1 Gumlox Siyiex hoek ka aux ah nin, 2 “Kawn pui eue, koe bun ra kaux, pa mawh kawn miex tix kaux khaing, 3 Kiex yuh pa lud vao ka haktiex Ejiptux mai kiex yuh pa lud vao yam kawn awn ju tix, pui hoik kloek ka teeih kiex daux meung an mai kieh min plakngai bun krih mawh kiex laux heue. 4 Ceu kaux puxke mawh Ahawlax mai ceu kaux pux Ahawlibax. Kiex mawh cie Aux mai kiex khawm ra keh kawn simex kawn bun. ceu kaux kawn Ahawlax mawh Samarix mai ceu kaux kawn bun Ahawlibax mawh Yerusaliem heue.”

5 Ahawlax yuh bun coh kaux, khawm mawh tix cie Aux mai nawh ghoing rhawm ka paox moh tix pa mawh paox plawg paox nyhawm nawh pui Asurix, 6 pa ceep kraung raoh rawt, pa mawh cao kaing naing mai cao kwang haktiex, kix ku kaux kawn mawh nyawm sinaw silao, pa mawh pui naing brung pa brug brung. 7 Nawh hoik lud vao mai kix, pa mawh pui laoh lie pa hoik laug khaing haktiex Asurix mai kieh tokaux tix seeing mai riang grang krub tau mai pa kieh tokaux tix ghoing ka kix heue. 8 Nawh ang cu ti tik bun pa coh kaux tix awm yam ot nawh daux haktiex Ejiptux, mawh kheu hoik kieh nawh pui it mai tix yam awn ju tix mai hoik kieh min plakngai bun krih mawh tix laux heue. 9 Mawh kheu nan, Aux hoik ap nawh, ka daux taix paox moh nawh, pui Asurix, ka pui pa ghoing nawh ka heue. 10 Kix peeik kraung ceep nawh mai rhim kawn simex kawn bun nawh khankix mai pah nawh yum ka vaig, nawh lih ti mawh pa salao pui ka daux sinax bun khankix, yam prawng ca ka piang nawh heue. 11 Yam yaox pux bun nawh Ahawlibax ka ceu in, nawh nie lheu koe rhawm nie yuh pa caox khaing puxke tix, pa coh kaux tix heue. 12 Nawh koe rhawm ghoing ka pui Asurix pa ot hawt rawb rim nawh, pa mawh cao kaing naing mai cao kwang haktiex, pa ceep kraung pa kied mhawm grang sinaw pa silao pa mawh pui naing brung pa brug brung khankix heue. 13 Aux hoik yaox mawh nawh pa seeing brai, kiex khawm ra hoik hu daux krax pa awm paox tix heue. 14 Grawng pa nie lheu yuh nawh bun coh kaux ka pui khankix nawh jhak ka riang pa hoik tiiem ti deuh ka piang ding pa mawh riang pui Khaladie pa tiiem ka rawm siang raoh, 15 pa hoik rawd maox khlax ka nyoi tix mai pa fua lawk kaing ka kaing tix, pa awm grang cao kaing naing, pui Babulon haktiex Khaladie, pa mawh haktiex dee keh kix heue. 16 Yam yaox nawh ka riang kix, nawh hoik koe rhawm ghoing ka mai ploi pui cau hu ka kix ka haktiex Khaladie heue. 17 Pui Babulon hoek ka nawh ka piang ku it krax moh mai kix seeing yuh nawh ka daux pa lud vao, kheu hoik yuh kix seeing brai khaix an nawh deeh tieh ti koeng ka kix heue. 18 Nawh hoik yuh pa coh kaux tix ka daux pa sidawng mai jhi grawng pa ot kaux kaong tix, aux tieh ti deeh koeng ka nawh awm koeng aux ka puxke bun nawh heue. 19 Nawh doh keud ka yuh bun coh kaux yam awn ju tix ka haktiex Ejiptux mai nawh ca kawn baox yuh bun coh kaux tix bawg hoik tix bawg heue. 20 Nawh koe rhawm ghoing ka paox moh tix, pa koe nex nham awm nex nham la mai pa koe rawm ngang awm brung heue. 21 Mawh kheu nan maix ca kawn baox yuh ceu pa seeing brai awm yam kawn awn ju maix, kheu pa kloed pui Ejiptux ka teeh maix, kieh min plakngai maix laux heue.

