1 Gumlox Siyiex hoek ka aux ah nin, 2 “Kawn pui eue, yiiem grai son veng Turux, 3 mai ah nin ka veng Turux, pui pa ot diang laig rawm sigrit sigra mai pa mawh cao yuh lai geu tau mai pui pa ot ka klawn tiex, Siyiex ah nin, veng Turux eue, maix hoik ah nin, Aux hoik grum naog ka daux pa mhawm grang heue.” 4 Mee haktiex maix koe ka daux rawm sigrit sigra, cao pa sum ka maix hoik kieh maix grum naog ka pa mhawm grang heue. 5 Kix yuh reu maix ka phya khaox gix pa kaoh khaing gawng Senira, kix yuh rong man reu ka khaox piak van pa kaoh khaing gawng Lebanon, 6 kix yuh khaox vai reu maix ka khaox tiah pa kaoh khaing Bashan, kix yuh phya tawm ka khaox gix kaoh khaing Saiprat mai bre ka plak daux nawh ka nga sang heue. 7 Pex yuh man reu ka man taing mhawm pa kaoh khaing haktiex Ejiptux, pex yuh braux plak daux ka man klai raoma mai ka man raoh rawt, pa kaoh khaing haktiex Elisha heue. 8 Pui veng Sidom mai veng Aravat, mawh pui vai reu maix, veng Turux eue, pui koe pingnya cuyi daux maix mawh cao phat reu maix heue. 9 Pui cheung pa koe pingnya cuyi cao yuh reu khankix mawh pui chix khaox pa kaoh khaing Babulon, reu sang phaw daux rawm sigrit sigra mai pui yuh kaing reu khankix, kix mawh pa yuh lai geu mai maix heue. 10 “Pui Pasha pui Lidayax mai pui Libiyax hoek yuh lien maix, ka daux kru naing maix mai kix fak plah rhiem tiebtie mai mhok rhiem ka daux tab maix, kix hoik kieh min plakngai maix koe heue. 11 Pui veng Aravat mawh lien pau guh veng maix mai cub kru naing Gamada mawh cao pau nyiex pau tab lhaong maix mai kix fak plah rhiem tiebtie ka hawt vung viang guh veng, kix hoik kieh pa mhawm grang maix grum naog heue.” 12 Veng Tasux mawh cao yuh lai geu mai maix, mawh kheu kied magmi maix ka kraung mhawm pa kied koe ngawh koe jum kuceu, kix hoek loh mau, rhiem, tawng paing mai sivun ka kraung maix heue. 13 Veng Yavan, veng Tubalax mai veng Meshiet hoik yuh lai geu mai maix, kix loh pui siliex mai pan tawng lheng ka kraung cie maix heue. 14 Pui Biettawgamax loh kraung cie maix ka brung tang kraung, brung pui naing mai la khankix heue. 15 Pui veng Dedan mawh cao yuh lai geu mai maix, pui pa ot ka daux klawn tiex yuh lai geu nga sang mai khaox koe ngawh koe jum mai rung totiag khankix hoek loh ka kraung maix heue. 16 Haktiex Surix mawh pui yuh lai geu mai maix, kheu kied haoh kraung pa koe ngawh koe jum daux maix, kix hoek loh simaox siang raoh rawt, man klai raoma mai man pa koe rawm siang kuceu, man ceu pa mhawm, simaox siang paing mai simaox siang pa raoh khankix ka kraung cie maix heue. 17 Haktiex Yudax mai haktiex Isarelax mawh paox yuh lai geu maix, kix hoek loh diang lai geu pa koe tix pa mawh nghox ca, pa kaoh khaing veng Minit mai peeh khaox sidah Muran, rawm hia, bee mai peeh khaox Balasam ka kraung maix heue. 18 Veng Damasekat mawh paox yuh lai geu maix, kheu kied haoh hun kraung pa koe ngawh koe jum maix, kheu kied magmi maix ka kuceu mai kix hoek loh rawm plix siiet Helabon mai hauk