1 Gumlox Siyiex hoek ka aux, Ref 25:1-7 Ye 49:1-6; Yez 21:28-32; Amo 1:13-15; Ze 2:8-11 2 “Kawn pui eue, veeh ngai tix ka plak pui Amon mai krai lox jhai pa ciyang ka kix heue.” 3 Krai ka pui Amon, nghiet ka gumlox Siyiex, Siyiex ah nin, mawh kheu maix ah aha, ka piang dee pa singax singeh Aux, yam hoik seeing brai dee an mai yam yiien pui khaing ka piang haktiex Isarelax mai yam hoik laig pui Yudax ka daux pa giex laung, 4 mawh kheu nan, aux tak ap maix ka pui plak lih singaix sonsang mawh sinngao kix mai nawh tak yuh bang ka sinax maix mai kix yuh dee ot daux sinax pex; kix tak ih plix khaox plix ox mai nyaux rawm teeih pex heue. 5 Aux tak yuh veng Raba mawh kawg kala-uk mai kieh haktiex Amon mawh dee liang cub yung, khaix an pex tak tawng ka mawh Aux Siyiex heue. 6 Siyiex ah nin, mawh kheu dieh pex taix caong tix mai koe krax gaux rhawm tau mai pa boh rhawm boh rhi tix ka haktiex Isarelax, 7 mawh kheu nan, Aux tak nyeu taix tix mai puing ka pex, mai tak ap pui tang ceu tud rhim ka pex, Aux tak sang tat ti tik pex khaing ceu pui khankix mai tak yuh pex grai krup khaing haktiex, Aux tak yuh pex laux leeing mai pex tak tawng ka mawh Aux Siyiex heue.

8 Siyiex ah nin, “Mawh kheu haktiex Mawbax mai veng Sirax ah nin, jhak heue, nyiex ma pui Yudax hoik awm pui tang ceu, 9 Mawh kheu nan jhak heue, Aux tak yuh veng pa koe rawb rim mee haktiex Mawbax pa mawh veng pa koe min sibrawm pa mawh veng Bietyeshimot, veng Balameon mai veng Kiriyatem khankix laux leeing heue.Ref 25:8-11 Isa 15:1-16:14, 25:10-12; Ye 48:1-47; Amo 2:1-3; Ze 2:8-11 10 Aux tak ap haktiex an ka ceu pui Amon ka pui pa ot plak lih singaix sonsang mawh sinngao cie kix, son ang lai deeh doh keud ka ceu pui Amon ka sinax meung haktiex heue. 11 Aux tak prawng ca ka piang haktiex Mawbax mai kix tak tawng ka mawh Aux Siyiex heue.”

12 Siyiex ah nin, “Mawh kheu haktiex Edom dee pawk bix tix ka nyiex ma ceu pui Yudax, ka daux pa kin lang teung yuh tix mai krax pawk bix ka pa lud kix deeh hoek ka piang pui Edom,Ref 25:12-14 Isa 34:5-17, 63:1-6; Ye 49:7-22; Yez 35:1-15; Amo 1:11-12; Aw 1-14; Ma 1:2-5 13 mawh kheu nan Siyiex ah nin, Aux tak nyeu taix tix mai puing ka Edom mai tat ti tik pui mai to brie khaing Edom, mai yuh haktiex an mawh dee yiien pui, jah khaing veng Teman tom hoek ka veng Dedan kix tak goh gup ka lawm vaig heue. 14 Aux tak kieh taix pui Aux Isarelax deeh pawk bix ka haktiex Edom mai kix tak pawk bix tix ka pui Edom ka pa kied song rhawm mai ka pa kied meet rhawm cie Aux ka piang kix mai kix tak tawng ka mawh Aux pa pawk bix tix, Siyiex ah nan heue.”

15 Siyiex ah nin, “Mawh kheu pui Philitix koe rhawm ti deeh pawk bix ka pui pa koeng nawh ka, ka daux pa kin lang teung yuh tix krax pa laux leeing,Ref 25:15-17 Isa 14:29-31; Ye 47:1-7; Yol 3:4-8; Amo 1:6-8; Ze 2:4-7; Zak 9:5-7 16 mawh kheu nan, Siyiex ah nin, Aux tak nyeu taix tix puing ka pui Philitix mai Aux tak tat ti tik pui Kheratix mai pui pa deuk praok rawm sigrit sigra khankix laux leeing heue. 17 Aux tak viex krax pawk bix pa ting lhaong hoek ka piang kix tau mai ciyang kix ka daux pa kied song rhawm tix mai kix tak tawng ka mawh Aux Siyiex pa pawk bix tix ka piang kix heue.