu pui Isarelax kuah rung mai Aux tak paoh jheeh maix sonsang sidiex gau maix ka daux sinax kix. Khaix an kix tak tawng ka mawh Aux Siyiex heue.”