1 Gumlox Siyiex hoek ka aux ah nin, 2 “Kawn pui eue, veeh pakngai maix ka see veng Yerusaliem mai sidiex lox pa ciyang ka dee pa singax singeh mai krai lox jhai pa ciyang ka haktiex Isarelax, 3 mai ah nin ka haktiex Isarelax, Siyiex ah nin, jhak heue, Aux tak mawh pui koeng pex mai lawd vaig tix lih khaing daux gieang mai yuh pui rahsee mai pui ang rahsee khankix laux leeing heue. 4 Mawh kheu Aux tak tat ti tik pui rahsee mai pui ang rahsee khaing daux maix, mawh kheu nan, vaig lawm Aux tak sang lih khaing daux gieang tix mai yuh can kawn pui laux leeing, jah khaing plak seh tom hoek plak laong, 5 Sonsang tawng kawn pui khankix pa mawh Aux Siyiex, pa lawd vaig khaing daux gieang mai ang lai deeh sau vaig ka daux gieang tix bawg kawx heue. 6 Kawn pui eue, ngia ngheeik tau mai pa laux rhawm laux rhi mai pa kin song ka plak sivoe ngai kix heue. 7 Yam chawk kix ka maix ah nin, ngia ngheeik maix kheu patix? Maix tak deeh ah nin, mawh kheu grawng lox satang an, yam hoek grawng an, rhawm rhi pui ku kaux, tak sang khrup mai taix caong tak pawng poe mai khwan taug mao mai ngawng tak sang siyaung awm puk pak rawm. Jhak heue, lox satang an hoek mai grum naog, Siyiex ah nan heue. 8 Gumlox Siyiex baox hoek ka aux ah nin, 9 “Kawn pui eue, krai lox jhai ah nin, Siyiex ah nin vaig tix kre, pa hoik klaing nawh lawm mai hoik awt kieh plang, 10 hoik klaing lawm sonsang pah pui, hoik awt plang awm pluk plak praix! Sang mawh pa gaux rhawm ex ka lie? Khaox puat kawn simex Aux hoik nu nai ka can khaox khawmuik heue. 11 Hoik ap vaig pa hoik klaing awt kieh plang an sonsang shiao ka, hoik ap vaig pa hoik klaing kieh plang an ka daux taix cao pa pah pui heue. 12 Kawn pui eue, yiiem grai mai ngia ngheeik ka, mawh kheu in mawh grawng pa sang yuh pui Aux khankix laux leeing mai yuh laux ka cao kaing cao kap pui Isarelax, ceu pa lhat graung khaing vaig an tak hoek ka piang pui Aux, mawh kheu nan tub ka ba viang heue. 13 In mawh ceu pa cheuk ti yaox ka pui Aux mai phan kix kawn thiang ti ang doh keud ka phimap tix, ceu in khawmuik tak sang hoek ka piang kix, Siyiex ah nan heue. 14 Kawn simex kawn pui eue, krai lox jhai mai dieh taix tix mai vaig tak sang hoek ra bawg, loe bawg an mawh vaig pa pah pui, pa mawh vaig pa sang pah pui ting lhaong, pa ot hawt vung viang kix kudah kudee heue. 15 Sonsang laux rhawm lauxrhi kix, Aux hoik deuh vaig ka siviex veng kix khawmuik mai mawh vaig pa hoik awt plang pa awm pluk plak praix pa ap sonsang pah ka pui heue. 16 Vaig pa kied lawm eue, mug ka plak khawn dawm, plak khawn gwiex mai ka plak see dee veeh maix tix hu ka heue. 17 Aux kawx tak tup taix tix tau mai kieh krax song rhawm tix yiien kah, Aux pa mawh Siyiex krai lox in heue.” 18 Gumlox Siyiex baox hoek ka aux mai ah nan, 19 “Kawn pui eue, mhai ti deuh daux krax ra nyaing sonsang hoek vaig simiang Babulon, krax an ra nyaing tak sang lih khaing daux haktiex tix mu khaing mai sum ti deuh mhai lhak tix mu ka gah krax pa kieh jhi krax hu daux veng.” 20 Yuh krax tix nyaing sonsang hoek vaig ka veng Raba ceu pui Amon mai ka haktiex Yudax mai ka veng Yerusaliem pa kaux cong. 21 Mawh kheu simiang Babulon cung ka gah krax ting ra nyaing, sonsang tawx sibawk chawk jai, nawh rang reuh ti yaox ka te ak, nawh chawk ka riang grang Terat mai jhak ti yaox ka tawm totiag. 22 Ka daux taix khawn dawm nawh koe te ak sibawk son veng Yerusaliem mai an krai sonsang hu yuh nawh khaox dung mai sonsang kok yo ka lox naing, sonsang dheem siviex veng laux ka khaox dum mai yuh ku tab mai kaong guh veng, 23 viang mawh nan, lox sibawk an mawh ceu pa giex going pa kieh kix lud, ka kix pa hoik tiextu mai kieh kix doh keud ka ceu pa lud tix, sonsang rhim kix hoek ka daux pa giex laung heue. 24 Mawh kheu nan, Siyiex ah nin, phimap pex hoik plak jhi yaox sidawng pui ku kaux hoik tawng ka phimap pa lud pex, kaing pa yuh maix khankix hoik jhi ka phimap maix, maix tak yaox ti kham ka pa ciyang mai cung tix mai Aux tak ap maix ka daux tawm taix pui koeng maix heue. 25 Maix pa mawh cao kaing cao kap pui Isarelax pa seeing brai eue, bawg yam singaix pa ghoik pa sang ciyang ka pex tak sang hoek, 26 Siyiex ah nin, yah lawk kaing mai peeik mhok khri pex, ceu an tak ang lai baox koe awm sivoe an mai tak sang yaog pui pa tiem mai yeen ka pui pa lhaong khankix heue. 27 Aux tak sang yuh laux leeing, laux leeing, laux leeing mai ceu an tak ang lai baox koe tom sidah hoek pui koe akhwang ti prawng ca rahsee mai Aux tak sang ap ti tawx an ka nawh heue.”

28 Maix pa mawh kawn pui eue, krai lox jhai ah nin, Siyiex ah nin son grawng pa dex dawd ka pui Amon mai grawng lox pa salao pa ah nin, vaig tix kre mai vaig tix kre pa hoik klaing tix plang hoik lawd sonsang pah mai vaig Ref 21:28-32 Ye 49:1-6; Yez 25:1-7; Amo 1:13-15; Ze 2:8-11 pa hoik awt plang awm pluk plak praix mawh sonsang yuh kawn pui laux leeing, 29 riang susai pa yaox pex mawh pa lud mai lox jhai pa krai pex mawh pie lhien, pex mawh pa seeing brai mai mawh pui pa caox caig, bawg yam singaix ghoik pa sang ciyang ka maix hoik hoek mai vaig tak sang hoek ka piang ngawg pui caox heue. 30 Deeh sau vaig daux gieang. Aux tak sang prawng ca maix, ka dee hoik phan Aux maix mai haktiex keh maix heue. 31 Aux tak klup krax song rhawm ka piang maix mai Aux tak phlu ngu pa song rhawm tix ka maix mai Aux tak ap maix ka daux tawm taix pui pa lang teung kin yuh krax laux leeing heue. 32 Maix tak mawh khix taung ka ngu, nham maix tak ot ka daux sigreung haktiex, pui tix kaux kawx tak ang lai krai lox in heue.