1 Gumlox Siyiex hoek ka aux ah nin, 2 Kawn pui eue, krai ka cao kaing cao kap veng Turux, Siyiex ah nin, “Mawh kheu koe rhawm rhi yaw pex rangdi tix mai maix ah nin, aux mawh Siyiex tix kaux, aux ngawm ka piang dang ngeung Siyiex ka sigreung rawm sigrit sigra mai ang mawh Siyiex, viang maix hoik keud tokaux tix awm Siyiex kawx maix mawh kawn pui mai ang mawh Siyiex, 3 maix mawh pa lheu koe pingnya khaing Dayelax, ceu pa mox glip son ang maix sang tawng ang koe tix ceu kawx, 4 maix pon krax magmi sinngao cuyi mai krax tawng yung tix maix hoik khrawm mau khri daux krao sinngao tix, 5 kheu krax pa kied koe pingnya cuyi maix, maix hoik kied magmi ka pa yuh lai geu mai rhawm maix hoik koe pa yaw rangdi kheu an khankix heue.” 6 Mawh kheu nan, Siyiex ah nin, “Mawh kheu hoik deuh maix rhawm tix, awm Siyiex tix kaux, 7 mawh kheu nan, jhak heue, Aux tak sang viex pui tang ceu pa mawh pa kied koe krax lhat graung hoek ka maix mai kix tak lawd vaig tix mug ka pa mhawm grang pingnya maix mai yuh min plakngai maix laux heue. 8 Kix tak sau maix ka daux tiex mai maix tak yaox tix yum ka pa pah pui tix, ka daux sigreung rawm sigrit sigra heue. 9 Mawh kawn sang ah maix aux mawh Siyiex ka plak sivoe pa pah maix yum lie? Viang mawh nan maix mawh ngie pui tix kaux mai ang mawh Siyiex, ka daux taix pui pah maix yum heue. 10 Maix tak yum awm yum pui pa ang nyang pat hak, ka daux taix pui tang ceu, mawh kheu Aux Siyiex hoik krai ah nin heue.”

11 Gumlox Siyiex baox hoek ka aux ah nin, 12 Kawn pui eue, yiiem doe son simiang veng Turux ah nin, Siyiex ah nin, “Maix hoik mawh cum pa grum naog pa naog ka pingnya cuyi mai pa grum naog ka pa mhawm grang heue. 13 Maix hoik ot ka daux Eden sipeem Siyiex maix hoik ceep siang simaox pa laoh lie kuceu ka kaing tix, pa mawh siang simaox raoh, siang simaox pa raoh eem mai siang simaox pa kiien, siang simaox klai paing siang simaox bawd raoh paing pau mai siang simaox pa toh riang kuceu, siang simaox pa klai singi mai siang simaox klai sim tau mai khri, ting plah khaox mai lawk leh pa yuh ka khri khankix hoik khre ti deuh son maix, ka daux singaix pa hoik phan hoik deuh maix heue. 14 Maix mawh Cherubin pa hoik groi rawm bee ka piang mai pa sang tawb veei tix, hoik deuh maix ot ka piang gawng pa singax singeh Siyiex, mai lailing ka daux sigreung simaox pa rup ngu heue. 15 Maix hoik mawh pa grum naog ka daux pa yuh tix khankix jah khaing singaix hoik phan hoik deuh maix, tom hoek yam hoik sidawng yaox ka phimap ka daux maix heue.” 16 Mawh kheu kied nie diang lai yuh maix, maix hoik lih mawh pa naog ka pa kin pa khreeing brai mai pa yuh phimap, mawh kheu nan, jao pa caox caig maix, Aux hoik grheu maix lih khaing gawng Siyiex, Cherubin, pa koe krax pa tawb veei eue, Aux hoik yuh maix laux leeing khaing daux sigreung simaox pa rup ngu heue. 17 Rhawm rhi maix hoik yaog tix ting kheu jao pa mhawm grang tix, maix hoik kieh pingnya cuyi mai min pa haok hwan laux yuh tix, Aux tak yeen maix tiem tom cux tiex, Aux hoik deuh maix ka plak sivoe simiang khankix, sonsang jhak mai mawh mhai ka son kix heue. 18 Maix hoik seeing yuh dee pa singax singeh kheu jao pa kied nie phimap tix mai ang rahsee ka daux pa yuh tix lai geu mai Aux keeig ngu sigreung maix mai gleeing ka maix mai Aux kieh maix mawh nyaox ka piang tiex, ka plak sivoe ngai pui pa hoik yaox ka maix heue. 19 Pui pa hoik tawng ka maix khankix tak koe krax daox deng ka maix, maix tak lih mawh dee pa lhat graung mai tak ang lai baox koe khaix in tix bawg kawx leeing ju heue.\s Lox Krai Pao Ka Piang Veng Sidom

20 Gumlox Siyiex hoek bleeh ka aux ah nin, Ref 28:20-26 Yol 3:4-8; Zak 9:1-2; Mat 11:21-22; Luk 10:13-14 21 Kawn pui eue, veeh ngai maix ka plak veng Sidom mai krai lox jhai grawng pa yuh laux ka nawh, 22 ah nin, Siyiex ah nin, “veng Sidom eue, jhak heue, Aux tak yuh maix laux, Aux tak kieh min sibrawm pa ting lhaong lih sigreung maix yam prawng ca Aux ka daux nawh, mai lih mawh pa koe krax nab yam ka Aux ka daux nawh mai kix tak tawng ka mawh Aux Siyiex heue. 23 Aux tak ploi jhawm saux preng hoek ka piang nawh mai kieh nham lih ka piang krax hu nawh, yam goh pui mat ka vaig pa mug hoek khaing ku plak sigreung nawh, khaix an, kix tak tawng ka mawh Aux Siyiex heue. 24 Ngu khaox pa sang sideeing ang ah mai pang kat pa sang dung tix ang ah, tak ang lai koe ka son pui Isarelax khaix in tix bawg kawx, khaing daux sinax pui pa ot rawb rim kix khawmuik mai pa ah lox pa sibriem ka kix, khaix an, kix tak tawng ka mawh Aux Siyiex heue.”

25 Siyiex ah nin, “Yam kraix khrawm Aux ceu pui Isarelax pa prung prangtix ot ka daux sinax pui kuceu mai Aux tak mawh pa koe krax nab krax yam kheu kix, ka plak sivoe pui tang ceu mai kix tak ot ka daux haktiex pa hoik tawx Aux ka kawncau Aux Yakop heue. 26 Kix tak yaox ti ot yiien yawg tan mai sum nyiex sum sipeem plix siiet, kix tak sang yaox ti ot ka daux krax pa yiien, yam prawng ca Aux ka piang pui pa ot vung viang kix, pa yuh pa ang cee ang cak ka kix, khaix an, kix tak tawng ka mawh Aux Siyiex heue.”