1 Gumlox Siyiex baox hoek ka aux, 2 Lox kab pa dexdawt mai haktiex pui Isarelax pa shiao maix,Ref 18:2 Ye 31:29 pa ah nin, keeing khankix ih plix siiet pa niex mai kawn praix khankix siki rhang ka koe dee bleeh yuh ka mawx? 3 Siyiex ah nin, awm im ju Aux, khaix in pex tak ang lai yaox ti shiao lox kab in ka daux haktiex Isarelax tix bawg kawx heue. 4 Jhak heue, ju khwan khankix mawh cie Aux, awm mawh ju khwan keeing cie Aux mai ju khwan kawn kawx, mawh cie Aux, ju khwan pa yuh phimap tak yum heue. 5 Phan pui tix kaux koe rhawm pa rahsee mai yuh ceu pa mawh meh ka daux pa khaw caw mai been, 6 phan nawh ang sax ih priex ka piang gawng mai ang sax yaog ngai tix krub ka riang grang nyiex ma ceu pui Isarelax mai ang sax lud vao mai moeng paox plawg tix mai ang sax hu dex ka bun yam hoek mee kix, 7 ang sax yuh pa khin ka pui tix kaux kawx, viang mawh nan, hoik deeh tawx ka kraung pa tang pui ka tix mai ang sax rhim ka kraung cie pui mai hoik tawx pui cai rhawm sawm mai tawx pui ka kaong ceep kraung, 8 nawh ang sax tawx pui yaog mau sonsang pon rao, phan ang mawh nan, deeh ghaok rao mau mai hoik yoi taix tix ka pa lud mai pa prawng see ka paox kawn pui tix ka daux pa mawh pa meh, 9 hawt lawng hu ka daux lox lai beenli mai yuh satix ti hawt been pa phan pa deuh Aux ka daux krax pa kaux sijax tix, pui an tak mawh pui pa rahsee, nawh tak yaox ti im ju tete, Siyiex ah nan heue.Ref 18:9 Krub 18:5 10 Phan nawh koe kawn simex pa yuh con mai pa kieh nham jauh, pa yuh ceu in tix ceuceu ka puxaik tix, 11 pui pa ang yuh awm pa koe been pa mhawm pa mawh pui pa ih priex ka piang gawng khankix, phan ang mawh nan, pa lud vao mai moeng paox plawg tix, 12 pa yuh krax khin ka pui pa hot sibhawm mai pui pa cud cha mai pa rhim ka kraung khrai pui ka daux pa kin mai pa ang lai deeh tawx ka kraung pa tang pui ka tix mai pa yaog ngai ti krub ka riang grang mai yuh ceu pa seeing brai, 13 pa tawx pui yaog mau sonsang teei rao mau mai baox ghaok rao, mawh sang yaox nawh ti im ju lie? Nawh tak ang yaox ti im ju, mawh kheu hoik yuh nawh ceu pa seeing brai khankix, nawh tak yaox ti yum tete mai nham phimap nawh tak hoek ka piang nawh heue. 14 Viang mawh nan, phan nawh koe kawn simex pa yaox ka phimap yuh keeing tix mai lhat graung ka, ang hawt yuh awm an, 15 pa ang sax ih priex ka piang gawng mai pa ang sax yaog ngai tix krub ka riang grang nyiex ma ceu pui Isarelax mai pa ang sax lud vao mai moeng paox plawg tix, 16 pa ang sax yuh krax lud ka pui tix kaux kawx mai pa ang sax rhim ka kraung pa tang pui mai pa ang sax ghrang ka kraung khrai pui, viang mawh nan, hoik tawx pui pa cai rhawm sawm mai hoik tawx pui pa ot ka kaong ceep kraung, 17 pa nyeu taix tix tawx ka pui hot sibhawm mai pa ang lai rieb ti teei rao mau ceuk, phan ang mawh nan, pa ang ghaok rao mau, pa priex ti hawt ka been pa phan pa deuh Aux mai pa lawng hu ka daux lox lai beenli Aux, nawh tak ang yaox ti yum son phimap keeing tix, nawh tak yaox ti im ju tete heue. 18 “Phan mawh son keeing nawh, kheu hoik kied kin yuh nawh krax kha rhawm, ka puxaik tix mai hoik rhim ka kraung cie pui mai yuh pa ang mhawm ka daux sinax pui nawh khankix, jhak heue, nawh tak yum kheu phimap tix heue.”

