1 Ka daux kao tix num tix num, ka daux khix tix, tix ngaix, gumlox Siyiex hoek ka aux ah nin,Ref 26:1-28:19 Isa 23:1-18; Yol 3:4-8; Amo 1:9-10; Zak 9:1-4; Mat 11:21-22; Luk 10:13-14 2 “Kawn pui eue, mawh kheu veng Turux hoik ah, ha ha ka pa dex dawd mai Yerusaliem, nawh pa mawh siviex veng pui ku meung hoik laux leeing, nawh hoik veeh tix hoek ka aux, veng an hoik mawh dee yiien mai aux tak mawh pa haok hwan,” 3 mawh kheu nan, Siyiex ah nin, “Veng Turux eue, jhak heue, Aux sang puing ka maix, awm haktiex puk pak rawm sigrit sigra Aux tak viex pui kuceu hoek puing ka maix, 4 mai kix tak yuh guh veng Turux laux mai yieh nyiex pau dee lhaong kix grhup, Aux tak khut tiex lih khaing veng an mai kieh deuk lon simaox giex heue.” 5 “Veng an tak mawh dee hok pui rub ka daux greung rawm sigrit sigra, Siyiex ah nin, mawh kheu Aux hoik grux krai, veng an tak sang mawh dee pa tud rhim ceu pui khankix, 6 kawn bun nawh pa ot daux haktiex khankix kawx tak yaox ti yum ka lawm vaig mai kix tak tawng ka mawh Aux Siyiex heue.” 7 Siyiex ah nin, “Jhak heue, Aux tak viex Nebukhaneza simiang veng Babulon, pa mawh simiang piang simiang, tau mai brung, ling lawx naing brung mai cub kru naing khankix tom nie, pa kaoh khaing plak laong hoek ka veng Turux heue.” 8 Nawh tak pah kawn bun maix pa ot ka daux veng khankix ka lawm vaig, nawh tak pum tiex kaw guh veng sonsang puing ka maix mai yuh tab sonsang tiebtie ka maix mai yaog braux nyiex kieh mawh plah tiebtie mai puing ka maix heue. 9 Nawh tak yuh khaox dung ting khankix sonsang yuh guh veng maix laux mai kaong nyiex tab lhaong maix khankix grhup ka sibeet heue. 10 Kheu jao kied nie brung nawh, phawng tiex khaix caong brung kheem ka maix, guh veng maix tak yung yang ka lox sinum pui naing brung mai ling lawx tang kraung mai ling lawx naing brung, yam laig nawh ka siviex veng maix, awm laig pui ka daux guh veng pa grhup pa doh heue. 11 Kloh brung tak dig krax hu maix khawmuik, nawh tak pah pui maix yum ka lawm vaig mai rong simaox riang grang pa krub maix khankix tak grhup ka piang tiex heue. 12 Kix tak tud rhim ka sinngao maix mai kraung lai geu maix, kix tak yieh guh veng maix mai yuh nyiex mhawm grang maix laux, kix tak teei ti tik rong simaox maix khaox maix mai tiex maix khankix ka sigreung rawm heue. 13 Aux tak kieh lai rhax ah maix yiien mai ang lai kieh pui mhong ka lox ting tah maix tix bawg kawx heue.Ref 26:13 Jhi 18:22 14 Aux tak kieh maix mawh tiag simaox dee hok pui rub mai maix tak ang chix pang chix sum tix bawg kawx, mawh kheu Siyiex pa mawh Siyiex hoik grux krai ah nan heue. 15 “Siyiex ah nin ka grawng pa dex dawd ka veng Turux pui pa ot ka baoh haktiex rawm sigrit sigra khankix tak siyaung ka lox sinum pa grhup maix, yam riag yo pui mat mai yam hoek ceu pa pah yum ka daux sigreung maix lie?” 16 Simiang rawm sigrit sigra khankix khawmuik, tak lih khaing dang ngeung tix mai peeik sibex lang jung ceep tix mai kraung ceep pa mhawm grang tix mai deeh ceep ka kraung ceu pa lhat graung, kix tak ngawm ka piang tiex mai koe krax lhat graung mai daox deng ka maix heue.Ref 26:16-18 Jhi 18:9-10 17 Kix tak yiiem doe ka son maix ah nin, veng pa ao min eue, veng pa kaux cong daux rawm sigrit sigra pa yungyi pui ka maix hoik laux leeing, mawh kheu kieh maix pui pa ot baoh rawm sigrit sigra lhat graung. 18 Yam in klawn tiex tak siyaung, daux singaix goh grhup maix, klawn tiex daux rawm sigrit sigra hoik daox deng ka yam grai grup maix heue. 19 Siyiex ah nin, “Yam yuh Aux maix mawh veng pa laux leeing mai dee yiien pui, yam viex Aux rawm sigrit sigra pa kied raux mai puk pak rawm ting hoek kheem ka piang maix, 20 Aux tak sang viex maix lih hu daux meung yum tau mai pui dawg yum didix mai Aux tak kieh maix ot ka daux meung yum greem haktiex, ka dee pa yiien pui ka dee ot pui dawg yum di dix, pui son ang maix lai yaox ti im ju tau mai pui pa ot ka piang haktiex, mawh kheu nan, Aux tak kieh min sibrawm ot ka haktiex pui im ju heue. 21 Aux tak kieh ceu pa kin lhat graung maix ang koe dee deek maix tak ang lai koe khaix in tix bawg kawx, viang pui sawg maix kawx, pui tak ang lai yaox ka maix tix bawg kawx, Siyiex ah nan heue.”Ref 26:21 Jhi 18:21