1 Ka daux dim num tix num, khix kao, kao ngaix daux khix an, gumlox Siyiex hoek ka aux, 2 “Kawn pui eue, mhai ti deuh singaix ing simiang veng Babulon hoik jah ti lai lawm ka veng Yerusaliem ka daux in singaix heue. Ref 24:2 2Sim 25:1; Ye 52:4 3 Krai lox tiag ka nyiex ma pui tieh feen mai ah nin ka kix, Siyiex, pa mawh Siyiex ah nin, tang aw ka piang kiang ngu mai sau rawm ka daux. 4 Sau khik nex pa kied mhawm, pa mawh nex ba viang mai nex klip mai si-ang pa kied mhawm ka daux aw an tom naog heue. 5 Laug yung pa kied mhawm tix mu, sau si-ang kre aw mai sau nex ka piang, khaix an phlu ngu tom ting sonsang sin si-ang mai nex heue.” 6 Siyiex ah nin, “Kieh krax kha rhawm koe ka veng pa naog ka nham mai ka aw pa ang sax plok pa ih rhaw mai teei nex lih tix khik hoik tix khik ka daux pa ang yuh nieb kab heue. 7 Mawh kheu nham pa hoik kieh nawh jauh kawn koe sigreung veng nawh ang kheem nham an ka phawng tiex mai deuh dee sidawng ka piang rang heue. 8 Sonsang mawh an pa pawk Aux bix krax pa song rhawm tix, Aux ang lai kheem ka an mai deuh nham pa hoik kieh nawh jauh an ka dee sidawng piang rang heue. 9 Siyiex ah nin, “Kieh krax kha rhawm koe ka veng pa kieh nham jauh, Aux kawx tak khre glah ngu pa ting heue.” 10 Pum ti deuh khix mai phlu ngu ka, ngaik nex kieh klai mhawm mhawm, klu klao ceu pa sioe bhawng mai kieh si-ang gleeing ka heue. 11 Tang aw tawng pa yi ka piang gaox ngu, sonsang gleeing mai kieh pa seeing daux nawh lih mawh rawm mai sonsang singax rawm khaing daux an heue. 12 Nawh hoik taug ka coca ti yuh, viang mawh nan, rhaw pa kied ting daux nawh, ang chix lih, rhaw an ang cu ti bah singax ka ngu heue. 13 Rhaw pa seeing pa koe daux maix mawh pa caox caig, mawh kheu Aux hoik sigrhah ka maix mai maix ang cu tix sigrhah, tom sidah ang pa song rhawm Aux hoek ka piang maix, maix tak ang lai mawh pa sigrhah tix, tix bawg kawx heue. 14 Aux pa mawh Siyiex hoik krai ti deuh grawng pa sang hoek an mai Aux tak sang yuh awm an, Aux tak ang lai deeh plak khaix mai Aux ang lai lhawk mai ang lai klih kah, Siyiex ah nin, Aux tak mhai ti deuh kaing yuh maix krax hu maix mai Aux tak prawng ca ka maix heue.

15 Gumlox Siyiex hoek ka aux ah nin, 16 “Kawn pui eue, jhak heue, Aux tak teei pui pa khaw ka ngai maix yum khaing maix dom mawx dom an, viang mawh nan maix paw khi rhawm paw yiiem mai paw lih rawm ngai ka. 17 Ngia ngheeik daux pa yiien, paw yiiem doe son pui yum. Ceep lawk kaing mai ceep kiep ka caong maix, paw thox siyieb jheeh maix mai paw ih priex pui yiiem doe.” 18 Mawh kheu nan, Aux hoik krai ka pui plak ponngawb, yam hoek plak ponbo, moeng aux hoik yum mai aux yuh an ngawb ngaix khaix awm pa hoik tawm ka aux heue. 19 Pui khankix chawk ka aux ah nin, “Mawh ang maix krai grawng pa yuh tix in, koe dee bleeh son yix yuh ka mawx?” 20 Khaix an aux deeh ah nin ka kix, “Gumlox Siyiex hoek ka aux ah nin,” 21 Krai ka nyiex ma pui Isarelax, Siyiex ah nin, jhak heue, pex yaw rangdi tix ka nyiex bwan an mai ting rhawm kah, pex simie ti simi ka nyiex bwan an mai koe rhawm tix sang fi kah, viang mawh nan, Siyiex tak sang kieh an seeing brai, kawn praix daux nyiex ma pex pa ot ka Yerusaliem pa awn ju khankix Aux tak kieh yum ka daux naing heue. 22 Pex tak yaox ti yuh awm pa hoik yuh Aux, pex tak ang yaox ti thox siyieb jheeh tix mai ang yaox ti ih priex pui pa yiiem doe heue. 23 Pex tak yaox tix ceep lawk kaing ka kaing tix mai ceep kiep ka caong tix. Pex tak ang yaox tix khi rhawm mai ang yaox tix yiiem. Pex tak krawx rhao kheu phimap tix mai pex tak ra lai ngia ngheeik ka paox tix heue. 24 Awm an Yezakelax tak mawh mhai ka son pex, mai pex tak yaox ti yuh awm can ceu pa yuh nawh. Yam hoek ceu in pex tak tawng ka mawh Aux Siyiex heue. 25 “Maix pa mawh kawn pui eue, Aux tak teei nyiex bwan pa kaux cong kix mai pa yaw kix rangdi mai pa gaux rhawm kix hu singai khaing kix, pa mawh pa simi kix tix jhak mai pa koe rhawm kix tix fi kah heue. Aux tak viex kawn simex kawn bun kix hu singai khaing kix heue. 26 Ka daux singaix an pui pa pon tix glawd tak hoek krai grawng an ka maix heue. 27 Ka daux singaix an, jheeh maix tak baoh mai chix sikah ka sivoe ngai pui pa glawd an maix tak chix sikah mai maix ang lai baox aw. Awm an maix tak mawh mhai ka kix mai kix tak tawng ka mawh Aux Siyiex heue.