1 Gumlox Siyiex hoek bleeh ka aux, 2 “Kawn simex kawn pui eue, krai lox phektem ka ceu pui Isarelax khankix, 3 ah nin, Siyiex ah nin, koe klang krih ting tix mu, pa ting pruik mai hauk pruik kawx kied lang mai naog ka hauk pa koe rawm siang kuceu mai hoek ka gawng Lebanon mai tud tix viex kak khaox gix, 4 Nawh tud tix viex nyoig rao awn mai viex an hu ka haktiex dee yuh pui lai geu mai sum an ka daux veng cao lai cao geu heue. 5 Khaix an nawh teei simie haktiex an tiblah mai sum an ka dee mhawm tiex mhawm phon, nawh van simie an hawt ka dee pa kied haoh rawm mai deuh an awm khaox siglai heue. 6 Simie lih kuah mai ting lhaong mai lih ti mawh nhu plix siiet pa tiiem mai kak nawh khankix yie lang hu ka plak see klang krih mai riah nawh kawx ot cung greem nawh heue. Mawh kheu nan, an hoik lih ti mawh nhu plix siiet mai kak khankix pre hu tom hoik preung tix lih lhax ka rao an heue.” 7 Viang mawh nan, koe klang krih ting tang mu, pa ting preeik mai pa kied nie hauk, jhak heue, nhu plix siiet in kawk riah tix hu ka plak see nawh mai nyeu kak tix lih hu ka plak see nawh, sonsang pon see rawm ka an, jah hawt rawb sipeem tom hoek ka dee sum an khankix heue. 8 Sum an ka dee mhawm tiex mhawm phon, ka dee kied nie rawm, sonsang pre kak mai plix haoh hun mai sonsang lih ti mawh nhu plix siiet pa koe min heue. 9 Siyiex ah nin, mawh kawn sang haok hwan ting lhaong khaox an lie? Mawh tak sang reeig riah nawh mai pieh plix sonsang fit lhax awn nawh lie? Ang lai lo ka plawng taix ting riang mai pui tom nie sonsang reeig ka riah nawh heue. 10 Jhak heue, yam gah ti sum, mawh kawn sang haok hwan ting lhaong khaox an lie? Mawh ang fit hu yam hoek phlu bhaung plak lih singaix ka nawh lie? An tak sang fit hu ka dee sum tix daux rawng ang mawh lie? 11 Khaix an gumlox Siyiex hoek bleeh ka aux, 12 “Ah nin ka nyiex ma pa chix tieh feen, mawh ang pex tawng ka dee bleeh ceu in lie? Krai ka kix ah nin, simiang Babulon hoek ka Yerusaliem mai hoik rhim ti viex simiang mai cub cao kaing cao kap, hu ka Babulon heue.”Ref 17:12-15 2Sim 24:15-20; 2Been 36:10-13 13 Nawh teei ceu cat doeh nyiex ma Simiang tix kaux mai hoik yuh sijax mukheu tau mai nawh, ka daux pa tiextu tix ka nawh heue. Rhim ti viex cao kaing pa ting riang ka daux haktiex an hu, 14 sonsang yeen meung haktiex an tix tiem mai ang lai yaog tokaux tix, ka daux pa priex rien nawh ka sijax mukheu tom kaux cong sijung heue. 15 Viang mawh nan, Zedaki hoik tieh feen ka piang Nebukhaneza kheu ploi nawh pui cau ti hu ka Ejiptux, sonsang pon ti brung mai pui naing tom nie heue. Mawh sang haok hwan nawh ka lie? Mawh sang pon klawd nawh ka yuh tix ceu an lie? Mawh sang pon yeen nawh sijax mukheu an mai pon luat luan ka lie? 16 Siyiex ah nin, awm im ju Aux, pui pa salao ka simiang mai yieh ka sijax mukheu pa hoik tiextu tix ka simiang an, pa hoik yaog nawh mawh simiang, tak yum ka sigreung veng Babulon dee ot simiang an heue. 17 Viang Pharaw mai cub kru naing pa kied ting riang rao mai cub pui hun nawh khankix, tak ang pon teem nawh ka naing, viang kix kaw guh veng mai yuh tab lai lawm veng sonsang pah ka pui tom nie kawx, kix ang pex heue. 18 Mawh kheu jao nu nai nawh ka lox tiextu mai yieh sijax mukheu pa hoik yuh tix tau mai ca kawn yuh ceu in, mawh kheu nan, nawh tak ang pon tix glawd heue. 19 Siyiex ah nin, awm im ju Aux, kaw pa nu nai lox tiextu tix ka Aux mai pa yieh ka sijax mukheu Aux, Aux tak sang kieh phimap hoek ka piang kaing nawh heue. 20 Aux tak naih rup tix rob ka piang nawh mai nawh tak krix ka jhawk taong Aux, Aux tak viex nawh hoek ka Babulon mai ciyang nawh tan, mawh kheu ang nawh kaux sijax ka piang Aux heue. 21 Pui naing pa vao nawh khawmuik, tak goh ti yum ka lawm vaig mai pa kawn deuk tak prung prang ti rairuat kudah mai pex tak tawng mawh lox sikah Aux, pa mawh Siyiex heue.”

22 Siyiex ah nin, “Aux tak sang caik rao nyoeg khaox gix pa kied lhaong mai sum ka, Aux tak raig ka kak awn an mai sum ka piang gawng lhaong, 23 Aux tak sum an ka piang gawng lhaong Isarelax, sonsang lih kak tom nie mai lih plix pa mhawm, pa lih mawh khaox gix pa mhawm grang, mai sim kuceu hoek tix ot greem nawh mai kix tak yuh mheem tix greem veei kak khaox an heue. 24 Khaox ka daux tiag ku pang, tak tawng ka mawh Aux Siyiex pa kieh khaox lhaong tiem mai deeh yaog khaox tiem lhaong mai pa kieh khaox klai deeh kroh mai kieh khaox kroh deeh klai, Aux mawh Siyiex pa yuh awm pa krai tix heue.”