19 Viang mawh nan maix kawn ah nin, kawn simex tak ang yaox ti kham phimap keeing tix, kheu jao patix lie? Mawh kheu kawn simex hoik hawt awm been pa phan pa deuh mai pa khaw caw mai hoik priex rien ti hawt ka lox lai beenli pa deuh Aux khankix, 20 “Ju khwan pa yuh phimap tak yum tete, kawn praix tak ang lai yaox ti kham phimap keeing tix mai keeing tak ang yaox ti kham phimap kawn praix tix, pui pa rahsee tak pon bwanson pa rahsee mai pui pa caox caig, tak pon ka bwanson pa caox caig,Ref 18:20 Pi 24:16 21 phan pui pa caox tix kaux deeh veeh khaing phimap pa hoik yuh tix mai priex rien ti hawt ka lox lai beenli Aux mai yuh awm lox tat jhawm prawng ka daux pa khaw caw, nawh tak yaox tix im ju tete, nawh tak ang yaox ti yum heue.” 22 Tak ang lai deeh doh keud ka krax pa lud hoik yuh nawh pie tix ceu kawx, kheu jao pa rahsee hoik yuh nawh khankix nawh tak yaox ti im ju heue. 23 Mawh nyawm rhawm Aux ka daux pa yum pui pa caox caig khankix lie? Ang Aux nie simie ti deeh kieh kix veeh khaing krax nawh mai im ju lie? Siyiex ah nan heue. 24 Viang mawh nan, yam deeh veeh pui pa rahsee ti khaing krax pa rahsee tix mai yuh phimap mai pa caox caig mai pa seeing brai, awm yuh pui pa ang rahsee tix im ju lie? Can pa rahsee pa hoik yuh nawh tak ang lai doh keud kah, kheu ang nawh kaux sijax mai hoik lud mai yuh phimap, kheu jao grawng in nawh tak yaox ti yum heue. 25 Viang mawh nan maix kawn ah nin, pa prawng ca Siyiex ang rahsee, nyiex ma pui Isarelax eue, nghiet heue, krax prawng ca Aux mawh pa rahsee, ang hoik mawh krax prawng ca pex pa ang lai rahsee ang mawh lie? 26 Yam veeh pui pa rahsee khaing krax pa rahsee tix mai yuh phimap mai pa caox caig, nawh tak yaox ti yum kheu pa caox caig yuh tix heue. 27 Awm an yam deeh veeh pui pa caox caig khaing krax pa caox caig tix, pa hoik lud yuh tix mai deeh yuh pa rahsee mai pa khaw caw, nawh mawh pui pa taoh tokaux tix im ju heue. 28 Mawh kheu nawh hoik tiag cheu ti yaox ka ceu an khankix mai deeh veeh khaing ceu pa lud tix, nawh tak sang yaox ti im ju tete mai nawh tak ang yaox ti yum heue. 29 Viang mawh nan, nyiex ma ceu pui Isarelax kawn ah nin, krax prawng ca Siyiex ang rahsee nyiex ma pui Isarelax eue, krax prawng ca Aux mawh pa rahsee, ang hoik mawh krax prawng ca pa ang lai rahsee ang mawh lie? 30 “Mawh kheu nan, nyiex ma pui Isarelax eue, Aux tak ciyang pex ku kaux awm pa yuh nawh, Siyiex ah nan. Doh keud mai veeh khaing phimap pa lud tix khawmuik, son ang pex sang hoek daux krax laux leeing kheu pa caox an heue. 31 Tik ka can pa lud mai pa tieh feen ka Aux mai kieh pex koe rhawm rhi pa khraox mai ju pa khraox heue. Nyiex ma pui Isarelax eue, pex lai simie ti yum kheu jao patix? 32 Mawh kheu Aux ang lai mawh pa nyawm rhawm ka yum pui tix kaux kaux, Siyiex ah nin, mawh kheu nan, doh keud mai im ju heue.”