1 Mawh kheu nan, yiiem doe son cao kaing cao kap pui Isarelax khankix 2 ah nin, miex maix mawh tix? Mawh sivai sangsi, miex nawh it sinax sivai sangsi mai nawh tawx kawn tix ih priex sinax sivai sangsi awn ju heue. 3 Nawh eei kawn tix ting, tom lih mawh sivai sangsi awn ju, nawh hoik gau nawh giex totiag mai nawh hoik kiied ti ih pui heue. 4 Pui kuceu mhong ka grawng nawh, pa hoik pon giex nawh daux tiex mai phyawk nawh ka maox rhiem viex hu ka haktiex Ejiptux heue. 5 Yam yaox miex sivai sangsi an ka pau tix nawh tom rheung mai ang lai koe krax keud pot jun pot ka nawh mai nawh baox teei kawn tang mu mai eei nawh ting tom lih mawh sivai sangsi awn ju heue. 6 Nawh lailing sinax sivai sangsi khankix, tom lih mawh sivai sangsi awn ju, nawh hoik gau ti giex totiag mai nawh kiied ka pui khankix heue. 7 Nawh tawng ka nyiex haw ot kix yiien mai yuh veng ot kix laux leeing, haktiex pa grum naog pui ka hoik lih tix yiien kheu lox sinum graox nawh heue. 8 Khaix an pui kuceu hoik hoek ti puing ka nawh khaing ku plak mai kix neh rub tix ka piang nawh, nawh hoik krix ka daux tiex yuh kix heue. 9 Kix phyawk nawh ka maox ceng mai sau nawh ka daux grau mai viex nawh hu ka simiang Babulon, son ang lai baox deeh mhong lox nawh ka piang gawng Isarelax khaix in tix bawg kawx mai kix laung nawh ka daux veng pa kaux cong heue. 10 Miex maix awm nhu plix siiet pa sum ka daux sipeem plix siiet ka dee pa kied mhawm rawm, pa plix tom nie pa kied haoh hun kak khankix, kheu jao kied haoh hun rawm heue. 11 Kak nawh khankix kied kaux cong, sonsang mawh khaox gix pa shiao cao kwang haktiex, kak nawh khankix kied yeem kied tan mai kied lhaong, tom pui khawmuik pon yaox ka heue. 12 Viang mawh nan, hoik reeig nhu plix siiet an ka daux pa song rhawm mai tik ka piang tiex mai bhaung plak lih singaix hoik kroh yuh plix nawh, kak pa kied kaux cong an khankix kawx hoik fit hoik kroh mai hoik graig hoik proe ka daux ngu heue. 13 Yam in hoik reeig ti sum an ka daux tiag dee kroh haktiex mai ka daux haktiex dee ang rawm koe heue. 14 Ngu hoik lih ti hoek khaing sinax kak tix kak mai gleeing kak mai plix, son ang kak pa kaux cong lai koe lai deuk ka daux an mai ang lai koe khaox gix son cao pa kwang tix gawng kawx heue. In mawh grawng pa yiiem pa doe mai kieh mawh lox pa yiiem pa doe heue.