22 Ahawlibax eue, Siyiex ah nin, “Jhak heue, Aux tak so paox koeng maix kaoh tieh feen ka maix, ka pui pa deeh tieh maix ti seeing ka, aux tak viex kix hoek puing ka maix khaing ku plak, 23 pui Babulon mai pui Khaladie, pui Pekawdax, pui Shoa pui Kaw-ax mai pui Asurix khankix tau mai kix pui awn ju pa kawn koe rhawm silao mai cao kwang, cao kaing mai pui pa ao min khankix mai pui naing brung, pa brug brung heue. 24 Kix kaoh khaing plak laong hoek puing ka maix, tau mai kraung naing ling lawx brung, tau mai pui kuceu, kix sang hoek yuh naing ka maix, ka plah rhiem tiebtie naing mai plah rhiem tiebtie naing pa iak mai mhok rhiem hawt vung viang maix, Aux tak ap krax prawng ca ka kix mai kix tak prawng ca ka maix, awm koe been kix heue. 25 Aux tak kieh pa boh rhawm koe ka piang maix mai kix tak yuh pa kied kin kha rhawm ka maix. Kix tak sang pat gawng meeh maix mai yhaok maix mai pui pa kawn deuk, tak mug yum ka vaig, kix tak rhim kawn simex kawn bun maix mai pui pa kawn deuk, tak gleeing ka ngu heue. 26 Kix tak peeik kraung ceep maix mai rhim kraung pa laoh lie pa koe ngawh maix heue. 27 Aux tak kieh pa ghoing rhawm maix mai pa coh maix tokaux tix pa viex maix hoek khaing haktiex Ejiptux yiien grai, son ang maix lai simi ka pui Ejiptux mai son ang lai doh keud ka Ejiptux khaix in tix bawg kawx heue. 28 Siyiex ah nin, “Aux tak ap maix ka daux taix pui koeng maix mai ka daux taix pui pa seeing maix ka heue.” 29 Kix tak yuh awm koe rhawm koeng tix ka maix mai rhim kraung can pa hoik khrawm maix ti deuh mai kieh maix ot kaux kaong mai kieh pa yuh maix bun coh kaux, pa ghoing rhawm maix, pa lud vao maix sidawng heue. 30 Aux tak yuh ceu in ka maix, kheu jao yuh maix bun coh kaux mai pui tang ceu hoik kieh tokaux tix seeing brai mai riang grang krub kix heue. 31 Maix hoik lawng hu daux krax pa hu puxke bun tix, mawh kheu nan, Aux tak ap kawk nyaux nawh ka daux taix maix heue.” 32 Siyiex ah nin, “Maix tak yaox ti nyaux kawk nyaux puxke bun maix, pa mawh kawk nyaux pa raux pa ting, maix tak yaox ti kham pa nyiah pa sibriem, mawh kheu laig rawm ka kawk nyaux an tom nie. 33 Maix tak sak tak yoek mai krax laux rhawm ka kawk nyaux puxke bun maix Samarix, pa mawh kawk nyaux pa laux leeing mai pa lhat graung heue. 34 Maix tak yaox ti nyaux tom uik pak khaing kawk mai teei bliah kawk max an pat ka teeih cao tix mawh kheu Aux mawh Siyiex pa hoik krai ah nan heue. 35 Mawh kheu nan Siyiex ah nin, mawh kheu piawm maix ka Aux mai hoik tik Aux ka plak khaix tix, maix tak yaox ti kham geu phimap, ghoing rhawm mai pa lud vao tix heue.

36 Siyiex ah nin ka aux, “Kawn pui eue, mawh sang khre maix ti prawng ca ka Ahawlax lie? Krai pao grawng pa seeing brai pa yuh kix, 37 mawh kheu kix hoik lud vao mai nham phimap koe ka daux taix kix, tau mai pa lud vao tix mai riang grang krub kix mai gleeing ti tan kawn simex tix pa hoik keh kix son Aux, sonsang mawh pa ih son riang grang krub kix heue. 38 Lheu khaing an kix hoik yuh ceu in ka Aux mai kix yuh dee pa singax Aux seeing brai ka daux tix ngaix khaing mai ang yungyi ka singaix twah Aux heue. 39 Khaix pah kix kawn praix tix tan ka riang krub ka daux tix singaix an, kix hoek laig ka dee pa singax Aux, sonsang yuh seeing brai mai awm an, kix hoik yuh ceu an ka daux greung nyiex bwan Aux heue. 40 Lheu khaing an maix ploi cao cau tix hu kok ka simex pa ot dee singai khankix hoek kix kawx hoek mai maix heem tix mai kraix sidah ngai mai jawg khre tokaux tix ka kraung mhawm ka son kix. 41 Maix ngawm ka piang ku it pa koe min mai deuh pheen tix mu pa deuh nyawng bhawng mai bee cie Aux ka plak sivoe ku an heue. 42 Mhong ka lox sinum pa nyawm rhawm pui hun tau mai nawh, pui pa nyaux tom yoek tix khankix pa kaoh khaing daux tiag hoek tau mai pui nyiex pui yaong mai kix cheep ble ka taix bun an kiex mai ceep mhong khri pa mhawm grang ka piang kaing kiex heue. 43 Khaix an Aux ah nin son grawng bun an, mawh kawn sang lud vao pui an khankix tau mai pa yuh bun coh kaux tom rheung bawg yam lie? 44 Kix laig ka dee ot nawh, awm laig simex ka dee ot bun coh kaux, awm an kix hoik laig ka dee ot Ahawlax mai Ahawlibax, pa mawh bun koe rhawm kraing an kiex heue. 45 Mawh kheu nan pui rahsee tak prawng ca ka bun pa lud vao mai bun pa kieh nham jauh, mawh kheu mawh kix pa lud vao mai nham phimap an tak koe ka piang taix kix heue. 46 Siyiex ah nin, “Aux tak viex cub pui hun hoek ka kiex mai tawx akhwang yuh krax kha rhawm mai rhim ka kix heue.” 47 Cub pui hun an, tak dheem kix ka simaox mai pah kix yum ka vaig, kix tak pah kawn simex kawn bun kix mai keeig nyiex kix ka ngu heue. 48 Aux tak kieh rhawm kraing rhawm he kix yiien grai khaing haktiex, sonsang mawh pa tawx satix ka bun mai son ang kix kraing hu awm maix heue. 49 Pax ra kaux tak yaox ti kham phimap awm pa koe rhawm kraing tix mai pax tak yaox ti kham geu phimap grawng pa krub tix riang grang mai pex tak tawng ka grawng mawh Aux Siyiex heue.