1 Gumlox Siyiex hoek ka aux ah nin, 2 Maix pa mawh kawn pui eue, mawh hoik khre rien maix sonsang prawng ca ka veng pa naog ka pa pah pui lie? Jhi nawh yaox grawng pa seeing brai yuh nawh khawmuik. 3 Maix tak krai ah nin, Siyiex ah nin, veng pa hoik kieh nham jauh ka sigreung tix mai pa kieh tokaux tix seeing brai ka pa krub riang grang bawg yam singaix maix hoik hoek heue. 4 Maix hoik lih ti koe krax lud kheu hoik kieh maix nham jauh mai hoik kieh tokaux tix seeing ka riang grang pa yuh tix, mai hoik kieh bawg yam singaix tix dex mai hoik kieh khix num tix hoek heue. Mawh kheu nan Aux tak kieh pui tang ceu salao ka maix mai kieh meung haktiex khawmuik nu nai ka maix heue. 5 “Pui pa ot dee dex mai dee singai khaing maix, tak sang nu nai ka maix, haktiex khawmuik tak sang yuh pa ang cee ang cak ka maix.” 6 Jhak heue, cub cao kaing cao kap pui Isarelax pa ot ka daux maix ku kaux hoik shiao min sibrawm tix sonsang kieh nham khankix jauh heue. 7 Ka daux veng ang lai koe pui pa yungyi ka miex keeing tix daux sigreung maix tix kaux kawx, kix hoik yuh krax tuktiak ka daux sigreung maix, kix hoik yuh pa ang khaw ang caw ka kawn doe mai ka miexmai heue.Ref 22:7 Lih 20:12, 22:21-22; Pi 5:16, 24:17 8 Maix hoik nu nai ka ceu pa singax singeh Aux mai ang yungyi ka singaix twah Aux.Ref 22:8 Krub 19:30, 26:2 9 Ka daux maix koe pui cheeik sonsang kieh nham jauh mai ka daux maix koe pui pa ih priex ka piang gawng mai ka daux sigreung maix koe pui pa yuh pa seeing brai heue. 10 Ka daux maix koe pui pa lud vao mai moeng keeing tix, ka daux maix koe pui pa khin tix lud vao mai bun pa ang nyang singax kaux heue.Ref 22:10-11 Krub 18:7-20 11 Pui tiblah lud vao mai moeng paox plawg tix mai tiblah lud vao yuh pa seeing ka mun tix mai ka daux maix tiblah lud vao ka daux pa khin ka nan tix, pa mawh kawn bun keeing nawh heue. 12 Ka daux maix koe pui rieb mau cun praok sonsang kieh nham jauh, maix tawx paox plawg tix yaog mau mai teei rao tom nie ka daux pa khin tix mai maix hoik piawm ka Aux, Siyiex ah nan heue.Ref 22:12 Lih 22:25, 23:8; Krub 25:36-37; Pi 16:19, 23:19 13 Mawh kheu nan jhak heue, Aux dieh taix tix ka rao mau pa pon maix daux pa ang rahsee, pa yuh tix mai ka nham pa hoik jauh ka sigreung maix heue. 14 Yam prawng ca Aux ka maix mawh koe rhawm pa pon kham geu maix nang lie? Phan ang mawh nan, mawh kawn koe riang rao taix maix lie? Aux mawh Siyiex tak sang yuh awm pa krai tix heue. 15 Aux tak kieh maix prawng sinax ceu pui mai kieh maix tah hu ku sidah haktiex mai teei ti tik pa caox caig khaing maix heue. 16 Siyiex leeing ju ah! Maix tak sang yaox ti kham geu krax pa nunai sivoe ngai pui, tak tawng grawng pa mawh Aux Siyiex leeing ju heue. 17 Gumlox Siyiex hoek ka aux ah nin, 18 “Kawn pui eue, nyiex ma pui Isarelax hoik lih mawh aing kawn ka plak sivoe Aux, kix mawh tawng lheung, tawng paing, rhiem mai sivun, ka daux sigreung glah ngu, kix lih mawh aing kawn khaing mau heue.” 19 “Siyiex ah nin, mawh kheu hoik lih pex ti mawh aing kawn, jhak heue, Aux tak khrawm pex hoek ka sigreung veng Yerusaliem heue.” 20 Awm khrawm pui mau, tawng, rhiem, sivun mai tawng paing khaing sigreung glah ngu mai phlu ngu sonsang rauk lih mawh rawm, awm an, Aux tak khrawm pex hoek ka daux pa song rhawm tix mai ka daux pa meet rhawm tix mai Aux tak sang khrawm pex tan mai tong pex lih mawh rawm heue. 21 Aux tak khrawm pex mai phlu ngu krax meet rhawm tix lih ka piang pex mai raug pex lih mawh rawm ka sigreung veng heue. 22 Awm raug mau lih mawh rawm ka daux glah ngu, awm an tak raug pex lih mawh rawm ka daux sigreung an, pex tak tawng grawng mawh Aux Siyiex, pa klup krax meet rhawm tix ka piang pex heue.

23 Gumlox Siyiex hoek ka aux ah nin, 24 “Kawn pui eue, ah nin ka nawh maix mawh haktiex pa ang singax mai pa ang lhiex lai lih ka daux singaix pa song rhawm heue.” 25 Cub cao kaing pa ot sigreung haktiex an khankix riag yo awm sivai sangsi pa kiied ti ih totiag, kix ih kawn pui, kix hoik rhim ti teei sinngao mai kraung khrai pa ting ngawh, kix kieh miexmai koe tom nie ka daux sigreung haktiex an heue. 26 Cao giex kaing li khankix hoik yieh ka lox tat jhawm prawng Aux mai hoik kieh dee singax Aux seeing brai, kix ang lai gwieh ceu pa singax mai ceu pa ang singax khankix siyox, kix ang lai gau pui chix gwieh pa singax mai pa ang singax mai kix hoik veeh pakngai tix khaing singaix twah, sonsang laux min Aux ka sinax kix heue.Ref 22:26 Krub 10:10 27 Cao kaing ka daux sigreung haktiex an, awm sox praix, pa sang kiied ti ih totiag pa kieh nham jah mai kix pah ka pui sonsang magmi tix ka daux pa ang rahsee heue. 28 Cao jhai haktiex an hoik mox phimap tix awm kraix pui tiex phawng pid ka ding mai kix yaox riang susai pa ang mawh meh mai krai lox jhai pie lhien, mawh lox Siyiex, viang mawh nan ang mawh lox krai Siyiex heue. 29 Pui haktiex kawx hoik yuh pa khin, hoik yuh con, mai hoik gut kheem ka pui pa hot sibhawm, pa cud cha, mai kix tuktiak tukte ka nyo sinie daux pa ang rahsee heue. 30 Aux sawg pui tix kaux kaux daux sinax kix, pa sang kaw guh veng mai pa pon cung ka dee grhup guh veng sivoe Aux, sonsang pon tiebtie ka veng an, son ang Aux sang yuh haktiex an laux. Viang mawh nan, Aux ang lai yaox tix kaux kawx heue. 31 Mawh kheu nan, Siyiex ah nin, Aux klup krax song rhawm tix ka piang kix, Aux tak gleeing kix ka ngu pa meet rhawm tix, aux deeh kieh phimap kix hoek ka piang kaing kix heue.