yung paing ka kraung maix heue. 19 Veng Dedan mai haktiex Yavan hoek loh rawm plix siiet, gawng rhiem pa hoik raug tix khankix mai miex rhiem, khaox cai hung mai ox mex ka kraung khrai maix heue. 20 Veng Dedan mawh cao yuh lai geu man an brug mai maix heue. 21 Haktiex Arebiya mai cao kaing cao kap haktiex Keda khankix mawh cao yuh lai geu mai maix sijheeng, kix viex kawn yung, yung mhaing mai pex hoek loh ka kraung maix heue. 22 Haktiex Sheba mai haktiex Rama mawh cao yuh lai geu mai maix, kix hoik loh sidah bhawng pa kied mhawm, simaox siang pa koe ngawh koe jum mai khri ka kraung pa koe maix heue. 23 Veng Haran, veng Khanie mai veng Eden mai cao lai haktiex Sheba Asurix mai Khilamat mawh cao yuh lai geu mai maix heue. 24 Cao lai khankix viex kraung pa ao min kuceu, pa mawh man klai raoma, kraung ceep pa bre ti yuh ka keei rawm rawn kuceu, kraung mhawm grang pa plaik ka keei kuceu, pa hoik klung kliien tix ka maox pa kaux, pa cong pa hoik koe ka daux bang lai maix heue. 25 Reu ting veng Tasux hoik tang kraung diang lai maix, maix hoik grum naog mai hoik kied koe min sibrawm ka daux greung rawm sigrit sigra heue.Ref 27:25-36 Jhi 18:11-19 26 Cao vai reu maix viex maix hu ka dee pa kied raux rawm sigrit sigra, bhaung pa kaoh khaing plak lih singaix hoik klah maix laux leeing ka sigreung rawm sigrit sigra heue. 27 Krax magmi maix, kraung khrai maix mai diang lai maix, cao yuh kaing reu maix mai cao thong krax reu maix, cao cox kraung reu mai cao lai cao geu maix mai pui naing maix khankix mai cub caw pui maix pa ot tau mai maix khawmuik, tak com ka daux sigreung rawm sigrit sigra, daux singaix yam hoek maix krax laux leeing heue. 28 Haktiex baoh an hoik yung yang ka lox sinum riag yo cao thong krax reu maix, 29 cao pa giex khaox vai reu mai pui brug reu ting maix mai pui thong krax reu daux rawm sigrit sigra khawmuik, tak lih khaing daux reu mai cung ka caong raog, 30 Kix tak yiiem doe sigrien sigre ka son maix mai hoik rhuat phawng tiex ka piang kaing tix mai lu lieh tix ka daux nyaox, 31 kix khlao hauk kaing tix mai fua tokaux tix ka chee rhix mai kix yiiem doe sigrien sigre heue. 32 Kix pao lox yiiem tix ka daux pa yiiem doe tix ka son maix mai mawh veng pa yuh ka mawx pa laux leeing awm veng Turux ka sigreung rawm sigrit sigra lie? 33 Yam hoek diang lai maix khaing rawm sigrit sigra mai hoik kieh pui tom nie fah rhawm ka mai simiang haktiex hoik magmi ka kraung khrai diang lai pa kied mhawm grang cie maix heue. 34 Yam in maix hoik laux leeing daux rawm sigrit sigra mai hoik com ka daux rawm dee kied raux, diang lai maix mai cub caw maix khawmuik hoik som nai tau mai maix heue. 35 Can pui pa ot ka klawn tiex khawmuik, tak daox deng ka sipiag maix, simiang khankix tak lhat graung mai pruh hauk haw mai laux pakngai tix heue. 36 Cao lai cao geu ka sinax pui khankix tak sibriem ka maix, krax lhat graung maix tak ang koe dee die maix tak ang lai koe khaix in leeing ju tix bawg kawx heue.